අද (16) උදෑසන මෙරටට ලැබුණු මොඩාර්නා එන්නත් මහනුවර ප්‍රදේශයේ ජනතාවගේ එන්නත්කරණය සඳහා යොදා ගැනීමට අපේක්ෂා කරන බව ඖෂධ නිෂ්පාදන සැපයුම් හා නියාමන රාජ්‍ය අමාත්‍ය මහාචාර්ය චන්න ජයසුමන මහතා පවසයි.
ඇමෙරිකාවේ නිෂ්පාදිත මොඩාර්නා එන්නත් මාත්‍රා 15 ලක්ෂයක් අද උදෑසන කටුනායක ගුවන් තොටුපළ වෙත රැගෙන ආ අතර එන්නත් භාර ගැනීමේ අවස්ථාවට සෞඛ්‍ය අමාත්‍ය පවිත්‍රා වන්නිආරච්චි, රාජ්‍ය අමාත්‍ය මහාචාර්ය චන්න ජයසුමන මහතා ඇතුළු පිරිසක් එක්ව සිටියහ.
මෙම එන්නත් මෙරටට ලැබුණේ ලෝක සෞඛ්‍ය සංවිධානයේ COVAX පහසුකම යටතේ අමෙරිකා එක්සත් ජනපදය සිදු කළ පරිත්‍යාගයක් ලෙසයි.
මේ අතර රාජ්‍ය අමාත්‍ය මහාචාර්ය චන්න ජයසුමන මහතා පැවසුවේ, මීට පෙර මහනුවර දිස්ත්‍රික්කයේ එන්නත්කරණ වැඩසටහන සඳහා යොදා ගත් ස්පුට්නික් එන්නත අඛණ්ඩව ලබාගැනීමේ ගැටලුවක් මතුව ඇති බවයි.
”දැනට රුසියාවේ මතුවී ඇති තත්තවය මත ස්පුට්නික් එන්නත දිගට ම ලබා ගැනීමේ යම් ගැටලුවක් මතුවෙලා තියෙනවා. මොකද රුසියාව අපිට දැනුම්දීලා තියෙනවා. තමන්ගේ රටේ ජනතාවට ප්‍රමුඛස්ථානය ලබා දෙන්න සිද්ධ වෙනවා කියලා. මොකද පසුගිය සති දෙකක පමණ කාලය ඉතාම ඉහළ රෝගීන් ප්‍රමාණයක් සහ මරණ ප්‍රමාණයක් රුසියාවෙන් වාර්තා වුණා. මේක නිසා මේ පැමිණෙන මොඩර්නා එන්නත මහනුවර දිස්ත්‍රික්කයේ එන්නත්කරණය සඳහා යොදා ගන්නයි බලාපොරොත්තු වෙන්නේ”
මහනුවර කොවිඩ් මර්දන එන්නත්කරණ වැඩසටහන යටතේ දෙවන මාත්‍රා ලබන අයට ගැටලුවක් මතුවේද නැතිද යන්න අනාවරණය කර නැත.
මින් ඉහත පළමු මාත්‍රාව පමණක් ලබාගත්තත් ඇති යනුවෙන් අත්සන් ගැනීමේ අසාමාන්‍ය වැඩසටහනක්ද ක්‍රියාත්මකවූයේ මහනුවර ස්පුට්නික් එන්නත සම්බන්ධයෙනි.
0 Comments