පිපිරීමෙන් එම ගොඩනැගිල්ලට හානි සිදු වූ අතර අවන්හල අසල රථගාලේ රැඳී සිටි තරුණයින් දෙදෙනෙකු පමණක් සුළු තුවාල ලැබීය. ඒ තුළ සේවකයින් නොසිටි අවස්ථාවක පිපිරුම සිදුව ඇත.
කොළඹ, රීඩ් මාවතේ පැරණි තුරඟ තරග පිටියේ ක්‍රීඩා ප්‍රේක්ෂකාගාරයේ පහත මහලේ පිහිටි අවන්හලක අද අලුයම 5.30 ට පමණ පිපිරීමක් සමග ගින්නක් හටගත්තේය.අවන්හලට දැඩි අලාභ හානී සිදුව තිබේ.
එහිදී ඇතිවූ ගින්න පාලනය කිරීම සඳහා කොළඹ මහ නගරසභා ගිනිනිවීම් ඒකකය සහ පොලීසිය එක්ව කටයුතු කළේය.
එම පිපිරීම සිදුවූයේ ඊයේ (19) රාත්‍රියේ එම ක්‍රීඩාංගනයේ පැවති අග්‍රාමාත්‍ය මහින්ද රාජපක්ෂ කුසලාන පාපන්දු තරගාවලියේ අවසන් තරගය නිමා වී පැය හතක පමණ කාලයකට පසුවය.
පිපිරීමට හේතුව නිශ්චිතව තහවුරු කර ගැනීම සඳහා රජයේ රස පරීක්ෂකවරයා පැමිණ අද උදෑසන එම ස්ථානය නිරීක්ෂණය කළ අතර පසුව තහවුරු කළේ එම පිපිරීම ගෑස් කාන්දුවක් හේතුවෙන් සිදුව ඇති බවය.
කුරුඳුවත්ත පොලීසිය මඟින් වැඩිදුර පරීක්ෂණ ක්‍රියාත්මකය.
0 Comments