අතුරුගිරියේ අභිරහස් පුද්ගල මරණයක්

උපන්දින සාදයක් අතරතුර මත්පැන් පානය කොට තාවකාලික ලැගුම්හලක නිදා සිටි බිම් ඇතුරුම් ගල් ප්‍රදර්ශනාගාරයක කළමනාකරුවෙකු අබිරහස් ලෙස ජීවිතක්ෂයට පත්ව සිටියදී පෙරේදා (25දා) සොයාගත් බව අතුරුගිරිය පොලීසිය පවසයි.මෙලෙස ජිවිතක්ෂයට පත්වූයේ, මොරවක, වැලිව, මහගෙදරවත්තේ පදිංචිව සිටි දෙදරු පියෙකු වන ජාසින් කෝරළ ආරච්චිගේ ඉන්දික රොෂාන් (අවු.47) නමැත්තෙකි.

මරණකරු අතුරුගිරිය නගර මධ්‍යයේ පිහිටි බිම් ඇතුරුම් ගල් ප්‍රදර්ශනාගාරයක කළමනාකරුවෙකු ලෙස සේවය කර ඇති අතර, එහි තවත් සේවකයෙකුගේ උපන්දින සාදයක් ඉකුත්දා එම ප්‍රදර්ශනාගාරය තුළදීම පවත්වා ඇති අතර, ඒ සඳහා 15දෙනෙකුට ආසන්න පිරිසක් සහභාගී වී සිට ඇති බවත්, එහිදී මත්පැන් සාදයක්ද පවත්වා ඇති අතර, එහිදී මෙම පුද්ගලයාද මත් පැන්පානය කොට ඇති බවත් පරීක්ෂණවලදී අනාවරණය විය.

පසුව දෙදෙනා රාත්‍රී නිදාගෙන ඇති අතර පසුදා අලුයම අවදි වූ මිතුරා මෙම පුද්ගලයා අවදි කිරීමට යාමේදී ඔහු ලේ සහ වමනය වහනය කොට ඇඳ මත මුනින් අතට නිදාගෙන සිට ඇති බවත් පසුව ඔහුට අවදි වන ලෙස කතා කර ඇතත් ඊට ප්‍රතිචාර නොදැක්වීම නිසා සැකසිතී තවත් පිරිසක් සමග ප්‍රතිකාර සඳහා හෝගම මූලික රෝහලට රැගෙන ගොස් ඇතැයි පැවසේ.එහිදී වෛද්‍යවරුන් පරික්ෂා කොට පවසා ඇත්තේ ඔහු මිය ගොස් ඇති බවයි.

එහිදී මරණයට හේතුව නොදක්වා වැඩිදුර විමර්ශන සඳහා සිරුරේ කොටස් රජයේ රස පරීක්ෂකවරයා වෙත යොමු කිරීමට පියවර ගෙන තිබුණි. ඒ අනුව මියගිය පුද්ගලයාගේ අබ්රහස් මරණයට හේතුව නොදක්වා විවෘත තීන්දුවක් ලබා දීමට හෝමාගම හදිසි මරණ පරීක්ෂක සාම විනිසුරු චින්තක උදයකුමාර මහතා නිගමනය කළේය.


ශාන්න ප්‍රදීප් කුමාර කුලරත්න