අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු වසන්ත මුදලිගේට වසර 08ක් දක්වා ශිෂ්‍යභාවය හිමි බවත්, වැඩි කාලයක් විශ්වවිද්‍යාලය තුළ සිටි බවට පළවන වාර්තා අසත්‍ය බවත් විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග මහතා පැවසීය. මහාචාර්ය රංජිත් බණ්ඩාර මහතාගේ සභාපතිත්වයෙන් පැවැති පොදු ව්‍යාපාර පිළිබඳ කාරක සභාවේදී (කෝප්) කමිටු සාමාජිකයන් මතු කළ ප්‍රශ්නවලට පිළිතුරු ලබාදෙමින් හෙතෙම මේ බව සඳහන් කළේය.
කෙසේ වෙතත් අන්තර් විශ්වවිද්‍යාලයීය ශිෂ්‍ය බලමණ්ඩලය විශ්වවිද්‍යාල ප්‍රතිපාදන කොමිෂන් සභාවේ ලියාපදිංචි කර නොමැති බවත්, ඒ පිළිබඳ ලිඛිතව හා වාචිකව ප්‍රකාශ කර තිබෙන බවත් සභාපතිවරයා පැවසීය. මේ අතර මෙරට විශ්වවිද්‍යාල පද්ධතිය තුළ පිටරට මෙන්ම මෙරට ශිෂ්‍ය ශිෂ්‍යාවන්ටද මුදල් ගෙවා අධ්‍යාපනය ලැබීමට අවස්ථාව ලබාදෙන ලෙසට යෝජනාවක් ආණ්ඩුවට ඉදිරිපත් කළ බවද එහිදී සම්පත් අමරතුංග මහතා වැඩිදුරටත් සඳහන් කළේය.
විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග
අපි ඉදිරිපත් කළා ආන්දෝලනාත්මක යෝජනාවක්. රජය පත් කළා වෛද්‍ය විද්‍යාලවල සායනික පුහුණුව සඳහා කටයුතු කරන්න තව අවස්ථා දෙන්නේ කොහොමද කියලා සොයා බලන්න කමිටුවක්, ඒ කමිටුවට මම යෝජනාවක් ඉදිරිපත් කළා. ඒ යෝජනාව තමයි අපට පනත සංශෝධනය කරලා මුදල් ගෙවලා ශ්‍රී ලාංකිකයන්ට ඉගෙනගන්න අවස්ථාව දෙන්න කියලා. ඒක විශාල ආන්දෝලනාත්මක දෙයක්. ඒකෙදි අපට විශාල වෙනසක් සිදුවෙන්නේ නෑ.
කෝප් කමිටු සාමාජික ප්‍රේමිනාත් සී දොලවත්ත
විශ්වවිද්‍යාලයේ නැද්ද ශිෂ්‍යයෙකුට ඉන්න පුළුවන් වයස් සීමාවක්?
විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග
විශ්වවිද්‍යාලයට ඇතුළු වෙන්න වයසක් බලපාන්නේ නෑ, පිටවීම බලපාන්නේ ඇතුළු වීම අනුව තමයි. පසුගිය කාලයේ මේක ලොකු ආන්දෝලනයක් වුණා. අවුරුදු 04 උපාධි සහ අවුරුදු 03 උපාධි තියෙනවා. මේ අවුරුදු 03 උපාධි ඉවර කරන්න ඕන අවුරුදු 07ක් ඇතුළත, ඒත් මේ අවුරුදු 03ක උපාධියේ අවුරුදු තුනෙන් පස්සේ ඔවුන්ට විශ්වවිද්‍යාලයේ වරප්‍රසාද අහිමි වෙනවා. ඔවුන්ට නැවත ඇවිත් නේවාසිකාගාරයේ ලැගුම් ගන්න බෑ. ඔවුන්ට කොටින්ම කියනවා නම් විශ්වවිද්‍යාලය නියෝජනය කරන්න බෑ.
අඩුම තරමින් තමන් විශ්වවිද්‍යාල ශිෂ්‍යයෙක් කියන අයිඩෙන්ටිටි කාඩ් එකවත් දෙන්න බෑ. එයාට පුළුවන්කම තිබෙන්නේ ඊළඟ අවුරුද්දේ විභාගය තියෙන දවසට තමන්ගේ විභාග අංකයට ඇවිල්ලා පෙනී සිටීම. එයා ඒකටත් සල්ලි ගෙවන්න ඕන. ඒ වගේම අවුරුදු 04ක උපාධිය අවුරුදු 08ක් ඇතුළත ඉවර කරන්න ඕන. අවුරුදු 03 උපාධිය 95%කට වඩා ඉවර කරනවා. නමුත් දැන් කණ්ඩායම් බිහිවෙලා තිබෙනවා උපාධි ගන්නවාට වඩා උපාධිය නොගෙන ඉන්න තමයි. දක්ෂ කියලා අන්තවාදී වශයෙන් ශිෂ්‍යයන්ගේ මනසට ගෙනාපු අය ඉන්නවා.
කෝප් සභාපති මහාචාර්ය රංජිත් බණ්ඩාර
එක්තරා ශිෂ්‍ය සංවිධානයක නායකයා අවුරුදු 9-10ක් අධ්‍යාපනය ලබනවා කියලා කියනවා. එයා කොච්චර කල් ඉන්නවාද?
විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග
ඒක සම්පූර්ණයෙන්ම වැරදි තොරතුරක්. හරියටම අවුරුදු 08න් ඔහුගේ ශිෂ්‍යභාවය අහෝසි වෙනවා.
කෝප් සභාපති මහාචාර්ය රංජිත් බණ්ඩාර
අන්තර් විශ්වවිද්‍යාලයීය ශිෂ්‍ය බලමණ්ඩලය කියලා එකක් නීත්‍යනුකූලව තිබෙනවාද?
විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග
විශ්වවිද්‍යාල ප්‍රතිපාදන කොමිෂන් සභාවේ එහෙම දෙයක් ලියාපදිංචි වෙලා නෑ.
කෝප් සභාපති මහාචාර්ය රංජිත් බණ්ඩාර
ඉතින් ඒ ගැන ප්‍රකාශයක් කරන්න.
විශ්වවිද්‍යාල ප්‍රතිපාදන කොමිෂන් සභාවේ සභාපති සම්පත් අමරතුංග
අපි ඒක ප්‍රකාශ කළා. ලිඛිතවත් දුන්නා.
(දිනේෂ් සමරකෝන්)
0 Comments