ආරච්චිකට්ටුව විජයකටුපත ප්‍රදේශයේ නිවසක කටගැස්මට සුදානම් කළ ඉබ්බන් දෙදෙනකු පෝර උරයක දමා සගවා තිබියදී ගෙහිමියා සමග පෙරේදා (15) අත්අඩංගුවට ගත් බව ආරච්චිකට්ටුව පොලිසිය පවසයි.
ලද තොරතුරකට අනුව කසිප්පු පෙරිමේ ජාවාරමක් හසුකරගැනීමට මෙම නිවස වටලා ඇත. එහිදී මෙම සැකකරු විසින් ආසන්නයේ ඇති ඇළෙන් ඉබ්බන් දෙදෙනකු මස් කිරිම පිණිස අල්ලා පෝර උරයක දමා නිවස ආසන්නයේ ඇති පොල් ගසක් යට සඟවා තිබියදී සොයාගෙන ඇති අතර ඉබ්බන් සමග සැකකරු අත්අඩංගුවට ගෙන ඇත.
මේ සම්බන්ධයෙන් පොලිස් ස්ථානාධිපතිවරයා පවසා සිටියේ නැව්වල විෂද්‍රව්‍ය මුහුදට නිදහස් වීමෙන් විශාල ලෙස කැස්බෑවන් විනාශ වන අතර ගොඩබිම සිටින අසරණ වඳවීගෙන යන සත්ත්ව විශේෂයක් වන ඉබ්බන් මිනිසුන් විසින් විනාශකර දමන බවයි. පොලිස් ස්ථානාධිපතිවරයා පවසා සිටියේ මෙසේ සිදුකරන ඉබ්බන් මරාදැමීමට විරුද්ධව සියලු ජන කොටස් ඒකරාශී වන ලෙසයි. සැකකරු ඉබ්බන් සමග අධිකරණයට ඉදිරිපත් කිරිමට නියමිතය.
-ලලිත් නවරත්න -
0 Comments