තැපැල්පති නමින් ලියාපදිංචි කෙරුණු වාහන 42 ක් සම්බන්ධයෙන් එම දෙපාර්තමේන්තුවේ කිසිම තොරතුරක් නැතැයි ජාතික විගණන කාර්යාලය නිකුත් කළ අලුත්ම වාර්තාවක සදහන් වේ. තැපැල් දෙපාර්තමේන්තුවෙන් සහ මෝටර් රථ ප්‍රවාහන දෙපාර්තමේන්තුවෙන් ගත් තොරතුරු සැසඳීමේදී මෙම වාහනවල අඩුව පිළිබඳ කරුණු අනාවරණය වූ බවද එම වාර්තාවේ දැක්වේ. මේ සම්බන්ධයෙන් අප තැපැල්පති රුවන් සත්කුමාර මහතාගෙන් කළ විමසුමකදී ඔහු පැවසුවේ මෙම වාහන වසර 30ත් - 50ත් අතර පැරැණි ඒවා බවයි.
මෙම වාහන පිළිබඳ තොරතුරු මෝටර් රථ ප්‍රවාහන දෙපාර්තමේන්තුවේ දත්ත වාර්තාවල අඩංගුව තිබුණත් තැපැල් දෙපාර්තමේන්තුවේ භාණ්ඩ ලැයිස්තුවේ නැතැයි කී තැපැල්පතිවරයා, එම වාහන රටේ කොහේ හෝ ධාවනය වෙනවා නම් හෝ කිසිවකු හෝ ඒවාට ආදායම් බලපත්‍ර ගන්නේ නම් ඒ පිළිබඳ තොරතුරු වහාම දෙන ලෙස එම දෙපාර්තමේන්තුවෙන් ඉල්ලීමක් කර ඇති බව සඳහන් කළේය. කෙසේ වෙතත් මෝටර් රථ ප්‍රවාහන දෙපාර්තමේන්තුවෙන් එම තොරතුරු තවමත් ලබාදී නැතැයි පැවසූ සත්කුමාර මහතා, එම වාහන පිළිබඳ තොරතුරු නැත්නම් ඒවා දත්ත පද්ධතියෙන් ඉවත් කරන ලෙසටද ඉල්ලීමක් කළ බව සඳහන් කළේය.
මේ අතර තැපල් දෙපාර්තමේන්තුවේ 60 ශ්‍රී 7256 දරන බස් රථය භාවිතයෙන් ඉවත්කර තිබුණද ඒ සඳහා ඉදිරි කටයුතු කර නොතිබුණු බව විගණන වාර්තාවේ සඳහන් වේ. මේ පිළිබඳව අප තැපැල්පති රුවන් සත්කුමාර මහතාගෙන් කළ විමසුමකදී ඔහු පැවසුවේ, එම බස් රථය මුද්දර කාර්යාංශයේ ප්‍රචාරක කටයුතු සඳහා යෙදවීමට දැනටමත් පියවර ගෙන ඇති බවයි.
සුජිත් හේවාජුලිගේ
0 Comments