මාධ්‍ය රාජකාරියේ ලේ, වේදනාව සහ පොලිස් කෲරත්වය

ජුලි 9 වැනි දින විරෝධතාකරුවන් ජනාධිපති මන්දිරයට කඩා වැදුණු කලහකාරී දිනයේ කථානායකවරයා සවස ප්‍රකාශ කළේ දින 4 කින් ගෝඨාභය රාජපක්ෂ ඉල්ලා අස්වන බවයි.
විරෝධතාකරුවන් දස දහස් ගණනක් ජනාධිපති මන්දිරයට සහ ජනාධිපති ලේකම් කාර්යාලයට කඩා වැදී පසුගිය මාස කිහිපය තුළ කිසිදා නොදුටු මහජන අතෘප්තියේ උච්චතම අවස්ථාව එදා එළැඹිනි.
 එම ඓතිහාසික දිනයේ රාත්‍රී 7 ට පමණ අග්‍රාමාත්‍යවරයාගේ නිවස අසල නොසන්සුන්කාරී තත්ත්වයක් ඇති වීමත් සමඟ උදෑසන සිට පැවති සාමකාමී විරෝධතාව තර්ජනයට ලක් විය.

සිරස ටීවී නිවුස් ෆස්ට් මාධ්‍යවේදීන් හතර දෙනෙකුට වික්‍රමසිංහ මහතාගේ පෞද්ගලික නිවස ආසන්නයේ පොලිසියේ සහ විශේෂ කාර්ය බළකායේ නිලධාරීන් පිරිසක් එක්ව අශෝභන ලෙස පහරදීම මාධ්‍ය නිදහස දැඩි තර්ජනයක් එල්ල කළ සිදුවීමකි.

සිද්ධිය වාර්තා කරමින් සිටියදී සරසි පීරිස්, වරුණ සම්පත්, යූ ඩී සින්තුජන්, ජනිත මෙන්ඩිස් යන මාධ්‍යවේදීන් සහ ඔවුන් බේරා ගැනීමට ගිය මාධ්‍යවේදීන් දෙදෙනකු වන කාලිමුත්තු චන්ද්‍රන් සහ චානුක වීරකෝන් ආරක්ෂක නිලධාරීන්ගේ අමානුෂික පහරදීමෙන් රෝහල් ගත කෙරිණි.

කොළඹ ජාතික රෝහලේ තුවාල ලැබූ මාධ්‍යවේදීන් සිදුවූයේ කුමක්ද යන්න අනාවරණය කර තිබේ.
සරසි පීරිස් අදහස් දක්වමින් කියා සිටියේ කොළඹ කොටුවෙ උද්ඝෝෂණ ඇය උදෑසන සිට ආවරණය කරමින් සිටි බවයි. ඇයගේ ජංගම දුරකථනයේ බැටරිය අඩුවීම නිසා සවස 4 ට පමණ ඇය නැවත කාර්යාලයට පැමිණ ඇත. ඇයට දිවා ආහාරය ගැනීමටද අවශ්‍ය වී තිබුණි. ඉන් අනතුරුව නැවතත් වරුණ සම්පත් සමඟ ඇය ප්‍රවෘත්ති මැදිරියේ බලධාරීන්ගේ ඉල්ලීම පරිදි විරෝධතාකරුවන්ට කඳුළු ගෑස් ප්‍රහාර එල්ල කරන ආරංචිය සමඟ ආවරණය පිණිස අගමැති නිවසට දිව ගොස් තිබේ.

“වරුණ කැමරාව උස්සගෙන යද්දී මම මයික් අතින් අරන් ඇවිදගෙන ගියා. අප එම ස්ථානයට ළඟා වන විට පොලිස් විශේෂ කාර්ය බළකාය බැටන් පොලුවලින් සිවිල් වැසියන් ලුහුබඳිමින් සිටියා. තුවක්කුවක් පත්තු වෙනවා මම දැක්කා. ඒවා රබර් උණ්ඩ ද යන්න මට විශ්වාස නැහැ, නමුත් මම තුවක්කුවෙන් ගිනි පුපුරක් දුටුවා. ඒ මොහොතේ මම කාර්යාලයට ඇමතුමක්දී කියා සිටියේ නොසන්සුන්කාරී තත්වයක් දිග හැරෙමින් පවතින බවටයි. ඉන්පසුව අපි රෙකෝඩරය ක්‍රියාත්මක කරවන්න ගස් වලින් වට වූ මුල්ලකට ගමන් කළා. ආරක්ෂක නිලධාරීන් සිවිල් වැසියන් පසුපස හඹා ගියා. පසුව ඔවුන් අප දෙසට පැමිණියා. ඔවුන් අපට කෑගසමින් පැවසුවේ “ඔබට අවශ්‍ය දේ ඔබ කර ගත්තා, එබැවින් යන්න. ඔබලාගේ මාධ්‍ය අපට අපේ රස්සාව කරන්න දෙන්නේ නැහැ” ලෙසයි. එවිට වරුණ පිළිතුරු දුන්නේ අපි ජනතාවට යුතුකම ඉටු කරනවා කියායි.
ඒ වන විටත් ආරක්ෂක නිලධාරීන් වරුණ වටකර පහර දෙන්නට පටන් ගත්තා. ඔහු බිම වැටී සිය කැමරාව භාවිතයෙන් ප්‍රහාරවලින් ආරක්ෂා වීමට උපරිම උත්සාහයක් ගත්තා. ඔවුන් අපට වෙඩි තබනු ඇතැයි මම සැබවින්ම විශ්වාස කළා, එබැවින් මම අපගේ වාහනය දෙසට දිව ගියා.

