වතුර නොබිව්වොත් මොකද වෙන්නේ?

ජලය ආහාර මෙන්ම මිනිස් ජිවිතයට අත්‍යවශ්‍යය. ආහාර යම් පමණට අඩුපාඩු වුවත් ජීවිතය රඳාපැවතීමට ජලය අත්‍යවශ්‍යය. එහෙත් බොහෝ දෙනා ශරීරයට අවශ්‍ය ලෙසට ජලය පානය කරනවාද? ජලය අඩුවීමෙන් ඇති වන ගැටලු මොනවාද? ඒ ගැන පහදා දීමයි මේ.

අපේ ශරීරය සමෙන් ආවරණය වී තිබුණද, ශරීරයේ සියයට 60කට වඩා තිබෙන්නේ ජලයයි. ආහාර නැතිව දින කිහිපයක් වුව සිටිය හැකි මුත් ජලය නොමැතිව දින 3- 4ක් පමණ වත් ජීවත් විය නොහැකිය. ජලය මිනිස් සිරුරේ රුධිර සංසරණයට, අපද්‍රව්‍ය බැහැර ලීමට උෂ්ණත්වය පාලනයට මෙන්ම ශරීරයේ සියලුම ඉන්ද්‍රිය පද්ධතිවල ක්‍රියාකාරීත්වයට අත්‍යවශය. ශරීරයේ විවිධ පද්ධති ගොඩනැගී ඇති සෛල සෑම විටම ජලයේ ගිලී තිබේ. අපට පිපාසය ඇතිවන්නේ ශරීරයේ ඇති ජල ප්‍රමාණය අඩු වීම නිසාය. එසේ ජලය අඩුවන විට ශරීරයේ ක්‍රියාකාර් සෛලවලට ලැබෙන ජලය ද අඩුවේ. එවිට සෙල විජලනය වීමට බලයි. එසේ වුවහොත් ඒ ඒ ඉන්ද්‍රියයන්ගේ ක්‍රියාකාරීත්වය අඩුවේ. එය අපට දැනෙන්නේ පහත සඳහන් අයුරිනි. පළමුව පිපාසය ඇති වේ. ඉන්පසු හිස බර ගතිය දැනේ මලානික වේ. පිටවෙන මුත්‍රා ප්‍රමාණය අඩු වේ. සම වියළීම වැනි ලක්‍ෂණ පහළ වේ.

මෙමනිසා ශරීරයේ යහපැවැත්මට ශරීරයට අවශ්‍ය පමණට නිරෝගීව තබා ගැනීමට පිපාසය එනතුරු සිටීම සුදුසුද?

නැත. අප කළ යුත්තේ පිපාසය ඇති වීමට පෙර ශය රැක ගැනීමට ජලය පානය කර්මය. එහෙම කරන්නෙ කොහොමද? දිනපතා පුරුද්දක් ලෙසට දවස පුරාම වයස අනුව, කරන රැකියාව අනුව, කරන කාර්යයන්ට අනුව ජලය පානය කළ යුතුය. මෙසේ එක් එක් වයස් ප්‍රමාණ අනුව ගතයුතු ජලය ප්‍රමාණය තීරණය කළ යුතුය. සාමාන්‍යයෙන් ශරීරයේ බර කිලෝග්‍රෑම් එකකට මිලි ලීටර 35 බැගින් ජලය දිනකට පානය කළ යුතුය. උදාහරණ ලෙසට සඳහන් කළොත් බර කිලෝ ග්‍රෑම් 50ක පුද්ගලයකුට දළ වශයෙන් අවශ්‍ය ජලය ප්‍රමාණය (50x35 මිලිලීටර්=1750කි) මිලි ලීටර් 1750කි. එම් ලීටර්වලින් නම් ලීටරයක් සහ මිලිලීටර 750ක් වේ (ලීටර් 13/4කි) දළ වශයෙන් වයස අනුව දිනකට අවශ්‍ය ජල ප්‍රමාණය මෙසේය.

වයස අවුරුදු 1-5 අතර- මිලි ලීටර් 750- 1000

වයස අවුරුදු 6-10 අතර- මිලි ලීටර් 1000 - 1500

වයස අවුරුදු 11-18 අතර ලීටර 1.5-2.0 ඊට වැඩි වයස් පුද්ගලයන්ට තම බර අනුව කිලෝග්‍රෑම් එකකට වතුර මිලිලීටර් 35ක් පමණ ලැබිය යුතුය. තවදුරටත් පැහැදිලි කළොත් මග් එකකින් ජලය පානය කරන්නේ නම් දිනකට පුරවා ගත් ජලය මග් 6-8ක් පානය කළ යුතුය. සාමාන්‍යයෙන් වයස අවුරුදු 18න් පසු පුද්ගලයකුට දිනකට ජලය ලීටර් 2-2 1/2ක් පමණ ගත යුතුය. මෙය තද උණුසුම් පරිසරයක නම් මීට වඩා ජලය පානය කළ යුතුය. එනම් ජලය ලීටර් 2-2 1/2ක් පමණ ගැනීම ඉතාම සුදුසුය. එසේම පානය කරන ජලය පිරිසුදු වීමත් ඉතාම අවශ්‍යයි. උණුකර නිවා ගත් ජලය මේ සඳහා විශේෂය. දිනකට ගත යුතු ජලය ප්‍රමාණයට උණුකර නිවාගත් ජලයම නොව කුරුම්බා, තැඹිලි, බෙලිමල් වතුර, රණවරා වතුර වැනි පාන වර්ග එකතු කර ගත හැකිය.

