අභිරහස් ගැටලු ගොන්නක් සමඟින් ඔනේෂ් සුබසිංහ ඉන්දුනීසියාවේ ජකාර්තා හි පිහිටි සුඛෝපභෝගී මහල් නිවාසයක කාමරයක් තුළ ඝාතනය වන්නේ පසුගිය ජනවාරි මාසයේදීය. ඔහුගේ ඝාතනය ගැන කෙරුණු විමර්ශනවලට සම්බන්ධ වීමට ඔහුගේ සහෝදරයෙක් පවා ඉන්දුනීසියාවට ගොස් සිටියේය. ඒ අතර අපරාධ පරීක්ෂණ දෙපාර්තමේන්තුව විසින් දේශීය වශයෙන් මෙරටදී මෙම ඝාතනය ගැන විමර්ශනයක් පවා ආරම්භ කරනු ලැබුවේය. ඒ එම ඝාතනයේ මුල් මෙරට තිබිය හැකි බැවිනි. ඔනේෂ්ගේ ඝාතනය කාලයක් තිස්සේ කළ සැලසුමක ප්‍රතිඵලයක් ලෙස සිදුව ඇතැයි පැහැදිලිවම හෙළි වන්නේ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී මෙරිල් රංජන් ළමා හේවාගේ මෙහෙයවීමෙන් පැවති එම විමර්ශනයේදීය.
එහිදී අනාවරණය වූ අලුත්ම තොරතුර වන්නේ ඔනේෂ් ඝාතන සැලසුම ක්‍රියාත්මක කිරීම සඳහා ඔහුව ඉන්දුනීසියාවට රැගෙන යාමට සතියකට පමණ පෙර ඔනේෂ්ගේ බිරිය සහ ඇගේ මිතුරිය මීගමුවේ සංචාරක හෝටලයක දින කිහිපයක් ගත කර ඇති බවය. එහිදී ඔවුන් අමුත්තෙක් මුණ ගැසී ඇති බවට තොරතුරක් ද අනාවරණය වී ඇත. එම අමුත්තා විදෙස් ජාතිකයෙකි. සැකකරනුයේ ඔහු බ්‍රසීල ජාතිකයකු විය හැකි බවය. ඉන්දුනීසියා ගමන සංවිධානය වන්නේ ද මීගමුවේ හෝටලයේ රැඳී සිටීමෙන් අනතුරුව බව මේ වන විටත් අනාවරණය වී හමාරය.
දීර්ඝ කාලයක් තිස්සේ කළ සැලසුමකට අනුව ඝාතනය කළ ඔනේෂ්ගේ සිරුර මාස 08කට ආසන්න කාලයක් තිබුණේ ඉන්දුනීසියාවේදීය. ඒ විමර්ශන කටයුතු සඳහා එරට නීතිය ක්‍රියාත්මක කරන ආයතන විසින් මළ සිරුර රඳවා ගත් බැවිනි. අවසානයේදී මළ සිරුර මෙරටට රැගෙන ඒමට අවස්ථාවක් ලැබෙන්නේ පසුගිය 01 වෙනිදාය. ඒ ශ්‍රී ලන්කන් ගුවන් සමාගමට අයත් යූ.එල්. 365 අංකය දරන ගුවන් යානයෙනි. ඔනේෂ්ගේ මරණය සම්බන්ධයෙන් ඉන්දුනීසියාවේදී මරණ පරීක්ෂණයක් සිදු කළ ද මෙරටදී ද නැවත පශ්චාත් මරණ පරීක්ෂණයක් සිදු කිරීමට කටුනායක ගුවන්තොටුපොළ පොලිසිය අවශ්‍ය නීතිමය පියවර ගත්තේය. ඒ මෙම මරණය ඝාතනයක් වූ බැවින් සහ මේ වන විටත් ඒ සම්බන්ධයෙන් අධිකරණයට ද කරුණු වාර්තා කරමින් අපරාධ පරීක්ෂණ දෙපාර්තමේන්තුව විසින් විමර්ශනයක් ආරම්භ කර ඇති බැවිනි. මෙහිදී මළ සිරුර හඳුනා ගෙන මෙම මරණය පහරදීමෙන් සිදුවූ ඝාතනයක් බව පවසමින් පොලිසියෙන් විමර්ශනයක් ඉල්ලා සිටින්නට වූයේ ඔනේෂ්ගේ සහෝදරියක් වූ අනෝෂි සුබසිංහ මහත්මියයි. ඇය පොලිසිය හමුවේ පවසා තිබුණේ පහරදී සිය සහෝදරයාව මරා දමා ඇති බවය.
