අප්‍රිකානු රාජ්‍යයක් වන නයිජර් රාජ්‍යයේ කුමන්ත්‍රණයක් සිදුවී තිබේ. බලයෙන් පහකළ ජනාධිපතිවරයාගේ පක්ෂ මූලස්ථානයට ප්‍රහාරයක් එල්ල කර, ඊට ගිනි තබමින් පිටත මෝටර් රථවලට ගල් ගසා ගිනි තබා ඇත.
රුසියානු ධජ ප්‍රදර්ශනය කර තිබූ පාර්ලිමේන්තුවෙන් පිටත ගිනි තැබීමේ සිද්ධි වාර්තාවිය.
බදාදා ජනාධිපති මොහොමඩ් බසූම්වට හමුදාව දැන් සිය ග්‍රහණයට ගෙන ඇත. බසූම් මහතා නිදහස් කරන ලෙස ඉල්ලා රුසියාව අනෙකුත් රටවල් සහ එක්සත් ජාතීන්ගේ සංවිධානය සමඟ එක් විය.
සිකුරාදා අලුයම ප්‍රංශ විදේශ අමාත්‍ය කැතරින් කොලොනා විසින් ජනාධිපතිවරයා “යහපත් සෞඛ්‍ය තත්ත්වයෙන්” සිටින බව වාර්තා කලේය.
කොලොනා මහත්මිය AFP ප්‍රවෘත්ති ඒජන්සියට කියා සිටියේ කුමන්ත්‍රණය "අවසාන" ලෙස තමන් නොසලකන බවත්, කුමන්ත්‍රණ සැලසුම්කරුවන් ගෝලීය ප්‍රජාවට ඇහුම්කන් දෙන්නේ නම් ඔවුන්ට "ගැලවීමේ මාර්ගයක්" ඇති බවත්ය.
64 හැවිරිදි බසූම් මහතා මීට වසර දෙකකට පෙර නයිජර් ජනාධිපතිවරයා ලෙස තේරී පත් වූ අතර, බටහිර අප්‍රිකාවේ ඉස්ලාමීය සටන්කාමීන්ට එරෙහි සටනේ ප්‍රධාන බටහිර සගයකු ද විය.
එක්සත් ජනපද රාජ්‍ය ලේකම් ඇන්ටනි බ්ලින්කන් ,බසූම් මහතා ඇමතමින් කියා සිටියේ, "වොෂින්ටනයේ නොසැලෙන සහයෝගය" ලබා දෙන බවට පොරොන්දු වෙන බවයි.
නයිජර් හි මානුෂීය මෙහෙයුම් අත්හිටුවා ඇති බව එක්සත් ජාතීන්ගේ සංවිධානය පවසන අතර, අත්හිටුවීමට හේතුව කුමන්ත්‍රණයද යන්න පැහැදිලි නැත.
නයිජර් හි මිලියන හතරකට වැඩි පිරිසකට මානුෂීය ආධාර අවශ්‍ය බව එක්සත් ජාතීන්ගේ සංවිධානය මීට පෙර පවසා ඇත.
බ්‍රහස්පතින්දා, එක්සත් ජාතීන්ගේ මහලේකම් ඇන්ටෝනියෝ, ගුටරෙස් බසූම් මහතා "වහාම සහ කොන්දේසි විරහිතව" නිදහස් කරන ලෙස ඉල්ලා සිටියේය.
බසූම් මහතා බ්‍රහස්පතින්දා උදෑසන ට්වීටර් ප්‍රකාශයක් පළ කරමින් "වෙහෙස මහන්සි වී ලබාගත් ජයග්‍රහණ ආරක්ෂා කරන්න. ප්‍රජාතන්ත්‍රවාදයට සහ නිදහසට ආදරය කරන සියලුම නයිජර් වැසියන් එය දකිනු ඇත." ලෙස කියා සිටියේය.
ඔහුගේ විදේශ අමාත්‍යවරයා ද සහයෝගය ලබා ගැනීමට උත්සාහ කරමින් සිටි නමුත් හමුදා මාණ්ඩලික ප්‍රධානියා කියා සිටියේ සන්නද්ධ හමුදාවන් තුළ සටන් වැලැක්වීම සඳහා තමන් සහාය දෙන බවයි.
ජුන්ටාව (junta) එහි නායකයා ප්‍රකාශ කර නොමැති බැවින් නයිජර් පාලනය සැබවින්ම භාරව සිටින්නේ කවුරුන්ද යන්න තවමත් පැහැදිලි නැත.
රාජ්‍ය රූපවාහිනිය දේශප්‍රේමී සංගීතය සහ අල් කුරාන් වාක්‍ය සමඟ මධ්‍යම රාත්‍රියේ කුමන්ත්‍රණය ගැන නිවේදනය කලද එහි සුපුරුදු දිවා ප්‍රවෘත්ති ප්‍රකාශය විකාශනය නොවීය.
නමුත් අගනුවර වන Niamey (නිආමෙයි) හි වෙළඳසැල් සහ වෙලඳපොලවල් ව්‍යාපාර සඳහා විවෘත කර ඇති අතර උදෑසන අධික වර්ෂාව හේතුවෙන් ඇති වූ ප්‍රමාදයෙන් පසුව කුමන්ත්‍රණ ආධාරකරුවෝ වීදිවලට පැමිණියහ.
අසල්වැසි රටවල් දෙකක් වන මාලි සහ බුර්කිනා ෆාසෝ මෑත වසරවල ඉස්ලාමීය නැගිටීම් විසින් ඇතිකරන ලද කුමන්ත්‍රණ අත්විඳ ඇත.
දෙරටේම නව හමුදා නායකයින් ප්‍රංශය සමඟ විරසක වීමෙන් පසු රුසියාවට සමීප වී ඇත.
ලෝකයේ දුප්පත්ම රටක් වන නයිජර් සහරා කාන්තාරය අද්දර ඇති විශාල ශුෂ්ක රටකි. 1960 දී ප්‍රංශයෙන් නිදහස ලැබීමෙන් පසු කුමන්ත්‍රණ ගණනාවක් අත්විඳ ඇත.
0 Comments