හෝමාගම පිටිපන පන්සල් හන්දිය ප්‍රදේශයේ නිවාස සංකීර්ණයට යන මාර්ගයක කොටසක බුද්ධ මන්දිරයක් ඉදි කිරීමට යාමේදී දෙපාර්ශ්වයක් අතර ඇති වූ ගැටලුවක් මත එම ස්ථානයේ තැන්පත් කිරීමට ඊයේ (06) දින වඩම්වා තිබූ බුදු පිළිමයක් හෝමාගම මූලස්ථාන පොලිසිය වෙත තාවකාලිකව වැඩම කරවීමට කටයුතු කළ බව හෝමාගම මූලස්ථාන පොලිසිය පවසයි.
තමන්ගේ අකැමැත්ත මත අදාළ මාර්ගයේ බුද්ධ මන්දිරයක් ඉදි නොකරන ලෙසට එම මාර්ගයේ ජීවත්වන පිරිසක් කළ පැමිණිල්ලක් මත මෙලෙස පොලිස් කණ්ඩායමක් අදාළ බුද්ධ මන්දිරය ඉදි කිරීම තාවකාලිකව නැවැත්වීමට කටයුතු කළ බවද පොලිසිය පවසයි. එම අවස්ථාවේදී බුද්ධ මන්දිරයේ තැන්පත් කිරීම සදහා වඩම්වා තිබූ බුදු පිළිමය තැබීමට ස්ථානයක් නොවූයෙන් මෙලෙස පොලිසියට වැඩම වීමට සිදු ව ඇත.
අදාළ මාර්ගයේ මෙලෙස බුද්ධ මන්දිරයක් තැනීමට හෝමාගම ප්‍රාදේශීය සභාව මගින් අනුමැතිය ලබා දී නොමැති බවත් තම නිවසට යන මාර්ගයේ මෙලෙස බුද්ධ මන්දිරයක් තැනීම නිසාවෙන් තම රථ වාහන රැගෙන යාමට අපහසු වන බවත් ඒ ආසන්නයේම විහාරස්ථානයක් තිබෙන බැවින් මෙලෙස බුද්ධ මන්දිරයක් අවශ්‍ය නොවන බවත් පැමිණිලි පාර්ශ්වය විසින් පවසා ඇත.
අනෙක් පාර්ශ්වය පවසා ඇත්තේ පදිංචිකරුවන්ගෙන් ලිඛිත අවසරය ලබා ගත් බවයි. මේ වන විට බුද්ධ මන්දිරයේ කොටසක් ඉදිකර ඇති බවත් ඒ නිසාවෙන් මේ පිළිබදව නිවරැදිවම හෝමාගම ප්‍රාදේශීය සභාවෙන් විමසා ඉදිරි කටයුතු සදමා අවසර දෙනවාද නැද්ද යන්න තීරණය අද (7) දින ගන්නා බව ද හෝමාගම මූලස්ථාන පොලිසිය පැවසීය.
මීගොඩ - බී. කේ. කත්‍රිආරච්චි
0 Comments