egg-55-rupees

දෙසැම්බර් මස අවසානයේ සිට බිත්තරයක් රුපියල් 55ක මිලක් යටතේ පාරිභෝගිකයන්ට සැපයීමට කුකුළු නිෂ්පාදන කර්මාන්තකරුවන් එකඟත්වය පළ කළ බව කෘෂිකර්ම අමාත්‍යාංශය ප්‍රකාශ කළේය.තමන් තවමත් බිත්තර සපයනු ලබන්නේ රුපියල් 49-55ත් අතර මිලකට බවත්, කෙසේ වුවද එක්තරා අතරමැදි පිරිසක් විසින් බිත්තර ගබඩා කර තබා ගනිමින් බිත්තර මිල ඉහළ නැංවීමට කටයුතු කර ඇති බවත් එම කර්මාන්තකරුවන් පෙන්වා දුන් බව අමාත්‍යාංශය වැඩිදුරටත් සඳහන් කර සිටියේය.



මේ අතර දේශීය නිෂ්පාදකයා ආරක්ෂා කිරිම මෙන්ම පාරිභෝගිකයා ආරක්ෂා කිරිමද රජයේ වගකීම වන බැවින් දේශීය කුකුළු බිත්තර කර්මාන්තකරුවන් සාධාරණ මිලකට බිත්තර ලබා නොදෙන්නේ නම් අවම මිලක් යටතේ බිත්තර සැපයීම සඳහා බිත්තර ආනයනය කිරීමට සිදුවනු ඇති බවට විෂය භාර අමාත්‍ය මහින්ද අමරවීර මහතා විසින් එම කර්මාන්තකරුවන්ට අවධාරණය කර තිබේ.දේශීය වෙළෙඳ පොළ තුළ කුකුළු බිත්තර මිල රුපියල් 70 ඉක්මවා යමින් පවතින බැවින් අවම මිලක් යටතේ පාරිභෝගිකයන්ට බිත්තර ලබාදීම සඳහා අමාත්‍ය මහින්ද අමරවීර මහතා සහ කුකුළු නිෂ්පාදනකර්මාන්තකරුවන් ඇතුළු සංගම් කිහිපයක් අතර ඊයේ (26දා) විශේෂ සාකච්ඡාවක් පැවැත්විණි.



ඒ අනුව රුපියල් 55කට බිත්තර ලබාදීමේදී මූලික අදියරේදී බිත්තර රැගත් ලොරි 20ක් බැගින් දිනපතා කොළඹට රැගෙනවිත් ඒවා ජනාකීර්ණ ප්‍රදේශවලදී පාරිභෝගිකයන්ට අලෙවි කිරීමටත්, එසේම ක්‍රමයෙන් වෙනත් නාගරික ප්‍රදේශවලටද එම කටයුතු ව්‍යාප්ත කිරීමටත් එකඟත්වය පළව තිබේ.මීට අමතරව සියලුම ආර්ථික මධ්‍යස්ථාන හා සතොස පරිශ්‍ර ආශ්‍රිතව බිත්තර අලෙවි කිරීමේ පහසුකම් ලබාදීමටත්, කිසියම් පිරිසක් කඩාකප්පල්කාර් ක්‍රියාවල නිරත වුවහොත් අදාළ බිත්තර අලෙවිකරුවන් ආරක්ෂා කිරීම සඳහා ශ්‍රී ලංකා පොලිස් දෙපාර්තමේන්තුවේ සහාය ලබාදීමටත් අමාත්‍යවරයා එකඟත්වය පළ කර ඇත.

නිදර්ශනි වික්‍රමසිංහ