ඒ අනුව පශ්චාත් මරණ පරීක්ෂණය සිදු වන්නේ මීගමුව රෝහලේදීය.
අධිකරණ වෛද්‍ය විශේෂඥයෙක් හමුවේ සිදු කළ මෙම පශ්චාත් මරණ පරීක්ෂණයේ අවසාන තීන්දුවක් නම් තවමත් ලබා දී නැත. ඒ සිරුරේ ඇතැම් කොටස් වැඩිදුර විමර්ශන සඳහා රජයේ රස පරීක්ෂක වෙත යොමු කිරීමට අධිකරණ වෛද්‍යවරයා පියවර ගෙන ඇති බැවිනි. ඔනේෂ්ගේ මරණය සම්බන්ධයෙන් මේ වන විට අධිකරණ වෛද්‍යවරයා විසින් ලබා දී ඇත්තේ විවෘත තීන්දුවකි. එම තීන්දුව සමඟ නිදහස් කළ ඔනේෂ්ගේ සිරුර කොළඹ ප්‍රධාන මල් ශාලාවකට භාරදුන් පවුලේ සාමාජිකයන් මහජන ගෞරවය සඳහා ඉතා කෙටි කලක් එහි තබා අවසන් කටයුතු සිදු කරනු ලබන්නේ බොරැල්ල පොදු සුසාන භූමියේදීය. ඒ ඉදිරි විමර්ශනයකදී අවශ්‍යතාවක් පැන නැඟුණහොත් නැවත සිරුර ගොඩගැනීමට හැකි වන ලෙසිනි.
ඔනේෂ්ගේ සිරුර මාස 08කට ආසන්න කාලයකට පසු පවුලේ ඥාතීන්ට භාරදෙමින් එය මෙරටට රැගෙන ඒමට ඉන්දුනීසියා පොලිසිය සහ එරට නීති අංශ අවස්ථාවක් ලබාදුන්න ද මෙම ඝාතනය සම්බන්ධයෙන් කෙරන විමර්ශනවලට අදාළ කිසිදු තොරතුරක් මෙතෙක් මෙරටට නිල වශයෙන් ලබා දීමට ඔවුන් පියවර ගෙන නැත. අඩුම තරමින් මරණ පරීක්ෂණ වාර්තාව හෝ අපරාධ පරීක්ෂණ දෙපාර්තමේන්තුව අතට පත්ව නැත. ඔනේෂ් මරා දමා ඇත්තේ කෙසේ දැයි කියාවත් නිසි තොරතුරක් පැහැදිලිවම අපරාධ පරීක්ෂණ දෙපාර්තමේන්තුවේ විමර්ශකයන්ට තාමත් ඒ නිසා ලැබී නැත. එබැවින් ඒ දේවල් ලබා ගැනීමට හැකියාවක් ඇත්තේ දේශීය අධිකරණමය ක්‍රියාමාර්ගයක් ඔස්සේ සහ රාජ්‍යතාන්ත්‍රික සම්බන්ධකම් මතය.
