ජාත්‍යන්තර මූල්‍ය අරමුදලේ නිලධාරීන් සමඟ ජනාධිපති රාජපක්ෂ මහතා කළ සාකච්ඡාවට අනුව, ජනාධිපතිගේ නියෝගයෙන් සහ අග්‍රාමාත්‍ය මහින්ද රාජපක්ෂගෙන් ලැබුණු උපදෙස් අනුව ශ්‍රී ලංකා මහ බැංකුවේ (CBSL) අධිපති අජිත් නිවාඩ් කබ්රාල් ඉක්මනින් ඉල්ලා අස්වනු ඇතැයි අද දින ‘ද මෝර්නින්‘ පුවත්පත් වාර්තාවකින් හෙළි කර තිබේ.
මේ සම්බන්ධයෙන් රහස්‍ය මූලාශ්‍රවලට අනුව, පවතින ආර්ථික අර්බුදයෙන් ගොඩ ඒම සම්බන්ධයෙන් ශ්‍රී ලංකාවට තාක්ෂණික සහය දීර්ඝ කිරීමේදී ජාත්‍යන්තර මූල්‍ය අරමුදල විසින් නියම කරන ලද පළමු කොන්දේසිය ලෙස ශ්‍රී ලංකා මහ බැංකුවේ අධිපති කබ්රාල් මහතාගේ තනතුර වෙන කෙනෙකුට ආදේශ කිරීම ඉල්ලා ඇති බව එහි දැක්වේ.
“ජනාධිපති රාජපක්ෂ මහතා සමඟ කතා කිරීමට ශ්‍රී ලංකාවට පැමිණි ජාත්‍යන්තර මූල්‍ය අරමුදලේ නියෝජිතයා ශ්‍රී ලංකාවට මෙම මූල්‍ය අර්බුදය සමනය කිරීමට උපකාර වන විවිධ ණය ප්‍රතිව්‍යුහගත කිරීම් සහ බැඳුම්කර ආපසු ගෙවීමේ ක්‍රම පිළිබඳව සාකච්ඡා කර ඇති අතර පළමු ප්‍රමුඛතාවය කබ්රාල් ඉල්ලා අස්වීම බව අවධාරණය කළේය. අද (16) පෙරවරුවේ කබ්රාල්ට ඉල්ලා අස්වන ලෙස ජනාධිපතිතුමා දැනුම් දී තිබුණා.” මූලාශ්‍රය පුවත්පතට දන්වා ඇත.
කෙසේ වෙතත්, පසුව කබ්රාල් අග්‍රාමාත්‍ය මහින්ද රාජපක්ෂ මහතාට කතා කර ඔහු ඉවත් කිරීම ව්‍යවස්ථා විරෝධී බව පැහැදිලි කර ඇති බවක්ද ඊයේ (16) එම මූලාශ්‍රය සඳහන් කර තිබේ. පසුව අග්‍රාමාත්‍යවරයා කබ්රාල්ගෙන් “නිහඬව” ඉල්ලා අස්වන ලෙස ඉල්ලා සිටි බවද එම මූලාශ්‍රය වැඩිදුරටත් අනාවරණය කළේය.
අගමැති රාජපක්ෂ මහතා කබ්රාල් මහතාට පවසා ඇත්තේ තවදුරටත් ප්‍රමාද නොකර නිහඬව තම තනතුරෙන් ඉවත් වීම වඩා හොඳ බවයි.
මීට අමතරව, මූලාශ්‍රය සඳහන් කර ඇත්තේ වත්මන් භාණ්ඩාගාර හා මුදල් අමාත්‍යාංශයේ ලේකම් එස්.ආර්. ආටිගල මහතා කබ්රාල්ගෙන් හිස්වන මහ බැංකු අධිපති පුටුව භාර ගැනීමට නියමිත බවයි.
කබ්රාල් මීට පෙර විදේශ මාධ්‍ය වෙත ප්‍රකාශ කර තිබුණේ ශ්‍රී ලංකාවට IMF වෙතින් ආර්ථික ජීවන මාර්ගයක් අවශ්‍ය නොවන බවත්, “අපගේ ණය හිමියන්ට කිසිදු වේදනාවක් ඇති නොකර” එහි හිඟ ණය, විශේෂයෙන් ජාත්‍යන්තර ස්වෛරීත්ව බැඳුම්කර සඳහා මුදල් යෙදවීමට රටට හැකි බවය.
ශ්‍රී ලංකාව ජාත්‍යන්තර මූල්‍ය අරමුදලේ සහය ලබා ගැනීමට අවශ්‍ය නම්, එම අරමුදලට ශ්‍රී ලංකා රුපියල අවප්‍රමාණය කිරීමට, පොලී අනුපාත වැඩි කිරීමට, රාජ්‍ය සේවක සංඛ්‍යාව කපා හැරීමට, විශ්‍රාම වැටුප් යෝජනා ක්‍රම කපා හැරීමට සහ රාජ්‍ය විකිණීමට රජයට අවශ්‍ය විය හැකි බව ඔහු මාධ්‍ය වෙත පවසා තිබුණි.
කබ්රාල් මහතා මහ බැංකු අධිපති පුටුව මින් ඉහත භාරගත්තේ සිය පාර්ලිමේන්තු මන්ත්‍රී හා ඇමති ධූර වලින් ඉවත්වෙමිනි.
(ද මෝර්නින් ඇසුරිනි)
0 Comments