ජලය ප්‍රමාණවත්ව ශරිරයට ලැබී තිබේද?


ජලය ප්‍රමාණාත්මකව ශරීරයට ලැබී තිබේ දැයි දැන ගත හැක්කේ මුත්‍ර පිටවන වාර ගණන, මුත්‍රවල වර්ණය අනුවය. ජලය පානය කිරීම පිළිබඳ විවිධ මතිමතාන්තර අප සමාජයේ බහුලය. උදය අවදි වූ විගස වතුර වීදුරු3-4ක් පානය කළ යුතු බවට විශ්වාසයක් පවතී. එසේම කෑමට පෙර මෙන්ම අතරමැදදී ජලය පානය කළ යුතු බවද සමහරු සිතති. එසේම ආහාර ගත්පසු වැඩිපුර ජලය පානය කළයුතු බවත් උණු ජලය පානය කිරීමෙන් ශරීරයේ මේද දියවන බවටත් විවිධ මත පවතී. එම මතිමතාන්තර කෙසේ වුවද අප පිළිගත යුතු සත්‍යයක් ඇත. එනම් දිනකට පුද්ගලයකුට අවශ්‍ය ජලය ප්‍රමාණය දවස පුරා පානය කළ යුතු බවය.

පිපාසය දැනෙන තෙක් නොසිට ජලය පානය කළ යුතුය. කෑමට පෙර ජලය වැඩි ප්‍රමාණයක් බීමෙන් ගන්නා ආහාර ප්‍රමාණය අඩු වේ. බර වැඩි, තරබාරු අයකු නම් ගන්නා ආහාර ප්‍රමාණය අඩුකර ගැනීමට කෑමට පෙර ජලය වීදුරුවක් පානය කිරීම සුදුසුය. එවිට ගන්නා ආහාර ප්‍රමාණය අඩුවීමෙන් ශරීරයේ බර අඩු කර ගැනීමට හැකිය. එසේම අනිකුත් මති මතාන්තර ගැනද පිළිගත් විද්‍යාත්මක සාක්ෂි නැත. එසේම උණු ජලය පානය කිර්ම ශරීරයට හිතකර වන අවස්ථා ඇත. උගුරේ ආසාදන ඇතිවිට, ස්වසන ආබාධ ඇති විට උණු ජලය. පානය කිරීම සුදුසු වේ. එසේම සීත පරිසරයක වෙසෙන විට උණුසුම් ජලය පානය කිරීම ශරීරයට හිතකරය. එහෙත් සීමාව ඉක්මවා ජලය පානය කිරීමක් ශරීරයට අහිතකර වේ. සමහරු විවිධ විශ්වාස අනුව උදය අවදි වූ විගස ජලය වීදුරු හයක් පානය කරති. එය එතරම් යහපත් පුරුද්දක් නොවේ. ශරීරයේ විවිධ කායික තත්වයන් මත මෙයින් අහිතකර ප්‍රතිඵල ලැබිය හැකිය. එනිසා හොඳම පානය වන ජලය පමණ දැන ක්‍රමාණුකූලව පානය කිරීම ශරීර සෞඛ්‍ය රැක ගැනීමට ඇති හොඳම විසඳුමයි.

ක්‍රීඩා කිරීමට පෙර

ශාරීරික ක්‍රියාකාරකම්වල යෙදීමට පැයකට පෙර මිලි ලීටර 500 හා ක්‍රියාකාරකම් අතරතුර සෑම ක්‍රියාශීලී මිනිත්තු 15කට වරක් මිලි ලීටර් 250ක් ක්‍රියාකාරකමට පසු මිලි ලීටර් 250ක් බැගින් පානය කිරීම සුදුසු වේ. ශරීරය වඩාත් ක්‍රියාශීලීව තබා ගැනීමට ඇති හොඳම මාර්ගය වන්නේ නිවසේදී, පාසලේදී, වැඩ කරන ස්ථානයේදී මෙන්ම ගමනක් යන විට මඟ තොටේදී පානය කිරීම සඳහා ජලය බෝතලයක් රැගෙන යාමය. පැණිබීම, රස කරන ලද පාන වර්ග, සීත කරන ලද බීම වර්ග පිපාසිත අවස්ථාවලදී බොහෝ දෙනා පානය කරති.

එහෙත් ඉන් වන්නේ ශරීරයට තවත් විජලනයට පත් වීමය. එබැවින් කුඩා වියේ සිට දරුවාට ජලය බීමට පුරුදු කරන්න. එය කළ හැකි හොඳම මාර්ගය වන්නේ ඔවුනට ආදර්ශයක් වන ආකාරයට අන් අයත් ඉහත අවස්ථාවලදී ජලය පානය කිරීම පුරුද්දක් සේ ඇතිකර ගැනීමයි. සෑම විටම හොඳම පානය පිරිසුදු ජලය පානය බව සිතන්න. ශරීරය මනා ක්‍රියාශීලීව තබා ගැනීමට සමබල ආහාර වේලක් ගැනීම අවශ්‍ය මෙන්ම දවස පුරාම දවසකට පුද්ගලයකුට අවශ්‍ය ජලය ප්‍රමාණය පානය කිරීම ඉතාම වැදගත් වේ. එවිට ශර අභ්‍යන්තරය මෙන්ම බාහිරවත් සෞඛ්‍ය සම්පන්න නිරෝගී බව ලැබෙනු ඇත.

ප්‍රජා වෛද්‍ය විශේෂඥ ශාන්ති ගුණවර්ධන
(සටහන - ශිරානි ගල්ලෑල්ල)