නිවාඩුවක් ගත කිරීමට යැයි කියා ඉන්දුනීසියාවට උපක්‍රමශීලිව රැගෙන ගිය ඔනේෂ්ව නවාතැන් ගෙන සිටි තට්ටු නිවාස සංකීර්ණයේ කාමරය තුළ මරා දමන බිරියත් ඇගේ සහයිකාවත් සිවු හැවිරිදි දියණිය ද රැගෙන බ්‍රසීලයට පැන ගැනීමට ඉන්දුනීසියාවෙන් පලා යන්නේ දෝහ කටාර් වෙතය. ඒ බව මුලින්ම හෙළිකර ගන්නේ ජකාර්තා පොලිසිය විසිනි. එසේ ඉන්දුනීසියාවෙන් දෝහා කටාර් වෙත පැනගත් ඔවුන් එහි දින දෙකකට වඩා රැඳී සිට නැත. එතැනින් ඔවුන් පනින්නේ බ්‍රසීලය වෙතය. දේශීය වශයෙන් මෙරටදී සිදු වූ විමර්ශන වලින්ද පැහැදිලිවම හෙළි වී ඇත්තේ ඔනේෂ්ගේ බිරිය කටාර් හරහා බ්‍රසීලයට පැන ගන්නට කල්තියාම සැලසුම් කරගෙන සිට ඇති බවය. ඒ සඳහා ගුවන් ටිකට් පත් පවා ඇය විසින් සිය මිතුරිය සහ දියණිය වෙනුවෙන් වෙන් කරගෙන ඇත්තේ මෙරටින් පිටව යන්නටත් මත්තෙනි. ඒ මෙරට පිහිටි ගුවන් සමාගම් නියෝජිතායතනයක් මඟිනි. විමර්ශනයේදී පෙනී ගොස් ඇත්තේ ඉන්දුනීසියාවේ ජකාර්තා සිට දෝහා කටාර් හරහා බ්‍රසීලය බලා යාමට ඔනේෂ්ට ගුවන් ටිකට්පත් වෙන්කර ගෙන නැති බවය. ඒ අනුව අපරාධ පරීක්ෂණ දෙපාර්තමේන්තුවේ විමර්ශකයන්ට පැහැදිලිවම පෙනී ගොස් ඇත්තේ ඔනේෂ් ඝාතනය කර බ්‍රසීලයට පැන ගන්නට කල්ඇතිව මෙරටදී සැලසුම් කළ එකක් බවය.
ඉන්දුනීසියාවේ සිදු වූ ඝාතනයක් සම්බන්ධයෙන් අපරාධ පරීක්ෂණ දෙපාර්තමේන්තුවෙන් දේශීය වශයෙන් මෙවන් විමර්ශනයක් ආරම්භ කිරීමට මුල්වන්නේ පොලිස්පති සී. ඩී. වික්‍රමරත්නගේ නියෝගයකට අනුවය. ඒ ඔනේෂ්ගේ සහෝදරයා වන දිනේෂ් සුබසිංහ විසින් කළ ඉල්ලීමක් පදනම් කරගෙනය. එම ඉල්ලීම පැමිණිල්ලක් බවට පරිවර්තනය කරගනිමින් පොලිස්පතිවරයා අපරාධ පරීක්ෂණ දෙපාර්තමේන්තුවට දැනුම් දෙන්නේ ඔනේෂ්ගේ ඝාතනය සම්බන්ධයෙන් පෙර සූදානමක් මෙරටදී තිබුණේ දැයි විශේෂ අවධානයක් යොමු කරමින් විමර්ශන අරඹන ලෙසය. ඒ රටින් බැහැර සිදුවූ ඔනේෂ්ගේ ඝාතන විමර්ශනයට දේශීය වශයෙන් මැදිහත් වීමකට ඉඩක් ලැබෙන්නේ ඒ ඔස්සේ වන බැවිනි. ඒ අනුව අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධිකාරී කාවින්ද පියසේකර මෙම විමර්ශනය පවරනු ලබන්නේ සහකාර පොලිස් අධිකාරී මෙරිල් රංජන් ළමාහේවා යටතේ ඇති විමර්ශන අංශයකටය. දක්ෂ අපරාධ විමර්ශකයන් රැසකගෙන් සමන්විත එම විශේෂ අංශය විසින් ඔනේෂ්ගේ ඝාතනය සම්බන්ධයෙන් වූ දේශීය විමර්ශනයට මුල පුරන්නේ ඔනේෂ් සිය බිරිය හා දියණිය සමඟ පදිංචිව සිටි කොළඹ 07 රොස්මිඩ් පෙදෙසේ පිහිටි සුවිසල් නිවෙසිනි. ඔනේෂ්ගේ ඝාතනය ඉන්දුනීසියාවේදී සිදු වුවත් එම ඝාතනයේ පූර්ව සැලසුම් සැකසී ඇත්තේ මෙරටදී බව අපරාධ පරීක්ෂණ දෙපාර්තමේන්තුවට පැහැදිලිවම පෙනී යන්නේ ද එහිදීය.
