එළඹෙන ජූලි- අගෝස්තු මසදී පැවැත්වීමට නියමිතව තිබූ පාකිස්තාන ක්‍රිකට් කණ්ඩායමේ ශ්‍රී ලංකා තරග සංචාරය අවලංගු කර ඇත. මේ වන විට රටේ පවතින ආර්ථික හා දේශපාලනික අර්බුදය මත ශ්‍රී ලංකා ක්‍රිකට් ආයතනයෙන් සිදුකළ ඉල්ලීමක් මත මෙම පියවර ගෙන තිබේ.
මෙම තරගාවලිය ටෙස්ට් තරග දෙකකින් හා එක්දින තරග තුනකින් සමන්විත විය. මෙහි ටෙස්ට් තරගාවලිය ලෝක ටෙස්ට් ලෝක ශූරතාවලිය යටතේ පැවැත්වීමට නියමිතව තිබිණි. මේ අතර එළඹෙන ජූනි මසදී ආරම්භ වීමට නියමිතව තිබූ ඔස්ට්‍රේලියානු කණ්ඩායමේ ශ්‍රී ලංකා තරග සංචාරය පැවැත්වීම පිළිබඳ තවමත් ඔස්ට්‍රේලියානු ක්‍රිකට් ආයතනය බලාපොරොත්තුවෙන් පසුවන බව විදෙස් වෙබ් අඩවි වාර්තා කරයි.
ඔවුන් වැඩිදුරටත් පවසන්නේ, ශ්‍රී ලංකාවේ වත්මන් දේශපාලනික හා ආර්ථික අර්බුදය පිළිබඳ ඔස්ට්‍රේලියානු ක්‍රිකට් ආයතනය විමසිල්ලෙන් පසු වුවද තරගාවලිය අවලංගු කිරීමේ තීරණයක් තවමත් ගෙන නොමැති බවයි. විස්සයි20 තරග තුනකින්, එක්දින තරග 05කින් හා ටෙස්ට් තරග 02කින් සමන්විත ඔස්ට්‍රේලියානු කණ්ඩායමේ ශ්‍රී ලංකා තරග සංචාරය එළඹෙන ජූනි 07වැනිදා සිට ජූලි 12වැනිදා දක්වා පැවැත්වේ.
ඕෂිත වරකපිටිය
0 Comments