kandakadu-issue

යුදහමුදා 23 සේනාංකයට අයත් 233 බලසේනා මූලස්ථානය යටතේ පාලනය වන කන්දකාඩු පුනරුත්ථාපන මධ්‍යස්ථානයේ රැඳවියන් අතර ඊයේ (06) ඇතිවූ ගැටුම්කාරී තත්ත්වයක් උද්ගත වූ අතර අද (07) දහවල් වන විටත් එය පැවති  බවත් යුද හමුදාව සහ පොලිසිය තත්ත්වය පාලනය කිරීමට පියවර ගනිමින් සිටින බවත් වාර්තා විය.

කොළඹ ප්‍රදේශයේ සහ ගාල්ල ප්‍රදේශයේ රැඳවියන් දෙපිරිසක් ඊයේ පස්වරුවේ දියනෑමට ගිය අවස්ථාවේ බාල්දියක් සම්බන්ධයෙන් ඇතිවූ බහින් බස් වීමක් දුරදිග යෑමෙන් රාත්‍රී 8.30 ට පමණ මෙම ගැටුම හටගෙන ඇත.

සිද්ධියන් අද දහවල් වන විට යුද හමුදා සෙබ⁣ළෙක් සහ රැඳවියන් සිව් දෙනකු තුවාල ලබා තිබිණි. ඒ අතරින් හමුදා සෙබළා සහ එක් රැඳවියකු ප්‍රතිකාර සඳහා පොළොන්නරුව රෝහලට ඇතුළත් කර තිබේ.

කලහකාරී ලෙස හැසිරෙමින් සිටි පිරිස් එම කඳවුරු වූ භූමියේ තිබූ යුද හමුදා අවි ගබඩාව කඩා අවි ආයුධ ලබා ගැනීමට උත්සාහ දරා ඇතත් යුධ හමුදා සෙබළුන් අහසට වෙඩි තබා තත්ත්වය පාලනය කර ඇත.



පසුව කලහකාරී පිරිස කඳවුරු භූමියේ තිබූ භාණ්ඩ ගබඩාවේ දොරගුලු කඩා කැති පොරෝ ආදිය අතටගෙන ප්‍රචණ්ඩකාරීව හැසිරෙමින් කඳවුරේ වූ දේපළවලට ද හානි සිදුකර තිබේ.
එහිදී ගල්මුල්වලින් පහර දෙමින් හමුදා භට නිවාසවලටද දැඩි අලාභහානි සිදුකර තිබේ.

සිද්ධියේදී පහරකෑමට ලක්වූ රැඳවියන් 150 දෙනෙකු පමණ පලාගොස් ඇති අතර ඔවුන්  ඇතැමුන් ඒ ආසන්නයේ සෝමාවතිය කන්දකාඩු මාර්ගයේ තාවකාලිකව ස්ථාපිත කර ඇති යුධ හමුදා මාර්ග බාධක වෙත පැමිණ බාර වෙමින් සිටින බව යුද හමුදාව සඳහන් කරයි.


යුද හමුදා පුහුණු පාසල මාදුරුඔයල පාබල පුහුනු පාසල මින්නේරියල 7 වන ශ්‍රී ලංකා කාලතුවක්කු හමුදාවල 09 වැනි ශ්‍රී ලංකා කාලතුවක්කු හමුදාවල 6 වැනි ගජබා රෙජිමේන්තුවල 12 වැනි ගැමුණු හේවා බළඇණිය යන හමුදා කණ්ඩායම්වල භට පිරිස් අද දහවල් වනවිට පොලිසිය සමග එක්ව කන්දකාඩු කදවුර වෙත පැමිණ මෙහෙයුමක් අරඹා තිබිණි.

ආයුධ ගබඩාවේ ආරක්ෂාවට සිටි 9 වන කාලතුවක්කු හමුදා සාමාජියින් එය ව්‍යවර්ථ කොට ආයුධ ගබඩාව මේ වනවිට සම්පූර්ණයෙන්ම සුරක්ෂිත කර ඇති බව හමුදා ප්‍රකාශකවරයා සඳහන් කළේ ය.




මෙම පුනරුත්ථාපන කඳවුරේ රැඳවියන් 537 දෙනෙකු පුනරුත්ථාපනය සඳහා රඳවා සිටි අතර අද දහවල් වන විට එයින් රැදවියන් 350 දෙනකු පමණ හමුදාව භාරයේ කඳවුරේ එක් පසෙකට වී සිටි බව හමුදා ප්‍රකාශක බ්‍රිගේඩියර් රවි හේරත් පැවසීය.

තවත් රැදවියන් විශාල පිරිසක් කඳවුරේ අනෙක් පසට වී තවදුරටත් කලහකාරී ලෙස හැසිරෙමින් සිටින බව ද බ්‍රිගේඩියර්වරයා සඳහන් කළේය.

කන්දකාඩු ප්‍රතිකාර හා පුනරුත්ථාපන මධ්‍යස්ථානයේ ඇතිවූ ගැටුම්කාරී තත්වය සහ එහි රැඳවියන් පිරිසක් පැනයාමේ සිද්ධිය සම්බන්ධයෙන් කඩිනමින් සම්පූර්ණ වාර්තාවක් ලබාදෙන ලෙස ජනාධිපති රනිල් වික්‍රමසිංහ මහතා අධිකරණ අමාත්‍යවරයාට දැනුම් දී තිබේ.

මේ වනවිට ඊජීප්තුවෙහි නිල සංචාරයක නිරත වී සිටින ජනාධිපතිවරයා මෙම සිද්ධිය සැළවීමත් සමග අධිකරණ අමාත්‍ය විජේදාස රාජපක්ෂ මහතාව දුරකථනයෙන් අමතා අවශ්‍ය උපදෙස් ලබාදී ඇත.