මේ කියන බ්‍රසීල ජාතික බිරිය ඔනේෂ්ගේ තෙවැනි විවාහක බිරියයි. විවාහ දෙකක්ම ආසාර්ථක වී සිටි ඔනේෂ්ට රොසැලියා මුණගැසෙන්නේ වසර පහ හයකට පෙර බ්‍රසීලයේ කළ සංචාරයකදීය. ඒ අවන්හලකදීය. පැවසෙන ආකාරයට ඇය එම අවන්හලේ හිමිකාරිනියයි. මුල් හමුවීමෙන් දෙදෙනා අතර හිතවත්කම දලු ලා යන්නේ ඔනේෂ් බ්‍රසීලයේ ගත කළ කෙටි කාලය තුළ ඇය සමඟ ඉතාම සමීප වෙමිනි. අලීෂා මෙලොව එළිය දකින්නේ එදා ඔවුන් දෙදෙනා අතර වූ සමීප ඇසුරේ ප්‍රතිඵලයක් ලෙසිනි. ඔනේෂ් සහ රොසැලියා අතර 2018 වසරේදී හෙළ සිරිතට අනුව විවාහය පවා සිදු වන්නේ අලීෂා නිසාය. එදා ගැබිනියක්ව සිටි රොසැලියාව බ්‍රසීලයේ සිට මෙරටට ගෙන්වා ගෙන හැම සැප සම්පතක්ම දෙමින් ඇයව රැකබලා ගන්නට ඔනේෂ් වගබලා ගන්නේ ඇගේ කුස තුළ වැඩෙමින් සිටි අලීෂා වෙනුවෙනි. ඒ ඇය ඔනේෂ්ගේ එකම දරුවා වූ බැවිනි.
අලීෂාට දැන් වයස අවුරුදු 04කි. ඇය අධ්‍යාපනය ලැබුවේ බොරැල්ලේ පිහිටි ජාත්‍යන්තර පාසලකිනි. රොස්මිඩ් පෙදෙසේ පදිංචියට ඔනේෂ් එන්නේ ද අලීෂාට පාසල් යන්නට එන්නට ඇති පහසුව ගැන සිතාය. ඒ අලීෂාට සිය පණටත් වඩා ඔනේෂ් ආදරය කරන්නට වූ බැවිනි. ඇය වෙනුවෙන්ම නිවෙසේ මෙහෙකාරියන් කිහිප දෙනෙක් ද රඳවා තැබුවේ ඒ නිසාම විය හැකිය.
අපරාධ පරීක්ෂණ දෙපාර්තමේන්තුවේ විමර්ශන නිලධාරීන් ඒ හැම සේවිකාවකගෙන්ම පාහේ ප්‍රශ්න කරන්නට අමතක නොකළේය. ඒ ඔනේෂ් සහ රොසැලියා අතර ඒ වන විට පැවති සම්බන්ධය ගැන යම් අවබෝධයක් ලබා ගන්නටය.
