මහාධිකරණ විනිසුරුවරුන්, දිස්ත්‍රික් විනිසුරුවරුන් සහ මහේස්ත්‍රාත්වරුන්ගේ වැටුපෙන් උපයන විට බදු අය කිරීමට දේශීය අදායම් දෙපාර්තමේන්තුව ගෙන ඇති තීරණය ක්‍රියාත්මක කිරීම තාවකාලිකව අත්හිටුවමින් අභියාචනාධිකරණය අතුරු තහනම් නියෝගයක් ඊයේ (26) නිකුත් කළේය. මෙම නියෝගය කරනු ලැබුවේ සිය වැටුපෙන් බදු අය කිරීමට එරෙහිව විනිසුරු සංගම් 2ක් ගොනු කළ පෙත්සමක් සලකා බැලීමෙන් අනතුරුවය.
මෙම නියෝගය නිකුත් කිරීමෙන් පසුව අභියාචනාධිකරණයට පැමිණි නීතිපති සංජේ රාජරත්නම් මහතා කියා සිටියේ මෙම අතුරු නියෝගය සම්බන්ධයෙන් කරුණු දැක්වීමට අවශ්‍ය බවයි. සමහර විනිසුරුවරුන්ගෙන් මෙම බද්ද දැනටමත් අයකරගෙන ඇති බවත් කෙසේ නමුත් මේ පිළිබඳ කරුණු දැක්වීමට කල් අවශ්‍ය බවත් නීතිපතිවරයා කියා සිටියේය.ඒ අනුව මෙම පෙත්සම සලකා බැලීම ලබන මස 9 වැනිදාට කල් තැබිණි.
මෙම පෙත්සම සෝභිත රාජකරුණා සහ ධම්මික ගනේපොළ යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ලක් හමුවේ සලකා බැලිණි. මහාධිකරණ විනිසුරුවරුන්ගේ සංගමය සහ දිස්ත්‍රික් විනිසුරුවරුන්ගේ හා මහේස්ත්‍රාත්වරුන්ගේ සංගමය විසින් ගොනුකරන ලද මෙම පෙත්සමෙහි වගඋත්තරකරුවන් වශයෙන් අධිකරණ අමාත්‍යාංශයේ ප්‍රධාන ගණකාධිකාරි සහ අධිකරණ අමාත්‍යාංශයේ ලේකම්වරයා නම් කරනු ලැබ සිටිති.
පෙත්සමේ මෙසේද සඳහන් වේ.
පෙත්සම්කාර විනිසුරුවරුන්ගේ වැටුපෙන් උපයන විට බද්ද අඩු කිරීමට දේශීය අදායම් දෙපාර්තමේන්තුව තීරණයක් කර ඇත. විනිසුරුවරුන්ගෙන් බදු අයකිරීම ව්‍යවස්ථාවට සහ නීතියට පටහැනි වේ. එබැවින් වග උත්තරකරුවන්ට නොතීසි නිකුත් කරන ලෙසද අදාල තීරණය බල රහිත කරන රිට් ආඥාවක් නිකුත් කරන ලෙසද එම තීරණය ක්‍රියාත්මක කිරීම වළකාලන අතුරු නියෝගයක් නිකුත් කරන ලෙසද පෙත්සම්කාර විනිසුරුවරුන් සිය පෙත්සමෙන් ඉල්ලා ඇත. පෙත්සම්කරුවන් වෙනුවෙන් ජනාධිපති නීතිඥ රොමේෂ් ද සිල්වා මහතා පෙනී සිටියේය.
රන්ජන් කටුගම්පොළ
0 Comments