ඉහළ විනිමය අනුපාත පිරිනමන බවට මහජනතාවගෙන් ලැබුණු පැමිණිලි සැලකිල්ලට ගනිමින් ශ්‍රී ලංකා මහ බැංකුවෙහි විදේශ විනිමය දෙපාර්තමේන්තුව විසින් 2022.03.31 දින සිට ප්‍රසන්න මනි එක්ස්චේන්ජ් (පුද්ගලික) සමාගම වෙත ලබාදී තිබූ බලපත්‍රය තාවකාලිකව අත්හිටුවා තිබෙනවා.
මහබැංකුව පවසන්නේ මහජනතාවගෙන් ලැබුණු පැමිණිලි සැලකිල්ලට ගෙන 2022.03.30 වන දින එම සමාගමෙහි ස්ථානීය පරීක්ෂණයක් සිදුකර මෙම තීරණය ගත් බවයි.
අදාළ ස්ථාන පරීක්ෂණයේදී අනාවරණය වී ඇත්තේ බලපත්‍රලාභී බැංකු විසින් ලබා දෙන විනිමය අනුපාතවලට වඩා ඉහළ විනිමය අනුපාත තම ගනුදෙනුකරුවන් වෙත ලබාදී එම සමාගම විදේශ මුදල් මිලදී ගන්නා බවයි.
මේ හේතුව නිසා විදේශ විනිමය පනතෙහි විධිවිධාන යටතේ ප්‍රසන්න මනි එක්ස්චේන්ජ් (පුද්ගලික) සමාගම වෙත ලබාදී තිබූ බලපත්‍රය තාවකාලිකව අත්හිටවූ බව මහබැංකුව නිවේදනය කරනවා.
මෙම බලපත්‍රය අත්හිටුවා ඇති කාලසීමාව තුළ ප්‍රසන්න මනි එක්ස්චේන්ජ් (පුද්ගලික) සමාග‌මට තවදුරටත් බලයලත් මුදල් හුවමාරු කරන්නෙකු ලෙස මුදල් හුවමාරු කිරීමේ කටයුතුවල යෙදීමට අවසර නොමැති බව මහබැංකුව පවසනවා.
එබැවින් එම කාලය තුළ ප්‍රසන්න මනි එක්ස්චේන්ජ් (පුද්ගලික) සමාගම සමඟ කරන ඕනෑම ගනුගෙනුවක් විදේශ විනිමය පනතෙහි ප්‍රතිපාදන උල්ලංඝණය කිරීමක් බවට මහබැංකුව විසින් මහජනතාව දැනුවත් කරනවා.
0 Comments