“අලීෂා බේබි හම්බ වෙන්න ඉන්නකොට, දෙන්න හිටියේ කිරියි පැණියි වගේ. හරිම සතුටින් හිටියා. හැබැයි අලීෂා බේබිව හම්බ වෙලා අවුරුද්දක් විතර යන කොට රෝසා නෝන ටිකෙන් ටික වෙනස් වෙන්න ගත්තා.“ මේ කතාව කියන්නට ගත්තේ අලීෂාව කුඩා කල සිට බලා කියා ගත් පුෂ්පරාණිය. ඇය මේ පවුලට ඉතා ළෙන්ගතු මෙහෙකාරියක් වූවාය.
“රෝසා නෝනාට කොච්චර සැලකුවත් මදි. එයාට සලකන්නේ නැහැ කියල සර් එක්ක රණ්ඩු වෙනවා”යැයිද ඇය කියන්නට වූවාය.
පුෂ්පරාණි මේ කියන දේ කැටි කරගත් විට අපරාධ පරීක්ෂණ දෙපාර්තමේන්තුවේ විමර්ශකයන්ට පෙනී ගියේ ඔනේෂ් සහ ඔහුගේ බ්‍රසීල ජාතික බිරිය අතර ඒ වන විට විවාහය දෙදරා යන තරමට මත ගැටුම් පැන නැඟෙමින් තිබී ඇති බවය. මේ හැමදෙයකම ආරම්භය සිදු වන්නේ අලීෂාගේ පළමු උපන්දිනයෙන් පසුවය.
මෙම නිවෙසේ තවත් මෙ‍ෙහකාරියක් වූ දේවදානි මේකලාගෙන් ද ප්‍රශ්න කිරීමේ හමුවේ අපරාධ පරීක්ෂණ දෙපාර්තමේන්තුවේ විමර්ශකයන්ට පෙනී යන්නට වූයේ ඔනේෂ් සහ රොසැලියා අතර සමාජයට පෙනෙන්නට හොඳ පවුල් ජීවිතයක් තිබුණත් යහපත් පවුල් සම්බන්ධයක් නිවෙස තුළ නොතිබී ඇති බවය.
“ලංකාවේ ඉන්න බැහැ, මම මගේ රටට යනවා. කියමින් රෝසා නෝනා සර් එක්ක නිතර රණ්ඩු වෙනවා. නෝනා රණ්ඩු වෙන හැටි දැක්කම එයා සර් ව මරයි කියලත් හිතුණා” අපරාධ පරීක්ෂණ දෙපාර්තමේන්තු විමර්ශකයන් හමුවේ දේවදානි මේකලා කියන්නට වූවාය.
“දවසක් මහත්තයා අපට කතා කරලා කිවුවා, දරුවා අරන් රෝසා නෝනා බ්‍රසීලයට යන්න හදනවා කියලා. මම උඹව කවදාහරි මරනවා කියල රෝසා නෝනා සර්ට තර්ජනය කළා කියලත් කිවුවා.” දේවානි මේකලා මේ දේවල් පවා අපරාධ පරීක්ෂණ දෙපාර්තමේන්තුවේ විමර්ශකයන් හමුවේ කියන්නට ගත්තාය.
මේ දේවල් තවත් සේවිකාවක් වූ ප්‍රියංගනී චන්ද්‍රලතා ද තහවුරු කළා පමණක් නොව, අලීෂාව රැගෙන රොසැලියා බ්‍රසීලය බලා හොර රහසේ යන්නට ඉඩ ඇති බැවින් ඒ ගැන අවධානයෙන් සිටින ලෙස ඔනේෂ් පැවසූ බව ද අපරාධ පරීක්ෂණ දෙපාර්තමේන්තු විමර්ශකයන් හමුවේ කියා සිටියාය. මේ දේවල් කියා තිබුණේ නිවෙසේ සිටි මෙහෙකාරියන් සියලු දෙනාටමය. ඒ නිසා හැම සේවිකාවක්ම මේ හැමදෙයක්ම කියන්නට වූයේ සිය හාම්පුතාගේ මරණය රොසැලියා සැලසුම්සහගතව කළ එකක් බව අපරාධ පරීක්ෂණ දෙපාර්තමේන්තුවේ විමර්ශකයන්ට තහවුරු කර ගැනීමට ඕනෑවටත් වඩා තොරතුරු ලබා දෙමිනි.
