මත්ද්‍රව්‍ය භාවිතකර අධික ලෙස මත්වී සිටි බව කියන බන්ධනාගාර නියාමකවරයකු නිට්ටඹුව, කෝන්ගස්දෙණිය ප්‍රදේශයේ මත්ද්‍රව්‍ය ජාවාරම්කරුවකුගේ නිවසේ සිටියදී පෙරේදා (29 වැනිදා) රාත්‍රී 10 ට පමණ අත්අඩංගුවට ගත් බව නිට්ටඹුව මූලස්ථාන පොලිසිය පවසයි. මෙම බන්ධනාගාර නියාමකවරයා මහර බන්ධනාගාරයට අනුයුක්තව සේවය කරන්නකු බවද පොලිසිය කියයි. නිට්ටඹුව, කෝන්ගස්දෙණිය ග්‍රාමයේ සිය නිවසේ සිට මත්ද්‍රව්‍ය ජාවාරමේ යෙදෙන බව පැවසෙන ජාවාරම්කරුවකු අත්අඩංගුවට ගැනීම සඳහා නිට්ටඹුව මූලස්ථාන පොලිස් කණ්ඩායමක් රාත්‍රී කාලයේ එම නිවෙස වටලා තිබේ.
එම වැටලීමේ දී නිවෙසේ සිට ඇති මත්ද්‍රව්‍ය ජාවාරම්කරුවකු බව පැවසෙන පුද්ගලයකු හෙරොයින් මිලිග්‍රෑම් 2120ක්ද සමග අත්අඩංගුවට ගත් අවස්ථාවේ අධික ලෙස මත්වී සිට ඇති පුද්ගලයකු නිවස තුළ සිටියදී හමුවූ බවද පොලිස් නිලධාරීහු පවසති. අත්අඩංගුවට ගැනුණ ජාවාරම්කරු සමග මත්වී සිටි පුද්ගලයාද නිට්ටඹුව පොලිසියට රැගෙනගොස් පැය කිහිපයකට පසුව ඔහුගෙන් ප්‍රශ්න කිරීමේ දී ඔහු මහර බන්ධනාගාරයේ නියාමකවරයකු බව හෙළිවී යැයි පොලිසිය කියයි.
තිස්එක් හැවිරිදි මෙම බන්ධනාගාර නියාමකවරයා ඇතාවුඩකන්ද, ගලපිටමඩ ප්‍රදේශයේ පදිංචිකරුවකු බවද පොලිසිය පවසයි. මෙම නියාමකවරයා කිසියම් මත්ද්‍රව්‍ය පෙතිවර්ගයක් හා හෙරොයින් සහ ‘‘අයිස්’” නමැති මත්ද්‍රව්‍ය භාවිතාකර අධික ලෙස මත්වී ජාවාරම්කරුගේ නිවසේ සිට ඇති බවද වැඩිදුර විමර්ශනවලදී හෙළිවී යැයිද පොලිසිය සඳහන් කරයි. වතුපිටිවල මූලික රෝහලේ විශේෂඥ අධිකරණ වෛද්‍ය නිලධාරි රමේශ් අලගියවන්න මහතා හමුවට 30 වැනිදා දහවල් මෙම බන්ධනාගාර නියාමකවරයා ඉදිරිපත්කර ඇත. වෛද්‍ය පරීක්ෂණයකදී ඔහු අධික ලෙස මත්ද්‍රව්‍ය භාවිතයට ඇබ්බැහිවී සිටින්නකු බව වෛද්‍ය රමේශ් අලගියවන්න මහතා සිය වෛද්‍ය වාර්තාවෙන් දක්වා තිබේ.
එස්.යූ.ඩබ්ලිව්.කේ. ජයවර්ධන
0 Comments