රාජ්‍ය ආයතනවල රැස්වීම් සහ උත්සවවලට තරු පංතියේ හෝටල්වලින් ආහාර ගෙන ඒම නොකරන ලෙස රජය එම ආයතන ප්‍රධානීන්ට උපදෙස්දී ඇත.
බොහෝ ආයතනවල විශේෂයෙන් අධ්‍යක්ෂ මණ්ඩල රැස්වීම්වලදී තරු පංතියේ හෝටල්වලින් ආහාර ගැනීම කාලයක් තිස්සේ සිදුවෙමින් පැවතිණ.
පවතින ආර්ථික තත්වයේ හමුවේ එවැනි වියදම් දැරීම සුදුසු නොවන බවත් රජයේ ආයතනවල වියදම් හැකිතාක් සීමා කරන ලෙසට දැනුම් දුන් බවත් රජයේ උසස් නිලධාරියෙක් පැවැසීය.
මේ අතර පාර්ලිමේන්තු මන්ත්‍රී චින්තක මායාදුන්නේ මහතා පාර්ලිමේන්තුවේදී පසුගිය 20 වැනිදා ප්‍රකාශයක් කරමින් භූ විද්‍යා හා පතල් කාර්යාංශයේ අධ්‍යක්ෂ මණ්ඩල රැස්වීම් සඳහා තරු පංතියේ හෝටල් වලින් ආහාර ගෙන ඒමට විශාල මුදලක් වැය කරන බවට චෝදනා කළේය.
රට දැඩි ආර්ථික අර්බුදයක ගිලී සිටින අවස්ථාවක එවැනි මුදල් නාස්ති කිරීම සුදුසු නොවන බවද මන්ත්‍රීවරයා ප්‍රකාශ කළේය.
(සුජිත් හේවාජුලිගේ)
0 Comments