ඇමරිකාවේ ටෙක්සාස් හි කාන්තාවක් 2022 දී ඇගේ හිටපු පෙම්වතාට එරෙහිව හිරිහැර කිරීමේ නඩුවක් ගොනු කළාය.නඩුවට හේතු වූයේ වෙන්වීමෙන් පසු ඇයව "ප්‍රසිද්ධියේ ලැජ්ජාවට පත් කිරීම සඳහා ඔහු ඇයගේ සමීප පින්තූර අන්තර්ජාලයේ පළ කිරීමයි.
අධිකරණ ලේඛනවලට අනුව, කාන්තාව සහ ඇගේ හිටපු පෙම්වතා 2016 දී පෙම් සබඳතාවක් ආරම්භ කළේය.
මෙම සම්බන්ධය අතරතුර කාන්තාව විත්තිකරු සමඟ සමීප ඡායාරූප බෙදාගෙන ඇත. 2021 දී වෙන්වීමෙන් පසු, ඔහු ඇයගේ අවසරයකින් තොරව සමාජ මාධ්‍ය වේදිකාවල සහ වැඩිහිටි වෙබ් අඩවිවල ඡායාරූප බෙදා හැර ඇත.
ඔහු ප්‍රසිද්ධියේ ප්‍රවේශ විය හැකි Dropbox ෆෝල්ඩරයක් හරහා ඇගේ මිතුරන්ට සහ පවුලේ අයට ඡායාරූපවල සබැඳි යවා ඇතැයි කියනු ලැබේ.
ඇයගේ දුරකථනය, සමාජ මාධ්‍ය ගිණුම් සහ විද්‍යුත් තැපෑල මෙන්ම ඇයගේ මවගේ නිවසේ තිබූ කැමරා පද්ධතියද ඔහු විසින් ඔත්තු බැලූ බවට ඔහුට චෝදනා එල්ල විය.
ඔහු එක් අවස්ථාවකදී ඇයට වක්‍රවාන්විත තර්ජනාත්මක ස්වරූපෙන් කියා තිබෙන්නේ "ඔබ ඔබේ ජීවිතයේ ඉතිරි කාලය අන්තර්ජාලයෙන් අතුගා දැමීමට උත්සාහ කර අසාර්ථක වනු ඇත. ඔබට කවදා හෝ මුණගැසෙන සෑම කෙනෙකුම කතාව අසා බලා බලා යනු ඇත" යනුවෙනුයි.
"මානසික හිංසනය, ගෘහස්ථ ප්‍රචණ්ඩත්වය සහ ලිංගික අපයෝජනවල එකතුවක් ඇති කිරීම සඳහා" ඇගේ හිටපු පෙම්වතා මෙම පින්තූර පළ කළ බව කාන්තාවගේ නීතීඥයෝ පවසති.
ඉදින් මේ කරුණු සැලකිල්ලට ගෙන බලා ඇය හිටපු පෙම්වතාට එරෙහිව හිරිහැර කිරීමේ නඩුවක් ගොනු කරන ලදී.
ඉන් අනතුරුව ටෙක්සාස් හි ජූරි සභාව කාන්තාව පළිගැනීමේ අසභ්‍ය දර්ශනවලට ගොදුරු වූ බවට තීරණය කිරීමෙන් පසු ඇයට ඩොලර් බිලියන 1.2 ක් (පවුම් මිලියන 944) ප්‍රදානය කර ඇත.
නඩුවේ ඇයගේ නීතීඥයින් කියා සිටියේ මෙම සමථය "රූපය මත පදනම් වූ ලිංගික අපයෝජනයට" ගොදුරු වූවන්ගේ ජයග්‍රහණයක් බවයි.
"මෙම නඩුවේ තීන්දුවක් අයකර ගැනීමට අපහසු වුවද, වන්දි තීන්දුව ඇයට ඇයගේ හොඳ නම නැවත ලබා දෙයි," යනුවෙන් ප්‍රධාන නඩු විභාගයේ නීතීඥ Bradford Gilde නිවේදනයක් නිකුත් කරමින් කියා සිටියා.
නීතීඥයින් මුලින් ජූරි සභාවෙන් ඩොලර් මිලියන 100 ක වන්දියක් ඉල්ලා තිබුණි.
ඔහු උසාවියට නොපැමිණි අතර ඔහු වෙනුවෙන් පෙනී සිටීමට නීතීඥයෙකු සිටි බව එක්සත් ජනපද මාධ්‍ය වාර්තා කරයි.
අතීතයේ සහ අනාගත මානසික පීඩාවන් සඳහා කාන්තාවට ඩොලර් මිලියන 200 ක් මෙන්ම පුද්ගල චරිත හානි කිරීම් සඳහා ඩොලර් බිලියන 1 ක් ගෙවීමට ඔහුට නියෝග කරන ලදී.
පසුගිය කාලය තුළ එක්සත් ජනපදයේ පළිගැනීමේ අසභ්‍ය නඩු සම්බන්ධයෙන් ඉහළ අවධානයක් යොමු විය. 2018 දී, කැලිෆෝනියාවේ කාන්තාවක් ඇගේ හිටපු සහකරු අසභ්‍ය වෙබ් අඩවිවල ඇයගේ පැහැදිලි ඡායාරූප බෙදාගැනීමෙන් පසු ඩොලර් මිලියන 6.8ක් පිරිනමන ලදී.
ඇය ටෙක්සාස් විකාශකයෙකුට පැවසුවේ ප්‍රාදේශීය පොලිසියෙන් සුළු සහයක් ලැබීමෙන් පසු ඇය සිවිල් නීතීඥවරියක් වෙත යොමු වූ බවයි.
2016 දී, ඇමරිකානුවන් මිලියන 10 ක් පමණ සම්මුතියක් නැති - හෝ පළිගැනීම් - කාමුක දර්ශනවලට ගොදුරු වූ බව වාර්තා වේ. දත්ත සහ සමාජ පර්යේෂණ ආයතනය විසින් කරන ලද අධ්‍යයනයකට අනුව ඔවුන්ගෙන් බොහෝ දෙනෙක් වයස අවුරුදු 18 සිට 29 දක්වා කාන්තාවන් වේ.
මැසචුසෙට්ස් සහ දකුණු කැරොලිනා හැර අනෙකුත් සියලුම එක්සත් ජනපද ප්‍රාන්තවල පළිගැනීම් විරෝධී අසභ්‍ය නීති ක්‍රියාත්මක වේ.
(බීබීසී ඇසුරිනි)
0 Comments