නමුත් මට හදිසියේම ප්‍රහාරයක් එල්ල වුණා. නිලධාරීන් තුන් හතර දෙනෙක් පමණ මට පහර දුන් වෙලාවේ මම වැටුණා. මට පහර නොදෙන ලෙස මම ඔවුන්ගෙන් අයැද සිටියත් ඔවුන් ගණන් ගත්තේ නැහැ, ”ඇය සුසුමක් හෙළුවාය. සරසිගේ හිසට බරපතළ තුවාල සිදුවී ඇති අතර, නිල් පැහැති තැලීම් සිරුරේ කැන තැන පෙන්නුම් කරයි. පහර දෙන අවස්ථාවේ ජනිත මුලදී තම පිරිස වටා සිටි නමුත් අනෙක් මාධ්‍යවේදීන් දෙදෙනා තමා සමඟ රැගෙන යා යුතු බව පවසමින් ජනිත ආරක්ෂක නිලධාරීන්ට කෑගසනු ඇසුණ බවත් ඉන්පසු දේ නෙදුටු බවත් සරසි පැවසුවාය.

සිද්ධිය විස්තර කරමින් වරුණ සම්පත් කියා සිටියේ ඔවුන් ගමනාන්තයට ළඟා වන විට ආරක්ෂක නිලධාරීන් සිවිල් වැසියන් ලුහුබඳින බව ඔවුන්ට හැඟුණු බවයි. “මම ඇවිදගෙන ගියේ සජීවී පටිගත කිරීමක් සමඟයි. ටික වේලාවකට පසු, ආරක්ෂක නිලධාරීන් අපට මුහුණට ආවා, අපි අපගේ රාජකාරිය පමණක් කරන බව මම පැහැදිලි කළා. ජ්‍යෙෂ්ඨ පොලිස් අධිකාරිවරයෙක්ද සිටියා. මම මගේ හැඳුනුම්පත ඔහුට පෙන්වූ නමුත් ඔහු හැරී  ගොස් තත්පර කිහිපයකින් ආරක්‍ෂක නිලධාරීන් මාව වටකරගෙන පහර දුන්නා. මගේ හිසට දරුණු ලෙස පහර වැදුණා. එය දරාගත නොහැකි වුණා. මම කැමරාව භාවිතයෙන් මගේ හිස වසා ගැනීමට උත්සාහ කළා. එවිට එක් එස්ටීඑෆ් නිලධාරියෙක් මා ඇදගෙන ගොස් මට දුවන්න යැයි කී නමුත් ඔවුන් මගේ කකුල්වලට පහර දුන්නා. කොහොම හරි මම දුවගෙන ඇවිත් ඒ අසල තිබූ බස් හෝල්ට් එකක් දෙසට ගියා. ඒ වෙලාවේ ඇතැම් විරෝධතාකරුවන් මට උදව් කරා.
මාධ්‍ය කණ්ඩායම් කළමණාකරු ජනිත මෙන්ඩිස් කියා සිටියේ අග්‍රාමාත්‍යවරයාගේ නිවස අසල විරෝධතාකරුවන්ට කඳුළු ගෑස් ප්‍රහාර එල්ල කළ බවට පණිවිඩය ලැබෙන විට තමන් ජනාධිපති ලේකම් කාර්යාලයේ සිටි බවයි. ආරක්ෂක නිලධාරීන් මට ඇතුළට යන්න අවසර දුන්නා. මම දැක්කා වරුණයි සරසියි ආරක්ෂක නිලධාරීන් එක්ක රණ්ඩු වෙනවා. අපට සත්‍යය වාර්තා කිරීමට අවශ්‍ය නිසා මම ඇතුළට යන අතරතුර සජීවී දැක්ම ක්‍රියාත්මක කළා. මම ඇතුලට යනකොටම ආරක්ෂක නිලධාරියෙක් මට කෑගහන්න පටන් ගත්තා, "ඔයාට ඕන දේ ලැබුනා, දැන් යන්න කියලා. ඒ වෙලාවේ මට නිලධාරියෙක් පහර දුන්නා
ඔවුන් මට පහර දෙන්නේ මන්දැයි මම ඇසූ විට උත්තර දුන්නෙ නැහැ. පලිහවලින් මාව තල්ලු කළා. ඔවුන් මට පහර දෙන විට සිදුවන දේ මම වීඩියෝ කරමින් සිටියා, මට සෑම පැත්තකින්ම පහර වැදුණා. මම හැරෙන විට සරසිට ආරක්ෂක නිලධාරීන් තුන් හතර දෙනෙකුගෙන් පහර දෙද්දි ඇය අනුකම්පාව ඉල්ලා කෑගසමින් සිටියා. සමහර සිවිල් වැසියන් මට පැන යාමට උදව් කළා, මම සරසි වෙත ළඟා වන විට ඇගේ හිසෙන් අධික ලෙස ලේ ගලමින් තිබුණා, ”ඔහු වැඩිදුරටත් පැවසීය.

