කොරෝනා ගමට ගේනවා කියා ඇගලුම් බසයටත් රියැදුරුටත් පහර දීලා

ඇගලුම් කර්මාන්ත ශාලාවෙන් ගමට කොරෝනා බෙදාහරිනවා කියා ඇගලුම් සේවිකාවන් ප්‍රවාහනය කළ බස් රථයකට පහරදී එහි රියැදුරුට තියුණු ආයුධයකින් පහරදීමේ සිදුවීමක් වාර්තාවී තිබේ.

සංචරණ සීමා ක්‍රියාත්මක කාලය තුළ මුහුණු ආවරණය කොට පැමිණි සැකකාර තරුණයන් විසින් ඇඟලුම් සේවිකාවන් ප්‍රවාහනය කළ බස් රථයට පහරදී දැඩි අලාභ හානි සිදුකොට ඇති අතර බස් රථයේ සිටි සේකාවන්ට ද පහරදී ඇති බව පොලිසිය පැවසීය. සැකකාර තරුණයන් මුරුගනූර් ප්‍රදේශයේ කැලෑබද ස්ථානයකදී පෙරේදා (12) ඇඟලුම් සේවිකාවන් ප්‍රවාහනය කළ බස් රථයේ මග හරස්කොට මෙම පහරදීම සිදුකොට ඇති බව පොලිසිය පැවසීය.
පහරදීම සිදු කළ තරුණයන් දෙදෙනකු වවුනියාව, මුරුගනූර් ප්‍රදේශයේදී ඊයේ (13) සැකපිට අත්අඩංගුවට ගත් බව වවුනියාව පොලිසිය කියයි.  

 පහරදීමෙන් කැපුම් තුවාල ලැබූ බස් රථයේ රියැදුරු වූ ඇන්ටන් පුෂ්පරාසා නමැති පුද්ගලයකු වවුනියාව මහ රෝහල වෙත ඇතුළත් කොට ඇති බව පොලිසිය පැවසීය.  මීට ඉහතදී තරුණයන් විසින් බස් රථය තම ගම්මානය වෙත රැගෙන නොඑන ලෙසත් ඇඟලුම් කර්මාන්ත ශාලාවේ සේවය කරන සේවිකාවන් කොරෝනා වයිරසය බෙදාහරින බවට විරෝග්ධය දක්වා ඇති අතර වවුනියාව පොලිසිය මැදිහත්ව සිද්ධිය සමථයකට පකොට ඇති බව පොලිසිය පැවසීය.  එහෙත් තරුණයන් අවස්ථා කිහිපයකදී බස් රථයේ රියැදුරුට තර්ජනය කොට ඇති අතර පෙරේදා (12) මෙම පහරදීම සිදුකොට ඇති බව ද පොලිසිය පැවසීය.

පොලිසිය පැවසුවේ තරුණයන් එම අවස්ථාවේ සිටි ඇඟලුම් කර්මාන්ත ශාලාවේ සේවිකාවන්ට ද පහරදී ඇති අතර ඔවුන්ගේ කෑ ගැසීම මත පලාගොස් ඇති බවයි. සිද්ධිය පිළිබඳ බුද්ධි තොරතුරු මත පහරදීමට පැමිණි සැකකරුවන් හඳුනාගෙන අත්අඩංගුවට ගැනීම සිදුකළ බව ද පොලිසිය පැවසීය.  අත්අඩංගුවට ගත් සැකකරුවෝ වවුනියාව මුරුගනූර් හි පදිංචි අවුරුදු 19ත් 30ත් අතර වයසේ පසුවන්නෝ වෙති.  සැකකරුවන් වවුනියාව මහෙස්ත්‍රාත් අධිකරණයට ඉදිරිපත් කිරිමට නියමිත අතර වවුනියාව පොලිස් අපරාධ විමර්ශන අංශය වැඩිදුර විමර්ශන සිදුකරයි.


 -සිතුම් චතුරංග