රත්මලාන දුම්රිය නිවාස සංකීර්ණයේ පිහිටි ශ්‍රී ලංකා දුම්රිය සේවයේ තාක්‍ෂණ ශිල්පී සංගමයේ මූලස්ථාන පාළු නිවෙසකදී ඇතිවූ ආරවුලක් මත පෙරේදා (12) පිහියකින් ඇන පුද්ගලයකු ඝාතනය කර ඇතැයි ගල්කිස්ස පොලීසිය පවසයි.මෙලෙස ඝාතනයට ලක්ව ඇත්තේ දුම්රිය නිවාස සංකීර්ණයේ මෙම මූලස්ථානයේ පදිංචිව සිටි තාක්‍ෂණ ශිල්පී තනතුරක් දරන කේ. ඉන්දික හේමන්ත (41) නමැති අයෙකි.පිහි ඇනුම සිදුකළ පුද්ගලයා සහ ඝාතනයට යොදාගත් තියුණු උල් පිහියද භාරයට ගත් බව පොලීසිය කියයි.
මෙම සිදුවීම පෙරේදා (12) වන දින ප.ව. 2.20ට පමණ සිදුවී ඇති අතර, පිහි ඇනුම සිදුකළ පුද්ගලයාගේ බිරිඳ සමග මියගිය පුද්ගලයා අනියම් සම්බන්ධතාවක් පවත්වන බවත් ඔහු මෙදින සිය බිරිඳ මෙම පාළු නිවෙසට කැඳවාගෙන විත් දොරගුළුලාගෙන සිටින බව රහසිගත තොරතුරක් මත දැනගෙන පිහි ඇනුම සිදුකළ පුද්ගලයා බිරිඳගේ පියාද සමග ස්ථානයට පැමිණ ඇත.ඒ වනවිටත් දෙදෙනා ඇතුළත දොරගුළුලාගෙන සිට ඇති අතර දොර විවර නොකළ නිසා එය කඩා ඇතුළුවී සැකකරු මියගිය අයට පුටුවකින් පහරදී ඇති අතර, අනතුරුව එළියට ගෙන පිහියකින් පපු පෙදෙසට පිහිපහර එල්ලකර ඇතැයි පොලිසිය පවසයි.
ඒ අනුව එහි සිටි ත්‍රීරෝද රථ රියදුරකු හා ප්‍රදේශවාසීන් 1990 ගිලන් රථයක් කැඳවා දකුණු කොළඹ රෝහලට ඔහු ඇතුළත් කරන විටත් මිය ගොස් සිටි බව පොලීසිය කියයි.වැඩිදුර පරීක්‍ෂණ ගල්කිස්ස වැඩබලන මූලස්ථාන ප්‍රධාන පොලිස් පරීක්ෂක සුදත් තේනුවර මහතාගේ ප්‍රධානත්වයෙන් අපරාධ අංශයේ ස්ථානාධිපති පොලිස් පරීක්ෂක නාලක අලහකෝන් මහතා ඇතුළු නිලධාරීහු සිදු කරති.
එච්.එම්. ධර්මපාල
0 Comments