මෙහිදී අපරාධ පරීක්ෂණ දෙපාර්තමේන්තුවේ නිලධාරීන්ට පෙනී යන්නේ රොසැලියා එන්න එන්නම දරුණු වෙමින් ඔනේෂ්ව මරා දමන බව එළිපිටම තර්ජනය කරන තැනට පවා පත්වී සිටි බවය.
“මට මෙහේ ඉන්න බැහැ, මේ කෑම කන්න බැහැ, මට යන්න නොදුන්නොත් මම කවදාහරි උඹව මරනවා “ යැයි රොසැලියා ඔනේෂ්ට කිහිපවිටක්ම තර්ජනය කළ බවට ඇසින් දුටු සහ කනින් ඇසුණු සාක්ෂි ඕනෑවටත් වඩා රොස්මිඩ් පෙදෙස් පිහිටි නිවෙසේ මෙහෙකාරියන්ගේ කටින් එළියට ආවේය.
ඇය දිගින් දිගටම ඔනේෂ්ගෙන් බල කරමින් ඉල්ලා ඇත්තේ ඇගේ රටට යන්නට අවස්ථාවක් දෙන්නට යැයි කියාය. ඒ ඇගේ විදෙස් ගමන් බලපත්‍ර තිබී ඇත්තේ ඔනේෂ් සතුව වූ බැවිනි. කන්න බොන්න අඳින්න පලඳින්න වගේම සමාජ ශාලාවල කරක් ගසන්නට පවා ඇති තරම් මුදල් ඔනේෂ්ගෙන් ඇයට ලැබුණත් කුමක් හෝ හේතුවක් මත ඇගේ හිත ඒ වන විට තිබී ඇත්තේ බ්‍රසීලයේ බව මේ හැමදෙයක්ම විශ්ලේෂණය කිරීමේදී අපරාධ පරීක්ෂණ දෙපාර්තමේන්තුවේ විමර්ශකයන්ට පෙනී ගියේය.
රොසැලියාගේන් එල්ල වන පීඩනය ඒ වන විටත් ඉවසා ගත නොහැකිව සිටි ඔනේෂ් ඇගෙන් නීතියෙන් වෙන් වීමට සැලසුම් කරගෙන සිටියේ යැයි කියා අපරාධ පරීක්ෂණ දෙපාර්තමේන්තුවේ විමර්ශකයන් හමුවේ අනාවරණය කරනුයේ ඔනේෂ්ගේ සහෝදරියගේ සැමියාය. ඔහු ලාල් අරවින්දය. ඒ බව රොසැලියා දැන සිටියේ දැයි පැහැදිලි නැතත් ඇය සිය මිතුරියව මෙරටට ගෙන්වා ගන්නේ ඔය අතරතුරදී බව අපරාධ පරීක්ෂණ දෙපාර්තමේන්තුවේ විමර්ශකයන්ට පෙනී ගියේය. ඇය රොසැලියාගේ සමීපතම මිතුරියක් වූවාය. ඇය මෙරටට ආ පසු රොසැලියාගේ හැසිරීම් මුළුමනින්ම වෙනසකට ලක් වන්නේ ඇයගෙන් දික්කසාද වන්නේදැයි ඔනේෂ්ට දෙවරක් සිතන්නට ඉඩක් තබමිනි. අපරාධ පරීක්ෂණ දෙපාර්තමේන්තු විමර්ශකයන්ට පෙනී ගොස් ඇත්තේ මේ සියල්ලක්ම සිදු වෙමින් තිබී ඇත්තේ යම් සැලසුමකට අනුව බවය.
