ප්‍රවීණ රංගන ශිල්පිනී සුමනා අමරසිංහ අභාවප්‍රාප්ත වූවාය. මියයන විට 74 වැනි වියෙහි පසුවූවාය. චිත්‍රපට 86 ක පමණ රංගනයෙන්ද චිත්‍රපට 6 කට නිෂ්පාදනයෙන්ද දායකවූ සුමනා සිනමාවට කළ දායකත්වය වෙනුවෙන් ඕසිඅයිසී හා සුමති සම්මාන පිදුම් ලබා ඇත.
සුමනා 1948 පෙබරවාරි 21 වන දින මහනුවර කටුගස්තොට ප්‍රදේශයේ සහෝදර සහෝදරියන් හය දෙනෙකුගෙන් යුත් පවුලක දෙවන දරුවා ලෙස උපත ලැබුවාය. ඇයට එක් සහෝදරියක් සහ සහෝදරයන් හතර දෙනෙක් සිටී.ඇගේ පියා වැඩ කළේ දේශීය ආදායම් දෙපාර්තමේන්තුවේය. මේ නිසා ඇගේ පවුල ගල්කිස්සේ නිවසකට මාරුවිය. ඇය ගල්කිස්ස බෞද්ධ බාලිකා විද්‍යාලයටත් පසුව කළුබෝවිල බුද්ධඝෝෂ මහා විද්‍යාලයටත් අධ්‍යාපනය හැදෑරීමට යොමු විය.
කීර්තිමත් නළුවෙකු සහ අධ්‍යක්ෂවරයකු ද වූ රෝයි ද සිල්වා සමඟ ඇය විවාහ විය. රෝයි ඇයට මුණගැසෙන්නේ 1969 හතර පෙරළිය චිත්‍රපටයේදීය. විවාහ උත්සවය 1975 සිදුවිය. මීට වසර 4 කට පෙර රෝයි 2018 ජුනි 30 වැනි දින ශ්‍රී ජයවර්ධනපුර මහ රෝහලේ හෘදයාබාධයකට ප්‍රතිකාර ලබමින් සිටියදී මිය ගියේය.
ඇය සිනමාවට සම්බන්ධවූයේ පාසල් වියේදී "ලස්සන මුහුණ" රූ රැජින තරගයට ඉදිරිපත් වී කිරුළ දිනාගැනීමෙන් පසුවය. ඉන්පසුව ඇය L.M පෙරේරා අධ්‍යක්ෂණය කළ හතර පෙරළිය චිත්‍රපටයේ රඟපෑවාය. ඇයගේ මංගල සිනමා අත්දැකීම 1967 දී රුබී ද මෙල් විසින් අධ්‍යක්ෂණය කරන ලද පිපෙන කුමුදු ය. රූබි ද මෙල් හිතවතෙකු නිසා ඇගේ පියා සුමනාට ඒ චිත්‍රපටිය සඳහා පමණක් යාමට අවසර දුන්නේය. කෙසේ වෙතත්, ඇය තම පියාට බොරු කියා පසුව රෑන ගිරව්, දහසක් සිතුවිලි, සමනල කුමරියෝ සහ හතර පෙරළිය වැනි තවත් චිත්‍රපට රාශියක් රඟපෑ බව පවසා තිබේ.
රංගනයට අමතරව ඇය රූපලාවන්‍ය ක්ෂේත්‍රයට සම්බන්ධ වූ අතර එහිදී ඇය 1980 දී ඉන්දියාව, සිංගප්පූරුව, කැනඩාව යන රටවල රූපලාවන්‍ය පාඨමාලා හැදෑරුවාය. ඇයගේ ප්‍රථම ප්‍රධාන චරිතය 1975 වසරේ තිරගත වූ ‘සූකිරි කෙල්ල‘ චිත්‍රපටිය හරහා සිදු වූ අතර, එය ඇයට "සිංහල සිනමාවේ සූකිරි කෙල්ල" යන අන්වර්ථ නාමය ලබාදී තිබුණි.
ඇය සිය සැමියා රෝයි සමඟින් චිත්‍රපට කිහිපයක රඟපෑ අතර එය සිංහල සිනමාවේ සංස්කෘතියක් බවට පත් විය. ඉන්පසුව ඇය තිස්ස විජේසුරේන්ද්‍ර සමඟ සුදු පරවියෝ සහ සිතක සුවඳ ඇතුළු ජනප්‍රිය චිත්‍රපට රැසකට සම්බන්ධ වූවාය. 1982 දී ඇය කඩවුනු පොරොන්දුව ප්‍රතිනිර්මාණයේ රඟපෑවාය, එහිදී ඇය කලින් රුක්මණී දේවි විසින් රඟපෑ චරිතය රඟපෑවාය. ඇය නාට්‍යමය චරිතවලින් සිනමා ජීවිතය ආරම්භ කළද, පසුකාලීනව විශේෂයෙන්ම සැමියා විසින් අධ්‍යක්ෂණය කරන ලද චිත්‍රපට හරහා ඇය විකට චරිතවලට යොමු වූවාය. ඇයගේ ජනප්‍රිය චිත්‍රපට සමහරක් නම් බිනරමලී, සුනේත්‍රා, ජොන්සන් සහ ගොන්සන් සහ රෑ ඩැනියෙල් දවල් මිගෙල් ත්‍රිත්වයයි.
0 Comments