පසුගිය සතියට සාපේක්ෂව මේ සතියේ ශ්‍රී ලංකාවේ ඩෙංගු රෝගීන්ගේ සියයට 20.5ක වර්ධනයක් වාර්තා වී ඇති බව ජාතික ඩෙංගු මර්දන ඒකකය පවසයි. එම ඒකකයට අනුව අප්‍රේල් 17 සිට අප්‍රේල් 23 දක්වා කාලය තුළ දිස්ත්‍රික්ක 26 කින් ඩෙංගු බවට සැක කෙරෙන රෝගීන් 1,909 ක් වාර්තා වී ඇති අතර, පෙර සතියට වඩා රෝගීන් 325 ක වැඩිවීමක් දක්නට ලැබේ.



රෝගීන්ගෙන් සියයට 48.5 ක් බස්නාහිර පළාතෙන් වන අතර සියයට 3.9 ක් කොළඹ මහ නගර සභා නගර සීමාවෙන් වාර්තා වී ඇති බව එහි සඳහන් වේ.

ගම්පහ, කළුතර, මඩකලපුව, ත්‍රිකුණාමලය සහ මහනුවර දිස්ත්‍රික්කවල සෞඛ්‍ය අමාත්‍යාංශයේ ප්‍රදේශ 55ක් අධි අවදානම් ප්‍රදේශ ලෙස සලකුණු කර ඇති අතර, එම දිස්ත්‍රික්කවල ඉහළ රෝගීන් සංඛ්‍යාවක් වාර්තා වී තිබේ.

කොළඹ දිස්ත්‍රික්කයේ ඉහළම අවදානම් කලාප ලෙස දෙහිවල, පිළියන්දල, හෝමාගම, කඩුවෙල සහ කොළොන්නාව ප්‍රදේශ හඳුනාගෙන ඇති අතර ගම්පහ දිස්ත්‍රික්කයේ අත්තනගල්ල, බියගම සහ දිවුලපිටිය ප්‍රදේශද අවදානම් කලාප ලෙස නම් කර ඇත. මේ සතියේ වැඩිම ඩෙංගු රෝගීන් සංඛ්‍යාවක් ඇතුළත් වී ඇත්තේ මීගමුව දිස්ත්‍රික් මහ රෝහලටය.
(daily mirror ඇසුරිනි)