බ්‍රහස්පතින්දා මැලේසියාවේ උතුරුදිග ක්වාලාලම්පූර්හි අධිවේගී මාර්ගයකට කුලී ජෙට් ගුවන් යානයක් කඩා වැටීමෙන් යානයේ ගමන් ගත් 8 දෙනා ඇතුළු පුද්ගලයින් 10 දෙනෙකු මියගොස් තිබෙන බව විදෙස් මාධ්‍ය සඳහන් කරයි.
මගීන් හය දෙනෙකු සහ ගුවන් කාර්ය මණ්ඩලයේ දෙදෙනෙකු රැගත් යානය ලන්කාවි ජාත්‍යන්තර ගුවන් තොටුපළෙන් පිටත් වී සුල්තාන් අබ්දුල් අසීස් ෂා ගුවන් තොටුපළ වෙත ගමන් කර ඇති බව මැලේසියාවේ සිවිල් ගුවන් සේවා අධිකාරිය නිවේදනයක් නිකුත් කරමින් කියා සිටියේය.
“සුබන්ග් ගුවන් ගමනාගමන පාලන කුළුණ සමඟ ගුවන් යානය විසින් ප්‍රථම වරට සම්බන්ධ කර ගත්තේ දේශීය වේලාවෙන් පස්වරු 2.47 ට වන අතර ගොඩබෑමේ අවසරය පස්වරු 2:48 ට ලබා දෙන ලදී,” ප්‍රකාශයේ සඳහන් වේ. ප්‍රාදේශීය වේලාවෙන් පස්වරු 2.51 ට, “පාලක කුළුණ කඩා වැටුණු ස්ථානයෙන් දුමාරයක් නිකුත් කරන බව නිරීක්ෂණය කළ නමුත් ගුවන් යානයෙන් අනතුරු ඇමතුමක් ලබා නොදුන් බව” එම නිවේදනයේ වැඩිදුරටත් සඳහන් වේ.
ගුවන් යානය මෝටර් රථයක් සහ යතුරුපැදියක ගැටී ඇති අතර, ඒ සෑම එකක්ම එක් පුද්ගලයෙකු ගමන් කරමින් සිටි බව රාජ්‍ය පුවත්පතක් වන Berita Harian වාර්තා කළේය.
"අධිකරණ වෛද්‍ය නිලධාරීන් දේහ කොටස් එකතු කිරීමේ ක්‍රියාවලියක යෙදී සිටින අතර පශ්චාත් මරණ පරීක්‍ෂණය සහ හඳුනාගැනීමේ ක්‍රියාවලිය සඳහා ක්ලැන්ග් හි ටෙන්කු අම්පුවන් රහීම් රෝහල වෙත ගෙන එනු ඇත" යනුවෙන් ප්‍රවාහන අමාත්‍යාංශය වැඩිදුරටත් පවසයි.
ප්‍රවාහන අමාත්‍ය ඇන්තනි ලොකේ පැවසුවේ මේ සම්බන්ධයෙන් පරීක්ෂණ සිදුවෙමින් පවතින බවයි.
"කිසිවෙකු අනතුරෙන් බේරී නැත," ඔහු මාධ්‍ය හමුවකදී පැවසීය.
“පරීක්ෂණ සිදුවෙමින් පවතින බැවින් අනතුරට හේතුව කුමක්දැයි අපට දැන් කිව නොහැක,” ප්‍රවාහන අමාත්‍ය ඇන්තනි ලොකේ පැවසීය.
සාක්ෂිකරුවෙකු රොයිටර් පුවත් සේවයට පැවසුවේ තමා ඉංජිනේරුවෙකු ලෙස වැඩබිමේ වැඩ කරමින් සිටියදී පිපිරීමක් ඇසුණු බවයි. ඔහු අනතුර සිදු වූ ස්ථානයට ගොස් තුවාල ලැබූවන් දුටු බවද දන්වා ඇත.
0 Comments