ඕස්ට්‍රේලියාවේ සිඩ්නි නුවර පුද්ගලයකුට ගුවන් මගින් යැවීමට සූදානම් කර කටුනායක ගුවන්තොටුපොළ පාර්සල් ගබඩාවේ පාර්සලයක තිබූ මැණික් ගල් 14ක් සොරා ගෙන ඇතැයි ගුවන්තොටුපොළ පොලිසිය පවසයි. ඒ සම්බන්ධයෙන් කටුනායක ගුවන් තොටුපොළ සේවකයන් දෙදෙනකු අත්අඩංගුවට ගෙන ඇතැයි පොලිසිය කියයි. කොළඹ මධ්‍යම තැපැල් හුවමාරුව මගින් රැගෙන එන ලද අධිවේගී තැපැල් මලු අතර තිබූ එක මල්ලක මෙම මැණික් ගල් 14 සහිත පාර්සලය තිබී ඇති අතර එය පසුගිය අප්‍රේල් 26 දින සොරාගෙන ඇති බව ද පොලිසිය සඳහන් කරයි.
අත්අඩංගුවට ගත් සැකකරුවන් ශ්‍රී ලංකන් ගුවන් සමාගමේ ගමන් මලු පැටවීමේ හා බෑමේ කාර්යයේ නිරත දෙදෙනකු බවත් ඔවුන් හසලක සහ තෝලංගමුව යන ප්‍රදේශවල පදිංචිකරුවන් බවත් පොලිසිය කියයි. ඇණවුම් කර තිබූ මැණික් ගල් 14ක් සහිත පාර්සලයක් අධිවේගී තැපැල් හරහා ගුවන් මගින් සිඩ්නි වෙත රැගෙන ඒමට නියමිතව තිබිය දී එය අස්ථානගත වී ඇති බවට එහි හිමිකරු ඕස්ට්‍රේලියාවේ ෆෙඩරල් පොලිසියට පැමිණිලි කර ඇත. ඕස්ට්‍රේලියා පොලිසිය කළ දැනුම් දීමකට අනුව ගුවන් තොටුපොළ පොලිසිය විමර්ශන පවත්වා සැකකරුවන් දෙදෙනා පෙරේදා (14) අත්අඩංගුවට ගත් බව පොලිසිය පවසයි.
ශ්‍රී ලංකන් ගුවන් යානයෙන් ඉකුත් 26 වැනිදා සිඩ්නි නුවරට රැගෙන යාමට නියමිතව තිබිය දී ගුවන් බඩු ගබඩාවේ දී මෙම සැකකරුවන් දෙදෙනා එය සොරාගෙන ඇති බවට සැකකරන බව පොලිසිය කියයි.
සිද්ධිය සම්බන්ධයෙන් ලද පැමිණිල්ලකට අනුව පොලිසිය පරීක්ෂණ ආරම්භ කර ගබඩාවේ සීසීටීවී දර්ශන ඔස්සේ සිදුකළ විමර්ශනයේ දී ගබඩාවේ සේවකයන් දෙදෙනකු ඒවා සොරාගෙන ඇති බවට අනාවරණය වී ඇත. එම තොරතුරු අනුව සැකකරුවන් දෙදෙනා අත්අඩංගුවට ගෙන ප්‍රශ්න කිරීමේ දී හෙළි වූ තොරතුරු මත සැකකරුවන් එම මැණික් ගල් කිරිඇල්ල ප්‍රදේශයේ පුද්ගලයකුට අලෙවි කර තිබිය දී සොයාගෙන තිබේ. සැකකරුවෝ දෙදෙනා මීගමුව මහේස්ත්‍රාත් අධිකරණයට ඊයේ (15) ඉදිරිපත් කිරීමට නියමිතව සිටියහ.
ඉන්දිකා රාමනායක
0 Comments