ඉන්දුනීසියා ගමන පවා සංවිධානය වී ඇත්තේ රොසැලියාගේ පෙරැත්තමතය. රොසැලියාගෙන් තමාට ජීවිත තර්ජනයක් පවා එල්ල වී තිබියදී ඔනේෂ් ඉන්දුනීසියා සංචාරයට ඇතැම් විට එකඟ වන්නට ඇත්තේ ඇගේ ඒ වෙනස්වීම තවදුරටත් නොකැඩුණු පවුල් ජීවිතයක් ගත කිරීමට ආරම්භයක් වනු ඇතැයි සිතාගෙන විය හැකිය. සිදු වන්නේ ඔනේෂ්ව ගැහැනු ගැටයකට හසු කරගනිමින් ඇය ඔහුව ඉන්දුනීසියාවට රැගෙන යාමය.
දෙස් විදෙස් වෙළදපොළ වෙත දියර පොහොර බෙදා හරින ජාත්‍යන්තරය ජයගත් දැවැන්ත සමාගමක හිමිකරුවෙක් මෙන්ම තවත් සමාගම් 32ක ආයෝජකයෙක් වූ ඔනේෂ් ඒ වන විට සිටියේ තවත් ව්‍යාපාර රැසකට සිය අයෝජන අවස්ථා පුළුල් කරමින් ව්‍යාපාරික ලෝකයේ ඉහළට යමිනි. එබැවින් ඔහු ඒ වන විට සිටියේ කාර්යබහුලත්වයෙනි. ඉන්දුනීසියා සංචාරයක යන්නට තරම් විවේකයක් නොමැති වූවත් ඔහු ඉන්දුනීසියා ගමන යන්නේම සිය බිරියගේ සහ දියණියගේ සතුට වෙනුවෙනි. ඒ අනුව ජනවාරි 19 වෙනිදා සිය බිරියත් දියණියත් බිරියගේ මිතුරිය වූ සහායිකාවත් සමඟ ඉන්දුනීසියාවට ගිය ද ඔනේෂ් වැඩි කාලයක් කැපකරනු ලැබුවේ ව්‍යාපාරික කටයුතු වෙනුවෙනි. ඒ ඔහු ඉන්දුනීසියාවේ සිටියත් ඔහු දුරකතනය ඔස්සේ හැම විටම රැඳී සිටියේ මෙරට පිහිටි කාර්යාලය සමඟිනි.
රොසැලියා මෙම ඉන්දුනීසියා සංචාරය සැලසුම් කරනුයේ ඔනේෂ් අත ඇති සිය විදෙස් ගමන් බලපත්‍රය සියතට ගැනීමේ කූට සැලසුමක් ඇතිව බව අපරාධ පරික්ෂණ දෙපාර්තමේන්තුවේ විමර්ශකයන්ගේ සැකයට ලක්ව ඇති කරුණකි. සිය විදෙස් ගමන් බලපත්‍රය ඇයට සියතට ගැනීමට ඇති එකම මඟ මෙය බව වටහාගෙන සිය සහායිකාව ද ගෙන්වා ගෙන ඇය ගැසුවේ ලොකු ගේමක් බව දැන් පැහැදිලිය. අපරාධ පරීක්ෂණ දෙපාර්තමේන්තුවේ විමර්ශකයන්ට පෙනී ගොස් ඇත්තේ සහායිකාව මෙරටට පැමිණ රැඳී සිටි මාස හතරක කාලය තුළ ද ඔවුන් මෙරටින් පලා යාමට හැම උත්සාහයක්ම ගෙන ඇති බවය. ඒ වැඩේ අසාර්ථක වී ඇත්තේ ඔනේෂ් මේ අයගේ විදෙස් ගමන් බලපත්‍ර ඔහු සතුව තබාගෙන සිටි බැවිනි. මෙවන් තත්ත්වයක් මත ශ්‍රී ලංකාවේ රැඳී සිටිමින් තමන්ට බ්‍රසීලයට යාමට ඉඩක් නොලැබෙන බව වටහා ගත් ඔවුන් ඉන්දුනීසියානු සංචාරය සංවිධාන කර ඇති බව අපරාධ පරීක්ෂණ දෙපාර්තමේන්තුවේ විමර්ශකයන්ට මූලික විමර්ශනවලින් පෙනී ගියේය.
