රනිල්ගේ අරමුණ හොඳින් හෝ නරකින් ඡන්දෙ කල්දාන එක - අනුර

කොළඹ දිස්ත්‍රික් පාර්ලිමේන්තු මන්ත්‍රී අනුර කුමාර දිසානායක ජාතික පුවත්පතකට අදහස් දක්වමින් මෙසේ සදහන් කර තිබේ.

    “ඡන්ද කඩාකප්පල් කරන ආණ්ඩුවේ ක්‍රියාවලිය දිගින් දිගටම සිදු කරගෙන යනවා. පාර්ලිමේන්තුව හරහා ඡන්දය කල් දැමීමට ගත් සියලු උත්සහයන් ව්‍යර්ථ වූ පසු දැන් කැලෑ පාරවල් සොයාගෙන තිබෙනවා.

    ඒ වගේ ම ආණ්ඩුව චක්‍රලේඛයක් නිකුත් කරලා තිබෙනවා කිසි කටයුත්තක් ණයට කරන්න එපා කියලා. දිගු කාලයක් ක්‍රියාත්මක වුණේ ආණ්ඩුවට යම් ව්‍යාපෘතියක් කවුරුන් හෝ සිදු කළ පසු තමයි මුදල් ගෙවන්නේ. පූර්ව මුදල් ගෙවීමක් සිදු වෙන්නේ නෑ. මේ චක්‍රලේඛය හරහා මැතිවරණ කොමිසමට බාහිර පාර්ශ්වකරුවන්ගෙන් ගන්න භාණ්ඩ හා සේවා ආණ්ඩුවට ප්‍රශ්නයක් වෙලා තියෙනවා. ඊළඟට, මැතිවරණ රාජකාරි සඳහා අවශ්‍ය ඉන්ධන ලබා දීමට කටයුතු කරනවා වෙනුවට අවම තෙල් කෝටාවක් තවමත් ආණ්ඩුව විසින් ලබා දීලා නෑ.

    ඒවගේ ම, පසුගිය 2 වන දා ආණ්ඩුව තවත් චක්‍රලේඛයක් නිකුත් කරලා තියෙනවා, ආණ්ඩුවේ ආයතනවල නඩු කටයුතු සඳහා බාහිර නීතිඥයන් ගන්නේ නම් ඒ සඳහා ගෙවීම් පෞද්ගලිකව දරා ගත යුතු බව ත් අමාත්‍යාංශයෙන් ඒ සඳහා ලිඛිත අනුමැතියක් ගතයුතු බව ත්. මේ චක්‍රලේඛයෙන් පෙන්නන්නේ දැනටමත් මැතිවරණයට අදාළව අධිකරණයේ තිබෙන නඩුව සඳහා නීතිපති දෙපාර්තමේන්තුව කොමිසම වෙනුවෙන් පෙනී නොසිටින බැවින් බාහිර නීතිඥ සහාය ලබා ගැනීම වැළැක්වීමයි.

    ඒ නිසා රනිල්ගේ ආණ්ඩුව ව්‍යවස්ථානුකූල සියලු ක්‍රියාමාර්ග ඇහිරුණු පසු කැලෑ පාරවල්වලින් මැතිවරණ ක්‍රියාවලිය කඩාකප්පල් කිරීමේ උත්සාහයක නිරත වී සිටිනවා. එම උත්සහයට අපි කිසිසේත් ම ඉඩ නොදෙන බවත් ඔහුට කියනවා.”