රූමත් තරුණියකගේ ඡායාරූපයක් මුහුණ පොතේ පළ කර තරුණයෙකු එම තරුණිය ලෙස පෙනී සිටිමින් රුවන්වැල්ල ප්‍රදේශයේ පදිංචි 17 හැවිරිදි පාසල් සිසුවකු ප්‍රේමය පෙන්වා රැවටීමට ලක් කර පසුව එම සිසුවාට බරපතළ ලිංගික අපයෝජනයක් සිදු කළ පුවතක් ගම්පහින් වාර්තාවේ.
සිද්ධියට මුහුණ පෑ සිසුවා මේ බව මවට හා පියාට දැනුම් දී ගම්පහ මූලස්ථාන පොලිසියට පැමිණිලි කර ඇත.
කෑගල්ල ප්‍රදේශයේ ප්‍රසිද්ධ පාසලක ඉගෙනුම ලබන රුවන්වැල්ල ප්‍රදේශයේ පදිංචි 17 හැවිරිදි සිසුවකු මුහුණු පොතෙන් මීට මාසයකට පමණ ඉහතදී තරුණියක හඳුනාගෙන ඇයත් සමග චැට් කර ඇතැයි කියති.
මෙම තරුණිය මුහුණු පොතේ නවෝද්‍යා අක්කා යන නමින් පෙනී සිට ඇත. පසුව මෙය ප්‍රේම සම්බන්ධතාවක් දක්වා දුරදිග ගොස් ඇතැයි පැවසේ.
අධ්‍යාපනික කටයුතු කරගෙන යෑම සඳහා මවුපියන් සිසුවාට ලබාදී තිබූ නවීන පන්නයේ ජංගම දුරකථනය මේ සඳහා යොදාගෙන ඇති බව ද කියති.
තමන් හමුවිම සඳහා ගම්පහ කිරිඳිවිට ප්‍රදේශයට පැමිණෙන ලෙසට තරුණිය කළ ඉල්ලීමක් මත සිසුවා මව්පියන්ට හොර රහසේ බස් රථයක නැගී කිරිඳි විට ප්‍රදේශයෙන් බැස ඇය එනතෙක් බලා සිට ඇතැයි පොලිස් ආරංචි මාර්ග කියයි.
මුහුණු පොතෙන් හඳුනාගත් නවෝද්‍යා අක්කා පැමිණීමේ බලාපොරොත්තුවෙන් සිටින අවස්ථාවේ
යතුරු පැදියකින් ආ තරුණයකු නවෝද්‍යා අක්කා ගෙදරට කැඳවාගෙන එන්නට යැයි කියා පැවැසූ බව කිය සිසුවා යතුරු පැදියේ ගොඩ කරගෙන පාළු ප්‍රදේශයකට රැගෙන ගොස් ඇතැයි ද පොලිසිය පැවසීය.
එහිදී තරුණයා සිසුවාට අරක්කු පානය කිරීමට සලස්වා ඔහු ද අරක්කු පානය කර සිසුවාට වෙරි වූ පසු මෙම තරුණයා ලිංගික අපයෝජනයක් සිදුකර පලා ගොස් ඇතැයි පොලිසිය කීය.
බස්නාහිර උතුරු දිසා භාර නියෝජ්‍ය පොලිස්පති රොහාන් ප්‍රේමරත්න මහතාගේ සහ පොලිස් ළමා හා කාන්තා අපයෝජන නිවාරණ කාර්යාංශය බාර නියෝජ්‍ය පොලිස්පතිනි රේණුකා ජයසුන්දර මහත්මියගේ උපදෙස් මත ගම්පහ කොට්ඨාස භාර ජ්‍යෙෂ්ඨ පොලිස් අධිකාරි ජගත් රෝහණ මහතාගේ මෙහෙයුම යටතේ ගම්පහ මූලස්ථාන පොලිසියේ ළමා හා කාන්තා කාර්යාංශය මෙම සැකකරු අත්අඩංගුවට ගැනීමට පුළුල් පරීක්ෂණ පවත්වාගෙන යයි.
සිසුවා වෛද්‍ය පරීක්ෂණයකට ලක් කිරීම සඳහා ගම්පහ රෝහලට ඇතුළත් කරනු ලැබ සිටී.
ශ්‍රීනාත් ප්‍රසන්න ජයසූරිය සහ ගම්පහ තිලකරත්න දිසානායක
0 Comments