පසුගිය වසරේ ජුලි මාසයේදී විරෝධතාකරුවන් ජනාධිපති ගෝඨාභය රාජපක්ෂ මහතාගේ නිල නිවසට කඩා වැදීමෙන් පසු එහිදී හමුවූ රුපියල් මිලියන 17.85 මුදල සම්බන්ධයෙන් සිදුකෙරෙන විමර්ශන ගැන පැහැදිලි කිරීමක් කරන ලෙස කොළඹ කොටුව මහේස්ත්‍රාත් අධිකරණය ඊයේ (25) පොලිස්පති චන්දන ඩී වික්‍රමරත්නට නියෝග කළේය.
2022 ජුලි මස මහජනතාව ඉවත්කර මැදුර පවරා ගන්නා විට කොළඹ ජනාධිපති මන්දිරයේ තිබී සොයාගත් රුපියල් මිලියන 17.85 පොලිස් විශේෂ විමර්ශන ඒකකයෙන් (SIU) ඉවත් කර අපරාධ පරීක්ෂණ දෙපාර්තමේන්තුවට (CID) භාර දෙන විට සහ එම මුදල සම්බන්ධයෙන් හිටපු ජනාධිපති ගෝඨාභය රාජපක්ෂ මහතාගෙන් ප්‍රකාශයක් සටහන් කරගන්නා ලෙසට ලබාදුන් අධිකරණ නියෝගයට අනුව ක්‍රියාකිරීම‍ට පොලිසිය අපොහොසත් වී තිබේ.
අදාළ නඩුව කොළඹ කොටුව මහේස්ත්‍රාත් තිළිණ ගමගේ මහතා ඉදිරියේ කැදවූ අවස්ථාවේදී පොලිස් විශේෂ විමර්ශන ඒකකය අධිකරණයට දන්වා සිටියේ මෙම සිද්ධියට අදාළ පරීක්ෂණ අපරාධ පරීක්ෂණ දෙපාර්තමේන්තුවට පැවරීමට පොලිස්පතිවරයා නියෝග කළ බවයි.
අධිකරණ නියෝගයට අනුව රාජපක්ෂ මහතාගෙන් ප්‍රකාශයක් සටහන් කර ගැනීමට පොලිස්පතිවරයාගෙන් අවසර ඉල්ලා සිටි අවස්ථාවේදී ඔහු අදාළ විමර්ශනය අපරාධ පරීක්ෂණ දෙපාර්තමේන්තුවට භාර දී ඇත.
එහිදී මහේස්ත්‍රාත්වරයා කියා සිටියේ සිද්ධිය සම්බන්ධයෙන් කුමන නිලධාරියෙකු විමර්ශනය කළද මෙතෙක් ලබාදී ඇති අධිකරණ නියෝග ක්‍රියාත්මක කළ යුතු බවයි. එම නියෝගවලට පටහැනිව ක්‍රියා කරන නිලධාරීන්ට එරෙහිව නීතිමය ක්‍රියාමාර්ග ගන්නා බව දන්වමින් රාජපක්ෂ මහතාගෙන් ප්‍රකාශයක් සටහන් කර ගැනීමේ නියෝගය නොපිළිපදිමින් පරීක්ෂණ අපරාධ පරීක්ෂණ දෙපාර්තමේන්තුවට පැවරීම පිළිබඳව පැහැදිලි කිරීමක් කරන ලෙස පොලිස්පතිවරයාට අධිකරණය නියෝග කළේය.
මේ අතර සිද්ධියට සම්බන්ධ සැකකරුවන් ලෙස නම් කර ඇති අන්තර් විශ්වවිද්‍යාල ශිෂ්‍ය බලමණ්ඩලයේ කැඳවුම්කරු වසන්ත මුදලිගේ, නීතිඥ නුවන් බෝපගේ ඇතුළු කිහිප දෙනෙකු වෙනුවෙන් පෙනී සිටි ජනාධිපති නීතීඥ රියන්සි අර්සකුලරත්න කියා සිටියේ පොලිස්පතිවරයාට අධිකරණ නියෝග මගහැර යා නොහැකි බවයි. . විමර්ශන අපරාධ පරීක්ෂණ දෙපාර්තමේන්තුවට පවරන ලෙස කර ඇති නියෝගයද නීති විරෝධී බවත් එය අධිකරණයට අපහාස කිරීමක් ලෙස සැලකිය හැකි බවත් ඔහු පැවසීය.
මෙම නඩුව 2023 පෙබරවාරි 8 වැනි දින යළි කැඳවීමට මහේස්ත්‍රාත් ගමගේ නියෝග කළේය.
0 Comments