යාල යකා නටා උසාවියේදී ඇප ලැබූවන් කවුද?

යාල සිද්ධිය සම්බන්ධයෙන් අපක්ෂපාති පරීක්ෂණයක් සිදු කරන ලෙස ජනාධිපති රනිල් වික්‍රමසිංහ මහතා අදාළ සියලු අංශ වෙත උපදෙස් ලබා දී තිබෙයි.
යාල සිද්ධිය සම්බන්ධයෙන් අධිකරණයට ඉදිරිපත් කළ සැකකරුවන් 9 දෙනා ලක්ෂ 5 බැගින් වූ ශරීර ඇප මත නිදහස් කෙරුණා. සිද්ධියට අදාළ ජිප් රථ 7 ක් ද අධිකරණයට ඊයේ ඉදිරිපත් කෙරිණි.

පෙරේදා සවස එම සිද්ධියට අදාළ සැකකරුවන් 09 දෙනෙකු යාල ජාතික වනෝද්‍යානයට භාර වී ඇති අතර එම සැකකරුවන් සහ ජීප් රථ 7 ක් තිස්සමහාරාම අධිකරණයට ඉදිරිපත් කිරීමට වනජීවී නිලධාරීන් කටයුතු කළේය.

මුණසිංහගේ ධනුෂ්ක ප්‍රසාද්, ආර්.ඒ. සුරේෂ් චතුරංග, හස්මිඩීන් මොහොමඩ් සාෆික් , මොහොමඩ් ගවුස් මොහොමඩ් සුවයෙර්, බුද්ධික චතුරංග, අබ්දුල් රකීබ් මොහොමඩ්, පී.ජී.එස්. අංජුල, ආර්.එම් සම්පත්, ඩී.එම් මයුර ලක්ෂාන් යන සැකකරුවන් ඊයේ අධිකරණයට ඉදිරිපත් කෙරුණි.

එහිදී සැකකරුවන්ට ඇප ලබාදීම සම්බන්ධයෙන් වනජීවී නිලධාරීන් දැඩි විරෝධය පල කළේ ඉදිරි  පරික්ෂණවලට එය බාධාවක් වන බවට සදහන් කරමිනි. ජිප් රථ 7  අධිකරණය භාරයට පත් කෙරුණු අතර සැකකරුවන් 9 දෙනා රුපියල් ලක්ෂ 5 ක ශරීර ඇප මත නිදහස් කෙරුණි.
ෙ
අධිවේගී මාර්ගය ඔස්සේ පැමිණි පිරිසක් යාල වනෝද්‍යානයට ඇතුළු වී වන සතුන්ට හිංසාවන අයුරින් අනිසි ලෙස හැසිරෙන ආකාරය දැක්වෙන වීඩියෝ පට සමාජ මාධ්‍යයේ සංසරණය වීමත් සමගම මේ පිලිබද දැඩි අවධානයක් යොමු විය.
අමාත්‍යවරයාගේ උපදෙස්  මත සිද්ධියට අදාල නිලධාරීන් 7 දෙනෙකුගේ වැඩ තහනම් කිරීමට වනජීවී අධ්‍යක්ෂ ජෙනරාල්වරයා ක්‍රියා කළේය. තරාතිරම නොබලා අදාළ පුද්ගලයන්ට නීතිය ක්‍රියාත්මක කරන ලෙස අමාත්‍ය මහින්ද අමරවීර මහතා ද පොලිස්පතිවරයාට දැනුම් දුන්නේය.

අනිසි ලෙස හැසිරුණු සියලු පුද්ගලයන්ගේ තොරතුරු හැදුනුම්පත් අංක ලිපිනයන් හා වාහන අංක ඇතුළු සියලු සාක්ෂි වනජීවී දෙපාර්තමේන්තුව සතුව තිබූ බැවින් එම තොරතුරු ඊයේ දිනයේ තිස්සමහාරාම මහේස්ත්‍රාත් හමුවට ඉදිරිපත් කිරීමට ද පියවර ගැනුණි. අදාළ සිද්ධියේ විමර්ශන සිදු කර සැකකරුවන් අධිකරණයට ඉදිරිපත් කරන ලෙසට එහිදී මහේස්ත්‍රාත්වරයා නියෝග කළේය.

මේ අතර සිද්ධියට අදාළව වැඩතහනම් කෙරුණු නිලධාරීන් පිලිබද ඉදිරි විමර්ශන සදහා ත්‍රිපුද්ගල කමිටුවක් පත් කිරීමට වනජීවී හා වන සම්පත් සංරක්ෂණ අමාත්‍යාංශය තීරණය කර තිබෙයි. එම විමර්ශනවලදී අදාළ නිලධාරින් 7 දෙනාට අමතරව තවත් නිලධාරින්ගේ නම් හෙලි වුවහොත් ඔවුන්ට එරෙහිව ද විනයානුකූල පියවර ගන්නා බව වනජීවී අධ්‍යක්ෂ ජෙනරාල්වරයා පවසයි. අදාළ විමර්ශන සදහා ත්‍රිපුද්ගල කමිටුවක් පත් කිරීමට ද අමාත්‍යාංශ ලේකම් චන්ද්‍රා හේරත් මහත්මිය තීරණය කර තිබෙයි.

මේ අතර යාල සිද්ධිය සම්බන්ධයෙන් අපක්ෂපාතී පරික්ෂණයක් පවත්වන ලෙස ජනාධිපතිවරයා උපදෙස් ලබාදී ඇති බවට අමාත්‍ය  බන්දුල ගුණවර්ධන මහතා කැබිනට් තීරණ දැනුම්දීමේ මාධ්‍ය හමුවේදී ප්‍රකාශ කළේය.