පාස්කරලිංගම්ගේ නමත් පැන්ඩෝරා ලැයිස්තුවේ

ජනාධිපතිවරුන් දෙදෙනකුගේ සහ අග්‍රාමාත්‍යවරයකුගේ උපදේශකවරයකු මෙන්ම මුදල් අමාත්‍යංශයේ හිටපු ලේකම්වරයකුද වූ ආර්. පාස්කරලිංගම් මහතා  සිය වත්කම් රහසිගතව සගවා ඇති බවට විමර්ශනාත්මක මාධ්‍යවේදීන්ගේ ජාත්‍යන්තර සාමුහිකය (JCID) විසින් එළිදක්වන ලද  " පැන්ඩෝරා පත්‍රිකා" මගින් තොරතුරු අනාවරණය කර ඇත.   අක්වෙරළ සමාගම්වල වත්කම් රහසිගතව සැඟ වූ ලෝක බලවතුන්ගේ මෙන්ම ධනවතුන් විශාල පිරිසකගේ වත්කම් පිළිබඳ රහස් පැන්ඩෝරා පත්‍රිකා මගින් දැනටමත් පසුගියදා හෙළිකර තිබූ අතර, ඩොලර් මිලියන ගණනක වත්කම් සැඟ වූ අයකු ලෙස ඔවුන්  මෙවර ආර්. පාස්කරලිංගම් මහතාගේ (පාස්කි) නම ද හෙළිදරව් කර තිබේ.


පාස්කරලිංගම් මහතා 1993 දී ඝාතනයට ලක් වූ ජනාධිපති රණසිංහ ප්‍රේමදාස මහතාගේත් උපදේශක ලෙස 1989 සිට 1994 දක්වාත්,

පසුව ජනාධිපති වූ ඩිංගිරි බණ්ඩා විජේතුංග මහතාගේ උපදේශකත් ලෙස 1989 සිට 1994 දක්වාත් කටයුතු කර ඇති අතර පසුව මුදල් අමාත්‍යාංශයේ ලේකම් ලෙස ද සේවය කළ බව  පැන්ඩෝරා වාර්තාවේ සඳහන් වේ.  ඔහු 2002 සිට 2004 දක්වාත්, 2015 සිට 2018 දක්වාත් එවකට අග්‍රාමාත්‍ය රනිල් වික්‍රමසිංහ මහතාගේ ආර්ථික උපදේශකයකු ලෙස ද කටයුතු කර ඇති බව පැන්ඩෝරා පත්‍රිකාවේ දැක්වේ.  ඔහු යහපාලන ආණ්ඩුවේ ආර්ථික කළමනාකරණය කමිටුවේ ප්‍රධානියා ලෙස කටයුතු කළ අතර, ජනාධිපති මෛත්‍රීපාල සිරිසේන මහතා ඉකුත් 2018 වර්ෂයේ දී එම කමිටුව අහෝසි කළේය.


පාස්කරලිංගම් මහතා ඉකුත් 2012 දී බ්‍රිතාන්‍ය වර්ජින් දූපත්වල භාරයක් පිහිටුවා ඇති බවත්, එහි සංස්ථාගත ලේඛනවලට අනුව ඔහුගේ රැකියාව වශයෙන් විශ්‍රාමික ලෙස සටහන් කර ඇති බවත් පැන්ඩෝරා පත්‍රිකා මගින් හෙළිදරව් කර තිබේ. ඔහු තමා සහ පවුලේ අනෙකුත් සාමාජිකයන් ප්‍රතිලාභීන් ලෙස ලැයිස්තුගත කර ඇතැයි ද එම වාර්තාවේ සඳහන් කර ඇත.  මෙම භාරයට, බ්‍රිතාන්‍ය වර්ජන් අයිලන්ඩ්ස් සමාගමක් සහ නැගෙනහිර කොළඹ පෞද්ගලික වෘත්තීය පාසලක් වන හොරොයින් ව්‍යාපාරය හා තාක්ෂණික විද්‍යාලයේ (Horizon College of Business and Technology) කොටස් හිමි සිංගප්පූරු සමාගමක් ද ඇතුළත් වන බව පැන්ඩෝරා වාර්තාවෙන් දක්වා තිබේ.

ජාත්‍යන්තර මාධ්‍යවේදීන්ගේ ජාත්‍යන්තර සමූහය (ICIJ) “විකිණීම සඳහා රහස්‍යභාවය" යන තේමාව යටතේ මෙම අවෙරළ ව්‍යාපාරය සම්බන්ධයෙන් තොරතුරු හෙළිදරව්ව කිරීමත් සමග පාස්කරලිංගම් මහතා මෙම භාරය වසා දැමූ බව පැන්ඩෝරා පත්‍රිකාවෙන් පෙන්වා දී ඇත. රහසිගත ඊමේල් පණිවිඩවලට අනුව පාස්කරලිංගම් මහතා කිසිදු සැලසුමක් නොමැතිව වහාම එය අත්හර ඇති අතර, පසුව ඔහුගේ පුතා සහ බෑනණුවන් සඳහා අලුත් භාරයක් නිර්මාණය කර ඇති බව ද එම වාර්තා පෙන්වා දී තිබේ.   භාරය අධීක්ෂණය කරන ට්‍රයිඩන්ට් ට්‍රස්ට් නිලධාරීන් 2014 වර්ෂයේදී පාකරලිංගගේ උපදේශකයන් සමග විද්‍යුත් තැපෑල හරහා රහසිගතව සංවාද පවත්වා ඇති බවත්, එහිදී මුලින් විද්‍යාලයේ ආයෝජනය සඳහා ඩොලර් ලක්ෂයක් ඉල්ලා පසුව එය පුද්ගලික වියදම් ලෙස ලේබල් කර ඇති බවත් පැන්ඩෝරා පත්‍රිකාවෙන් දක්වා ඇත.

 -නිමන්ති රණසිංහ-