mundalama-incident

මුන්දලම ප්‍රදේශයේ මාර්ගයක ගමන් කරමින් සිටි දාහත් හැවිරිදි පාසල් සිසුවියක පැහැරගෙන ලදු කැලෑවකට රැගෙන ගොස් දූෂණය කර ඇයගේ කරාබු ජෝඩුව ගලවාගෙන ගිය බව කියන තරුණයකු අත්අඩංගුවට ගැනීමට මුන්දලම පොලීසිය පරීක්ෂණ පවත්වයි. පුත්තලම නගරයට පෙරේදා (25) ගොස් පෙම්වතා බව කියන තරුණයා මුණගැසී ඇති ඇය බස් රථයකින් පැමිණ මුන්දලමෙන් බැස පා ගමනින් නිවෙස බලා යමින් සිට ඇතැයි පොලිසිය පවසයි. එම අවස්ථාවේ දී පැමිණි නාඳුනන තරුණයකු සිසුවිය කැලෑ ප්‍රදේශයකට ඇදගෙන ගොස් දූෂණය කිරීමෙන් අනතුරුව ඇයගේ කරාබු ජෝඩුව ගලවාගෙන පලාගොස් ඇතැයිද පොලිසිය කියයි.



සිසුවිය පසුව මේ බව ඇයගේ මවට පවසා ඇතැයි ද පොලිසියේ ඉහළ නිලධාරියෙක් කීවේය. මව දියණිය ද කැටුව මුන්දලම පොලීසියට පැමිණ මේ ගැන පැමිණිලි කර ඇත. සිසුවිය තමාට සිදු වූ දේ ගැන පොලිසියට හෙළි කිරීමෙන් අනතුරුව ඇය වෛද්‍ය පරීක්ෂණයකට ලක් කිරීම සඳහා රෝහල් ගත කළ බවද පොලිසිය සඳහන් කරයි. මුන්දලම පොලිසිය මේ පිළිබඳ පරීක්ෂණ පවත්වයි.

  ශ්‍රීනාත් ප්‍රසන්න ජයසූරිය