බලංගොඩ නගර සභාවේ මන්ත්‍රීවරයකු ලෙස කටයුතු කරන හිටපු සභාපති වරයකු වන නිමල් ගාමිණී වීරසිංහ මහතා (ශ්‍රී ලංකා නිදහස් පක්ෂය) ඊයේ (13) පැවැති මාසික සභා රැස්වීමට රම්බෝ වර්ගයේ උල් පිහියක් රැගෙන ප්‍රදර්ශනය කිරීමෙන් සභාවේ නොසන්සුතාවක් ඇති විය. බලංගොඩ නගර සභාවේ සැප්තැම්බර් මාසයට නියමිත මාසික සභා රැස්වීම බලංගොඩ නගර සභාවේ සභාපති වසන්ත කුමාර ගුණරත්න මහතාගේ (ශ්‍රී ලංකා පොදු ජන පෙරමුණ) ප්‍රධානත්වයෙන් ඊයේ එම සභා ශ්‍රවණාගාරයේදී පැවැත්විණි.
එම රැස්වීමට සහභාගී වූ බලංගොඩ නගර සභාවේ මන්ත්‍රී නිමල් ගාමිණී වීරසිංහ මහතා (ශ්‍රී ලංකා නිදහස් පක්ෂය) ටික වෙලාවක් සභාවේ රැඳී සිට පිටව යනවාත් සමගම තම සරමට යටින් කකුලේ ගැට ගසා තිබුණු උල් පිහිය සභාවට ප්‍රදර්ශනය කළේය. එම අවස්ථාවේ වෙනත් මන්ත්‍රීවරයෙකු එම පිහිය ඔහුගෙන් ඉල්ලා ගෙන ඔහු සන්සුන් කළේය. ඔහු සභාවෙන් පිටව ගිය පසු අදහස් දැක්වූ බලංගොඩ නාගරික මන්ත්‍රීනි සුනේත්‍රා ඩී. වීරසිංහ මහත්මිය (එක්සත් ජාතික පක්ෂය) මෙවැනි ජ්‍යෙෂ්ඨ මන්ත්‍රීවරුන් සභාවට අවි ආයුධ රැගෙන ඒම තම ජීවිත වලට මහත් තර්ජනක් බව සඳහන් කළාය.
මන්ත්‍රීවරුන් මෙලෙස අවි ආයුධ රැගෙන ඒම විශාල වශයෙන් තම ජීවිත වලට තර්ජනයක් බව ඇය වැඩිදුරටත් සඳහන් කළාය.
තව දුරටත් කරුණු දැක්වූ මන්ත්‍රීවරිය කියා සිටියේ මෙම සභාවේ මන්ත්‍රීවරියන් සිවු දෙනකු සිටින නිසා සභාපතිවරයා මේ පිළිබඳ සැලකිලිමත් විය යුතු බවයි. මේ පිළිබඳව අදහස් දැක්වූ බලංගොඩ නාගරික මන්ත්‍රීනි එම්. චන්ද්‍රලතා මහත්මිය (ශ්‍රී ලංකා පොදු ජන පෙරමුණ) මෙසේ කීවාය. අවි ආයුධ ගෙන විත් සභිකයන් බිය වැද්දීම තරයේ හෙළා දකිනවා. සභාවේ නිදහසේ අදහස් ප්‍රකාශ කිරීමට මන්ත්‍රීවරුන්ට අයිතිය තිබිය යුතුයි.
-වයි.ඒ.එස්. වීරවංශ -
0 Comments