කොවිඩ් ආසාදිතව දින 14ක නිරෝධායන කාලය ද අවසන් කළ මිනුවන්ගොඩ ප්‍රදේශයේ 18 හැවිරිදි පාසල් සිසුවකු පෙරේදා (25) රාත්‍රියේ නිදි ඇඳේදීම මියගොස් ඇතැයි මිනුවන්ගොඩ සෞඛ්‍ය වෛද්‍ය නිලධාරි කාර්යාලය පවසයි.
මිනුවන්ගොඩ ජනාධිපති විද්‍යාලයේ අධ්‍යාපනය ලබන දුමිඳු දේශාන්ත නමැති මෙම සිසුවා මෙවර උසස් පෙළ විභාගයට පෙනී සිටීමට සූදානමින් සිට ඇත. ඔහු පෙරේදා (25) රාත්‍රී නින්දට ගිය පසු නිදි ඇඳේදීම මියගොස් ඇතැයි මිනුවන්ගොඩ සෞඛ්‍ය වෛද්‍ය නිලධාරි කාර්යාලයේ ප්‍රකාශකයෙක් පැවසීයමෙම සිසුවා සහ ඔහුගේ පවුලේ සියලු දෙනා මීට දෙසතියකට පමණ පෙර කොවිඩ් ආසාදිතයන් බව තහවුරුවීම නිසා නිවස තුළම නිරෝධායනයට ලක්වී ඇති අතර ඔවුන්ගේ නිරෝධායන කාලය ද ඉකුත් 23 වැනිදායින් අවසන්ව ඇත.
ඔවුන් සියලු දෙනා පෙරේදා (25) රාත්‍රී ආහාර ගෙන නින්දට ගොස් ඇති අතර මෙම සිසුවා සමග එකම ඇඳේ නිදාගන්නා ඔහුගේ පියා ඊයේ (26) අලුයම 2.00ට පමණ සිසුවාගේ සිරුර අත ගා බැලීමේදී සිරුර සීතලව තිබූ නිසා මිනුවන්ගොඩ රෝහලේ වෛද්‍යවරයකු නිවෙසට කැඳවා ඇතැයි වාර්තා වේ. සිසුවා ඒ වනවිටත් මියගොස් පැය තුනක පමණ කාලයක් ගත වී තිබී ඇතැයි තහවුරු වී ඇති අතර ඔහුගේ දේහය පිළිබඳ අවසන් කටයුතු නිරෝධායන ක්‍රමවේදය අනුව ඊයේ (26) සිදුකිරිමට නියමිතව තිබිණි.
(දෙවලපොළ කීර්ති ප්‍රනාන්දු)
0 Comments