පසුගිය වසරේ සැප්තැම්බර් මස ගෙලවැල ලා මියගිය තම 16 හැවිරිදි පුතාගේ මරණය පිළිබදව විශාල සැකයක් හා ඊට අදාළ සාක්ති ඇති බව එම සිසුවාගේ පියා සහ මව පානඳුර කොට්ඨාස බාර ජ්‍යෙෂ්ඨ පොලිස් අධිකාරී සමන්ත වෙදගේ මහතාට ලිඛිත පැමිණීල්ලක් ඉදිරිපත් කර ඇත. තම පුතාගේ චරිතය කෙලෙසන බවට බියගන්වා කිසියම් පුද්ගලයකු කටයුතු කිරීමෙන් එය දරාගත නොහැකිව පුතාගේ මරණය සිදු වූ බවට පැහැදිලි සාක්කි තිබෙන බව ද මියගිය දරුවාගේ පියා පවසයි. මෙම පුද්ගලයා අනාවරණය කරගෙන ඔහුට එරෙහිව නීතිය ක්‍රියාත්මක කරන ලෙස ඉල්ලා සිටිමින් බණ්ඩාරගම ගුමුව ප්‍රදේශයේ පියකු පානදුර කොට්ඨාස බාර ජ්‍යෙෂ්ඨ පොලිස් අධිකාරි සමන්ත වෙදගේ මහතාට ලිඛිත පැමිණිල්ලක් සිදුකර ඇත. බණ්ඩාරගම ගුමුව ප්‍රදේශයේදී ඉකුත් වසරේ ඔක්තෝබර් 11 වැනිදා නිවස තුළදී ගෙල වැළලාගෙන අශේන් ඉසුරු වික්‍රමාරච්චි නැමැති 16 හැවිරිදි පාසල් සිසුවෙක් මියගියේය.
ඔහුගේ පියා වන මෝලි වික්‍රමාරච්චි මහතා ඒ පිළිබදව පැමිණිලි කර ඇත. ජ්‍යෙෂ්ඨ පොලිස් අධිකාරයාට ලිඛිතව ඉවත් කරන ලද පැමිණිල්ලේ මෙසේද සඳහන් වේ.
මාගේ පුතාගේ මරණයට හේතුව ජංගම දුරකතනයෙන් වීඩියෝ ක්‍රීඩා කර පරාජය දරාගත නොහැකිව යැයි බණ්ඩාරගම පොලිසිය ක්ෂණීකව තීන්දු කළ අතර, විද්‍යුත් මාධ්‍යයේ හා සමාජ මාධ්‍ය ජාලාවල ද ඒ අයුරින් ප්‍රචාරය විය. පුතුගේ මරණය සිදු වූ දා සිට ඔහුගේ ස්මාර්ට් වර්ගයේ දුරකථනය මාස දෙකක පමණ කාලයක් බණ්ඩාරගම පොලීසිය බාරයේ තිබූ අතර පසුව එය මා විසින් ලබාගන්නා ලදී. මීට දින කිහිපයකට ඉහත දී මාගේ ඥාති දියණියක විසින් දුරකතනයේ අභ්‍යන්තර දත්ත පරික්ෂා කිරිමේදී කිසියම් පුද්ගලයකු තරුණියකගේ වෙන්ගෙන පුතා හා මිතුරු වී ඉතා සුක්ෂම ලෙස ඔහුගේ නිරුවත් ඡායාරූපයක් ලබාගෙන අනතුරුව ඔහු කොල්ලෙක් යැයි පවසා පුතුගේ නිරුවත් ඡායාරූපය මුළු ලංකාවෙම ප්‍රසිද්ධ කරන බවට තර්ජනය කරමින්, එසේ නොකිරීමට නම් වරින් වර මුදල් මෙන්ම අන්තර්ජාල කාඩ්පත් ද කුප්පම් වශයෙන් ලබාගෙන තිබූ බව පැහැදිලිව සටහන්ව තිබුණි.
ඉන්ස්ටග්‍රෑම් තාක්ෂණය හරහා මාගේ පුතු හා තරුණියකගේ වෙස්ගෙන සම්බන්ධව තිබූ එම පුද්ගලයා වරින් වර පුතුගේ ජංගම දුරකථනයට යොමු කරන ලද කෙටි පණිවිඩ දෙසීයකට ආසන්න සංඛ්‍යාවක් අන්තර්ගතව තිබිය දී සොයා ගැනීමට හැකිවිය. පුතුගේ ජංගම දුරකථනය තවදුරටත් පරික්ෂා කිරිමේ දී පුතුගේ ක්‍රීඩා ගිණුම්, මුහුණු පොතේ ගිණුම් ආදී සියලු දේ ඇපයට තබාගෙන විවිධ අයුරින් පරුෂ වචන පවා භාවිතා කරමින් එම පුද්ගලයා මගේ පුතු මානසිකව පීඩාවට පත්කර පුතුට සියදිවි නසා ගැනීමට තරම් අන්ත අසරණභාවයට පත්කර ඇති අයුරු එම කෙටි පණිවිඩ සියල්ල හොඳින් පරික්ෂා කිරිමේදී ඔබතුමාට ද අවබෝධ කරගත හැකි වේ යැයි විශ්වාස කරමි. එම පුද්ගලයා මාගේ පුතුගේ ජංගම දුරකථනයට ඉස්ටග්‍රෑම් තාක්ෂණය ඔස්සේ යොමු කරන ලද කෙටි පණිවිඩවල ඡායාරූපවල ඡායාපිටපත් ද ඔබතුමාගේ අවධානය සඳහා මේ සමඟ ඉදිරිපත් කරමි. මාගේ එකම පුතුගේ වියෝව මා මෙන්ම මාගේ බිරිඳටත් මුළු ජීවිත කාලයටම දරාගත නොහැකි වේදනාවකි. අප දෙදෙනා ලබන ඒ වේදනාව තවත් මවුපියවරුනට නොවන්නට, මෙන්ම එවැනි. පාපතරයකු විසින් සිදුකළ වංචනික ක්‍රියාව නැවත වතාවක් තවත් දරුවකුට නොකරන්නට විධිමත් පරික්ෂණයක් පවත්වා නීතිය ක්‍රියාත්මක කරන ලෙසත්, ඉතා බැගෑපත්ව ඉල්ලා සිටිමි යැයි එම ලිපියේ වැඩිදුරටත් සඳහන් වේ.
මෙම පැමිණිල්ල සම්බන්ධයෙන් පානදුර කොට්ඨාස බාර ජ්‍යෙෂ්ඨ පොලිස් අධිකාරී සමන්ත වෙදගේ මහතා මෙසේ පැවසීය.
මියගිය දරුවාගේ පියාගෙන් ලිඛිත පැමිණිල්ලක් ලැබුණා, දරුවා සිය දිවි නසාගන්න තරමට කිසියම් පුද්ගලයකුගෙන් යම් සිදුවීමක් තිබෙන බවට පැහැදිලියි. එම පැමිණිල්ල සම්බන්ධයෙන් විමර්ශන සිදුකිරීම සඳහා විශේෂ පොලිස් කණ්ඩායමකට පවරා තිබෙනවා.
-බිමල් ශ්‍යාමන් ජයසිංහ-
0 Comments