කළුතර ආයුර්වේද වෛද්‍යවරියගේ ඝාතනය

කළුතර උතුර ප්‍රදේශයේ ආයුර්වේද වෛද්‍යවරියක මාළු කපන මන්නයකින් ගෙල කපා ඝාතනය කිරීමේ බිහිසුණ සිදුවීමක් අද (27)උදෑසන වාර්තා විය.

මෙසේ ඝාතනයට ලක්ව ඇත්තේ කළුතර උතුර කැලිඩෝ පාරේ පදිංචිව සිටි ඩබ්ලිව්. ප්‍රේමවතී නැමැති කැඩුම් බිදුම් වෛද්‍යවරියකි.
 අද අළුයම 5 ට පමණ නිවස පිටුපස ඇය වැටී සිටින අයුරු දියණිය දැක ඇයගේ මළසිරුර පරීක්ෂා කිරීමේදී මන්නයකින් ගෙල කැපී ඇති අයුරුත් ඇය එතැනම මියගොස් සිටි අයුරුත් හඳුනාගෙන තිබේ. අනතුරුව ඇය පොලිසියට මේ බව දන්වා තිබේ.
ඝාතනය සඳහා යොදාගත් බවට සැක අඩි දෙකකට ආසන්න දිගකින් යුත් මාළු කපන ලේ තැවරුන මන්නා පිහියද ආසන්නයේ තිබී සොයාගෙන ඇති බව පොලිසිය පැවසීය.

එම පිහිය ඇය පදිංචි සිටි දියණියට අයත් නිවසේ මුළුතැන්ගෙයි මාළු කැපිම සදහා භාවිතා කළ එකක් බව පොලිස් පරීක්ෂණ වලදී අනාවරණය වී ඇත.

කළුතර සහකාර පොලිස් අධිකාරී සුනෙත් ශාන්ත ස්ථානීය පරීක්ෂණය සිදුකළ අතර , අපරාධ ස්ථාන පරීක්ෂණාගාර නිලධාරීන් සහ විශේෂ පොලිස් කණ්ඩායම් කිහිපයක් පරීක්ෂණ ආරම්භ කර ඇති බවත් පොලිස් නිළ සුනඛයන් ගෙන්වීමට කටයුතු කරන බවත් උසස් පොලිස් නිලධාරියෙක් කීය.