ශ්‍රී ජයවර්ධනපුර විශ්වවිද්‍යාලයේ නව උපකුලපතිවරයා ලෙස ජ්‍යෙෂ්ඨ මහාචාර්ය පත්මලාල් එම්. මානගේ මහතා පත්කර ඇත. ජනාධිපති රනිල් වික්‍රමසිංහ මහතා විසින් වසර තුනක කාලයක් සඳහා බල පැවැත්වෙන පරිදි මෙම පත්වීම කරනු ලැබ ඇත. මෙම පත්වීමට පෙර මහාචාර්ය පද්මලාල් මානගේ මහතා ශ්‍රී ජයවර්ධනපුර විශ්ව විද්‍යාලයේ උපාධි අධ්‍යයන පීඨයේ පීඨාධිපතිවරයා ලෙස කටයුතු කළේය.
ශ්‍රී ජයවර්ධනපුර විශ්වවිද්‍යාලයේ සත්ව විද්‍යා දෙපාර්තමේන්තුවේ ජ්‍යෙෂ්ඨ මහාචාර්යවරයකු ලෙස කලක් සේවය කළ ජ්‍යෙෂ්ඨ මහාචාර්ය මානගේ මහතා, එම විශ්ව විද්‍යාලයේ උපාධි අධ්‍යයන පීඨයේ පීඨාධිපතිවරයා ලෙස ද කටයුතු කළේය. හෙතෙම එම විශ්වවිද්‍යාලයේ පරේශ්ෂණ මණ්ඩලයේ සම සභාපතිවරයා ලෙස ද කටයුතු කළේය. ජපානයේ එහිමේ විශ්වවිද්‍යාලයෙන් පශ්චාත් උපාධිය සහ ආචාර්ය උපාධිය හිමි කරගත් ජ්‍යෙෂ්ඨ මහාචාර්ය මානගේ මහතා, කලක් එම විශ්වවිද්‍යාලයේ වැඩ බලන උපකුලපතිවරයා ලෙස ද කටයුතු කළේය.
එක්සත් රාජධානියේ රොබර්ට් ගෝර්ඩන් විශ්වවිද්‍යාලයේත්, විශ්ව විද්‍යාලයේත් ඕස්ට්‍රේලියාවේ සිඩ්නි විශ්වවිද්‍යාලයේත් ජ්‍යෙෂ්ඨ පරේයේෂණ සාමාජිකත්වය හිමි කරගෙන සිටින මහාචාර්ය මානගේ මහතා, සිඩ්නි විශ්විද්‍යාලයේ ජීව විද්‍යා ආයතනයේ වරලත් සාමාජිකත්වය ද හිමි කරගෙන ඇත. ජ්‍යෙෂ්ඨ මහාචාර්ය මානගේ මහතා පරිසර සම්මානයෙන් ද ශ්‍රී ලංකා නායකත්ව සම්මානයෙන් ද පිදුම් ලබා තිබේ.
අංජුල මහික වීරරත්න
0 Comments