ඉන්දුනීසියාවේදී රොසැලිනාට සිය සහායිකාවගේ සහය ද ඇතිව දියණියත් රැගෙන ඔනේෂ්ගේ ඇස් වසා බ්‍රසීලයට පැන ගන්නට ඇති තරම් අවස්ථාවක් තිබුණත් ඔනේෂ්ව ඝාතනය කරනු ලැබුවේ ඇයිදැයි මෙතෙක් ඇත්තේ අභිරහසක් ලෙසිනි. ඇතැම් විට ඉන්දුනීසියාවට ජනවාරි 20 වෙනිදා පය තැබූ පසු ඇතිවූ සැකයක් මත රොසැලියාගේ විදෙස් ගමන් බලපත්‍රය තිබෙන්නට ඇත්තේ ඔනේෂ් සතුව බවට යම් උපකල්පනය කළ හැකිය. ඔනේෂ්ගේ මරණය සිදු වන්නේ එම විදෙස් ගමන් බලපත්‍රය ගැනීමට යාමේදී ඇතිවුණු යම් සිදු වීමක් හේතුවෙන් බවට සැකයක් මතු කළ හැකිය. ඔනේෂ්ගේ මරණය සම්බන්ධයෙන් වූ මෙම කොටස ගැන යමක් කියන්නට හැකියාව ඇත්තේ ඉන්දුනීසියාවේ ජකාර්තා පොලිස් විමර්ශකයන්ටය. ඔවුන් මෙතෙක් ඒ ගැන කිසිවක් පවසා නොමැති බැවින් මෙරට විමර්ශකයන්ට ඒ ගැන ඇත්තේ තවමත් ප්‍රශ්නාර්ථයක් පමණි.
අපරාධ පරීක්ෂණ දෙපාර්තමේන්තුවේ විමර්ශකයන් මෙතෙක් සිදුකර ඇත්තේ ඔනේෂ්ගේ ඝාතනය දේශීය වශයෙන් සිදු කළ සැලසුමකට අනුව ඉන්දුනීසියාවේදී කර ඇති බවට තහවුරු වන තොරතුරු රැස් කිරීමක් පමණි. මේ සම්බන්ධයෙන් අධිකරණයට ද කරුණු වාර්තා කර හමාරය. ඒ ඔස්සේ මෙම ඝාතනයට වගකිවයුතු ඔනේෂ්ගේ බිරිය සහ ඇගේ මිතුරිය අත්අඩංගුවට ගැනීමට ජාත්‍යන්තර පොලිසිය මඟින් රතු නිවේදනයක් ලබා ගැනීමට හැකියාවත් තිබේදැයි කියා නීතිමය සොයා බැලීම්ද මේ වන විට සිදු වෙමින් ඇත. ඒ මෙතෙක් කර ඇති විමර්ශන ගොනු නීතිපතිවරයා වෙත ඉදිරිපත් කරමිනි. ඔනේෂ්ගේ ඝාතන විමර්ශනයේ ඉදිරි පියවර තැබීමට අපරාධ පරීක්ෂණ දෙපාර්තමේන්තුව දැන් සූදානමින් සිටින්නේ නීතිපතිවරයාගෙන් ලැබෙන උපදෙස්වලට අනුවය.
ගයාන් කුමාර වීරසිංහ
0 Comments