ඉන්දියාවේ හමුදා බඳවා ගැනීම් ක්‍රමය වෙනස් කළැයි කුපිතවූ තරුණයින් කෝච්චි වලට ගිනි තියලා

ඉන්දියාවේ හමුදාවට පිරිස් බඳවා ගැනීමේ නව සැලැස්මකට එරෙහිව ඇරඹී තිබෙන අතිශය ප්‍රචණ්ඩ විරෝධතා නිසා දුම්රිය ඇතුළු පොදු දේපළ අලාබහානි සිදුවෙමින් පවති අතර පුද්ගලයෙකු මිය ගොස් තවත් 13 දෙනෙකු තුවාල ලබා තිබේ.
සිකුරාදා දකුණු දිග තෙලන්ගානා ප්‍රාන්තයේ සෙකන්දරාබාද් නගරයේ පොලිසිය සහ විරෝධතාකරුවන් ගැටුමකදී එම මරණය සිදුවිය.

වසර හතරක ස්ථාවර කාලයක් සඳහා සොල්දාදුවන් බඳවා ගැනීමේ සැලැස්මට එරෙහිව ප්‍රාන්ත කිහිපයක් විශාල විරෝධතා මතුව තිබේ.

විරෝධතාකරුවන් පවසන්නේ තාවකාලික සොල්දාදුවන් බඳවා ගැනීමේ ආණ්ඩුවේ සැලැස්ම ස්ථාවර වැටුප් හා විශ්‍රාම වැටුප් සහතික කරන ස්ථීර හමුදා රැකියා ලබා ගැනීමේ අවස්ථාව අඩු කරන බවයි.

ඉන්දියාවේ කුඩා නගරවල සහ ගම්වල සිටින තරුණයින් වසර ගණනාවක් තිස්සේ සන්නද්ධ හමුදාවන්හි සොල්දාදුවන් වීමට සූදානම් වන්නේ රැකියාව කීර්තියක්, නිත්‍ය ආදායමක් සහ සමහරුන්ට දරිද්‍රතාවයෙන් මිදීමට මගක් ගෙන එන බැවිනි.

බිහාර්, තෙලන්ගානා, උත්තර් ප්‍රදේශ් සහ බටහිර බෙංගාල ප්‍රාන්ත ඇතුළු ප්‍රාන්ත කිහිපයක බොහෝ දෙනෙක් මෙම සැලසුමට විරෝධය පළ කරමින් වීදි බැස සිටිති.

විරෝධතාකරුවන් බිහාර් සහ තෙලන්ගානා ප්‍රාන්තවල බස් රථ සහ දුම්රිය මැදිරිවලට ගිනි තබා ඇත. ඇතැම් ස්ථානවලදී ඔවුන් පොලිසිය අධික ලෙස බලය යොදවන බවට චෝදනා කර ඇත.

නව අග්නිපත් යෝජනා ක්‍රමය වයස අවුරුදු 17.5 සහ 21 අතර පුද්ගලයින් ඉලක්ක කර ගෙන ඇත. සාර්ථක අපේක්ෂකයින් වසර හතරක් සඳහා සන්නද්ධ සේවාවන්ට බඳවා ගන්නා බවත්, ඉන් පසුව ඔවුන්ගෙන් 25% ක් පමණක් රඳවා තබා ගන්නා බවත් එහි සඳහන් වේ.
සොල්දාදුවන් මාස හයක පුහුණුවක් ලබන අතර පසුව වසර තුනහමාරක් සේවයේ යොදවනු ඇත. මෙම කාලසීමාව තුළ ඔවුන්ට ඉන්දීය රුපියල් 30,000 ක මාසික ආරම්භක වැටුපක් (ශ්‍රීල.රු 140000) ලැබෙනු ඇති අතර අමතර ප්‍රතිලාභ ද වසර හතරක සේවය අවසන් වන විට වැටුප් වර්ධකද ලැබෙනු ඇත.

නව ප්‍රතිසංස්කරණ නිවේදනයේ අරමුණ වන්නේ හමුදාවේ අයවැයෙන් අඩකට වඩා පරිභෝජනය කරන වැටුප් සහ විශ්‍රාම වැටුප් සඳහා වන හමුදාවේ වියදම් කපා හැරීමය.

මෙම යෝජනා ක්‍රමයට එරෙහි විරෝධතා සතිය මුලදී උත්තර් ප්‍රදේශ් සහ බිහාර් යන උතුරු ප්‍රාන්තවල ආරම්භ විය. නමුත් ඒවා මේ වන විට වෙනත් ප්‍රාන්ත කිහිපයකට ව්‍යාප්ත වී ඇත.

තෙලන්ගානා ප්‍රාන්තයේ සෙකන්දරාබාද් නගරයේ තරුණ යන් සිය ගණනක් දුම්රිය ස්ථානයකට ඇතුළු වූ අතර ඔවුන්ගෙන් සමහරුන් සාප්පු ගිනි තබා ඇති බව වාර්තා වේ. විරෝධතාකරුවන්  2000 ක් පමණ දුම්රිය ස්ථානයට පැමිණ  දුම්රිය මාර්ගය අවහිර කරමින් විරෝධතාවයේ නිරත වූ අතර පැය ගණනාවක් දුම්රිය ගමනාගමනය නවතා දැමීය.

විරෝධතාකරුවන් සන්සුන් කිරීමේ උත්සාහයක් ලෙස, ෆෙඩරල් ආන්ඩුව බ්‍රහස්පතින්දා රාත්‍රියේ ප්‍රකාශ කළේ වයස අවුරුදු 23 දක්වා අපේක්ෂකයින්ට පළමු වසර තුළ යෝජනා ක්‍රමය යටතේ අයදුම් කළ හැකි බවයි.

මෙම යෝජනා ක්‍රමයේ විවේචකයින් පවසන්නේ එය සන්නද්ධ හමුදාවන් දුර්වල කරන්නක් වන බවත් රටේ විරැකියා අනුපාත වැඩි කරන්නක් බවයි.
 (බීබීසී ඇසුරිනි - Gossiplankanews.com)