ජනිත, සරසිගේ තුවාල වූ හිස මතට ලේ ගලමින් සිටියදී ඔහු විසින් යොමු කළ ලේන්සුවද පෙන්වා සිටියේය.
තුවාල ලැබූ මාධ්‍යවේදීන්ට සහය වීමට සහ මාධ්‍යවේදීන්ට සිදුවූ දේ වාර්තා කිරීමට ගිය news 1st ප්‍රවෘත්ති කර්තෘ චානුක වීරකෝන් මහතාටද ප්‍රහාරයක් එල්ල විය.

“අපි News 1st ලාංඡනය සම්පූර්ණයෙන්ම ඇලවූ වාහනයක ගොස් නිල News 1st T-shirt එක පැළඳ සිටියේ. අපි වාහනයෙන් බැස සිද්ධිය සිදුවන දෙසට ගමන් කළා. එතකොට සිවිල් වැසියෙක් ඉස්සරහට ඇවිත් ආරක්ෂක නිලධාරීන්ට කිව්වා අපි මාධ්‍යවලින් අපට ගහන්න එපා කියලා. කෙසේ වෙතත්, ඒ මොහොතේම මා ඉදිරිපිට කඳුළු ගෑස් ප්‍රහාරයක් එල්ල වුණා. මම ටිකක් පස්සට වෙලා ආයෙත් ඇහුවා අපිට ගහන්න එපා කියලා මොකද අපි ආවේ අපේ සහෝදර මාධ්‍යවේදීන්ව ආපහු ගන්න. ඊට පස්සේ ආයෙත් කඳුළු ගෑස් ගැහුවා. ටික වෙලාවකින් පොලිස් නිලධාරියෙක් බැටන් පොල්ලක් අරගෙන මගේ පැත්තට දුවගෙන ආවා, මම මීටර් 500ක් විතර ආපහු දුවගෙන ආවා. සිවිල් වැසියෙකුට පහර දෙන බව දැනගත් විට මම ආපසු හැරුණා. එවිට ඉහත කී පොලිස් නිලධාරියා මට පහර දුන්නා. පොලිස් නිලධාරීන් දෙතුන් දෙනෙක් හෝ එස්ටීඑෆ් මාව එදා අල්ලා ගත්තා, මට අමානුෂික ලෙස පහර දුන්නා. ඔවුන් පහර දෙන අතරතුර තවත් කඳුළු ගෑස් ප්‍රහාරයක් එල්ල වුණා. මගේ මුහුණ සෝදා ගැනීමට අසල ටැප් එකක් සොයා ගැනීමට යන්තම් සමත් වූණා, අපගේ සගයන් මාව රෝහලට ගෙන ගියා, ”ඔහු පැවසීය.

එහිදී තමන්ට දැඩි ලෙස පහර දී හිසට, බෙල්ලට සහ පිටට තුවාල සිදුවී ඇති බව චානුක පැවසීය. තුවාලවලින් සුවය ලැබීමට බෙල්ලේ කරපටියක් අවශ්‍ය වූ බවද ඔහු වැඩිදුරටත් පැවසීය.

සිද්ධිය සම්බන්ධයෙන් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මෙසේ කියා තිබේ.“අපි මාධ්‍ය ආයතනයෙන් විවෘතව සමාව අයැද සිටිනවා. පරීක්ෂණවලින් පසු අවශ්‍ය නීතිමය ක්‍රියාමාර්ග ගන්නා බවට සහතික වුණා. මේ සම්බන්ධයෙන් පරීක්ෂණයක් පවත්වන ලෙස පොලිස්පතිවරයා එදිනම විශේෂ විමර්ශන ඒකකයෙන් ඉල්ලා සිටියා. ඒ අනුව පරීක්‍ෂණ පැවැත්වෙනවා,හඳුනාගත් නිලධාරීන් ඔවුන්ට පැවරී ඇති රාජකාරිවලින් තාවකාලිකව ඉවත් කර තිබෙනවා” ඔහු පැවසීය.
ප්‍රහාර සම්බන්ධයෙන් වහාම ක්‍රියාත්මක වන පරිදි ජ්‍යෙෂ්ඨ පොලිස් අධිකාරී ආර්.ඒ ලියනගේගේ වැඩ තහනම් කර ඇත.

(ඩේලි මිරර් ජූලි 16  - දිනුලි ෆ්‍රැන්සිස්කෝ තැබූ සටහන ඇසුරිනි)