මහම්මත්තුමාට අපහාස කිරීම් සිදුවීම මුල්කොට ගනිමින්, ඉන්දියාවේ දිල්ලි සහ මුම්බායි නගරවලටත්, ගුජරාට සහ උත්තර ප්‍රදේශ ප්‍රාන්තයේ නගරවලටත් මරාගෙන මැරෙන බෝම්බ ප්‍රහාර එල්ල කරන බවට අල් කයිඩා ත්‍රස්ත සංවිධානය අනතුරු අගවා තිබේ. මෙම අනතුරු ඇඟවීම කර ඇත්තේ අල් කයිඩා සංවිධානයට අයත් ආසියානු උප මහද්වීපයේ ක්‍රියාත්මක සාමාජිකයන් බව ද පැවැසෙයි.
මහම්මත්තුමාට අපහාස කිරිමේ සිදුවීම සම්බන්ධයෙන් මේ වනවිට ගල්ෆ් කලාපීය මුස්ලිම් රටවලින් ද ඉන්දීය රජයට දැඩි විරෝධයක් එල්ල වී තිබේ. සෞදිය, කටාර් රාජ්‍යය, එක්සත් අරාබි එමිරේට්ස් රාජ්‍යය සහ ඉරානය ද ඒ අතර සිටී.
මහමත්තුමාට අපහාස වන අයුරින් අදහස් ප්‍රකාශ කළේ ඉන්දීය අග්‍රාමාත්‍ය නරේන්ද්‍ර මෝදිගේ භාරතීය ජනතා පක්ෂයේ සාමාජිකයන් දෙදෙනෙකි. ඒ රුපවාහිනී වැඩසටහනක් අතරතුරේය. එසේ අදහස් ප්‍රකාශ කළේ භාරතීය ජනතා පක්ෂයේ ජාතික මාධ්‍ය ප්‍රකාශිකා නුපූර් ෂර්මා සහ පක්ෂයේ දිල්ලි ප්‍රාන්ත මාධ්‍ය කටයුතු සම්බන්ධ ප්‍රධානී නවීන් කුමාර්ය. එල්ල වූ දැඩි විරෝධය හේතුවෙන් මොවුන් දෙදෙනාම, මොවුන්ගේ තනතුරුවලින් ඉවත් කිරිමට භාරතීය ජනතා පක්ෂ කෘත්‍යධිකාරී මණ්ඩලය පියවර ගෙන තිබේ.
එසේ වුවත්, ගල්ෆ් රටවලින් සහ එම රටවල මුස්ලිම් වැසියන්ගෙන් ඉන්දියාවටත්, ඉන්දීය අග්‍රාමාත්‍ය නරේන්ද්‍ර මෝදිටත් දෝෂාරෝපණ එල්ල වී ඇත. අල් කයිඩා සාමාජිකයන් කළ අනතුරු ඇඟවීමත් සමග දිල්ලි, මුම්බායි ඇතුළු ඉන්දියාන්වේ ප්‍රධාන නගරවල ආරක්ෂාව තවත් දැඩි කිරීමට පියවර ගන්නා බව ඉන්දීය ආරක්ෂක අංශ පවසා ඇත.
0 Comments