පෘථිවියට ආසන්නයෙන් ගමන් කරන Bennu ග්‍රාහකයෙන් ලබාගත් පාෂාණ සාම්පල තුළ ජලය සහ කාබන් මෙන්ම යකඩ පවතින බව නාසා ආයතනය සදහන් කරයි. එම ග්‍රාහකයෙන් ලබාගත් සාම්පල පුරා වසර හතක මෙහෙයුමකින් පසුව පසුගියදා පෘථිවිය වෙත රැගෙන ඒම සිදු වූ අතර, මේ වනවිට එම පාෂාණ සාම්පල පිළිබඳ විද්‍යාගාර පරීක්ෂණ සිදු කෙරෙමින් පවතී.
මෙහිදී ග්‍රාහකයේ මතුපිට තිබූ පාෂාණ අතරින් ග්‍රෑම් 250ක පමණ ප්‍රමාණයක් මෙලෙස පෘථිවිය වෙත රැගෙන ඒමට නාසා ආයතනයේ OSIRIS-Rex මෙහෙයුමේ කැප්සූලයට හැකිවිය. මෙම ග්‍රාහකය පෘථිවිය බිහිවූ අදින් වසර බිලියන 4.5කට පමණ පැරණි ග්‍රාහකයක් වන බවත්, එය සෑදී ඇති සංඝටක අනුව පෘථිවියේ ආරම්භය පිළිබඳව තොරතුරු ලබාගත හැකි බවත් විද්‍යාඥයන්ගේ අදහස වී තිබේ.
"මෙය තමයි එතෙක් මෙතෙක් පෘථිවිය වෙත රැගෙන ආ කාබන් බහුලතම ග්‍රාහක සාම්පලය. එහි සමස්ත ස්කන්ධයෙන් 5%ක්ම ඇත්තේ කාබන්. එහිදී එම කාබන් කාබනික සහ ඛනිජ යන දෙආකාරයෙන්ම පවතිනවා. ඒ වගේම මැටි ඛනිජවලින් සැකසුනු ස්ඵටික තුළ ජලය අඩංගුව පවතිනවා.” යනුවෙන් නාසා පරිපාලන නිලධාරි බිල් නීල්සන් හූස්ටන්හි ජොන්සන් අභ්‍යවකාශ මධ්‍යස්ථානයේදී පැවැති මාධ්‍ය හමුවකදී පවසා තිබේ.
කෙසේ වෙතත්, මෙම සොයාගැනීම එම පාෂාණ සාම්පල පිළිබඳව සිදුකළ මූලික විශ්ලේෂණය අනුව සිදුකළ බවත්, එහිදී එම සාම්පල ඉලෙක්ට්‍රෝන මයික්‍රොස්කොපි, එක්ස්රේ ඇතුළු ස්කෑන් ක්‍රමවේදෙ කිහිපයක් යටතේ පරීක්ෂාවට ලක්කර ඇති බවත් නාසා ආයතනය පවසයි. එසේම මෙම පාෂාණ සාම්පලයේ ඇති පාෂාණ සහ දූවිලිවල ඇති රහස් පිළිබඳ අධ්‍යයනය කිරීම ඉදිරි දශක කිහිපය පුරාම සිදු කෙරෙනු ඇති බවත් එම ආයතනයේ අපේක්ෂාව වී ඇත.
"ඒ හරහා අපගේ සෞරග්‍රහ මණ්ඩලය කෙසේ නිර්මාණය වුණේද යන්න පිළිබඳ තොරතුරු වගේම, පෘථිවිය මත ජීවීන් බිහිවූයේ කෙසේද යන්න ගැනත් දැනගත හැකිවේවි. මීට අමතරව, අනාගතයේදී අපගේ පෘථිවිය වෙත ග්‍රාහක කඩාවැටීම වැළැක්වීම සදහා ගතහැකි මූලික පියවර ගැනත් අපිට මින් තොරතුරු ලැබේවි.” යනුවෙන් නාසා ආයතනය නිවේදනයක් මගින් සදහන් කර තිබේ.
0 Comments