විනාශකාරී භූමිකම්පාවෙන් පසු තුර්කියේ අතුරුදන්ව සිටි ශ්‍රී ලාංකික කාන්තාවකගේ මළ සිරුරක් සොයා ගත් බව තුර්කියේ ශ්‍රී ලංකා තානාපති කාර්යාලය පවසයි.
වසර 20කට ආසන්න කාලයක් තුර්කියේ සේවය කරමින් සිටි 64 හැවිරිදි මෙම කාන්තාව අතුරුදන් වූ බවට මීට පෙර වාර්තා විය.
මියගිය මවගේ දියණිය විසින් දේහය හඳුනාගෙන ඇති බව අන්කාරා හි ශ්‍රී ලංකා තානාපති හසන්ති ඌරුගොඩවත්ත දිසානායක මාධ්‍ය වෙත ප්‍රකාශ කළාය.
ඇය මීගහහේන, ගලගෙදර මහනුවර ප්‍රදේශයේ පදිංචිව සිටි කාන්තාවකි.
කඩා වැටුණු මහල් නිවාසයක සිටි බව කියන කාන්තාව සොයා ගැනීම සඳහා මීට පෙර, අන්කාරා හි ශ්‍රී ලංකා තානාපති කාර්යාලය තුර්කි ආපදා ප්‍රතිචාර ඒජන්සිය වන ASAD හි සහාය ඉල්ලා තිබුණි.
තානාපතිනිය ප්‍රකාශ කළේ භූ කම්පනයෙන් විපතට පත් ප්‍රදේශවල ජීවත් වූ ශ්‍රී ලාංකිකයන් 16 දෙනාගෙන් 15 දෙනෙකුම ආරක්ෂිත ස්ථානවල සිටින බවයි.ඉන් 14ක් ශිෂ්‍යයින් වේ.
තුර්කියේ අන්කාරා සහ ඉස්තාන්බුල් යන ප්‍රදේශවල ශ්‍රී ලාංකිකයන් 270ක් පමණ ජීවත් වෙති.
මේ අතර, දරුණුතම බලපෑමට ලක් වූ ප්‍රදේශවලට තේ බෙදා හැරීමට තුර්කියේ ශ්‍රී ලංකා තානාපති කාර්යාලය සැලසුම් කරයි. අධික ශීත ඍතුව හේතුවෙන් දිවි ගලවා ගත් අය පීඩාවට පත්වන කහරමන්මාරස් වැනි ප්‍රදේශවලට ශ්‍රී ලංකා තේ මණ්ඩලයේ සහය ඇතිව තේ යැවීමට තානාපති කාර්යාලය සැලසුම් කර ඇති බව ශ්‍රී ලංකා තානාපති කාර්යාලය ප්‍රකාශ කළේය.
පසුගිය සඳුදා මැග්නිට්යුඩ් ඒකක 7.8 ක පළමු භූ කම්පනය ඇති වූ අතර ඉන් අනතුරුව පසුකම්පන රැසක් සිදු විය
0 Comments