මෙරට වයස අවුරුදු 18ට අඩු දරුවන් මැලේසියාව හරහා වෙනත් රටවලට යැවීමේ ජාවාරමක් සම්බන්ධයෙන් ආගමන විගමන පාලක ජනරාල්වරයා විසින් ලබාදුන් තොරතුරුක් මත විමර්ශනයක් ආරම්භ කර තිබෙන බව පොලිස් මාධ්‍ය කොට්ඨාසය සඳහන් කරයි.
උතුරු, නැගෙනහිර ප්‍රදේශවල වයස අවුරුදු 18ට අඩු දරුවන් මැලේසියාවට යවන බවත් මෙය මිනිස් ජාවාරමක්ද යන්න අනාවරණය කරගැනීම සුදුසු බව ආගමන විගමන පාලක ජනරාල්වරයා දන්වා එවා තිබූ බවත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාර් නීතිඥ නිහාල් තල්දූව මහතා සඳහන් කළේය.
මේ අනුව අපරාධ පරීක්ෂණ දෙපාර්තමේන්තුවේ තැනැත්තන් වෙළෙඳාම, ජාවාරම් විමර්ශන හා සමුද්‍රීය අපරාධ කොට්ඨාසය විමර්ශනයක් ආරම්භ කර තිබෙන බවත් මෙරට අවුරුදු 18ට අඩු දරුවන් දෙමාපියන් හෝ ඥාතීන් සමග නීත්‍යනුකූලව මැලේසියාවට රැගෙන ගොස් තිබෙන බවට තොරුතුරු ලැබී තිබෙන බවද පවසා සිටියේය.
මැලේසියාවේදී ව්‍යාජ ගමන් බලපත්‍ර සකස් කර ප්‍රංශය, බ්‍රිතාන්‍ය යන රටවල් වෙත යොමු කරන බව නිරීක්ෂණය වී තිබෙන බවත් මෙවැනි සිද්ධීන් 13ක් පිළිබඳව ව්මර්ශන ආරම්භ කර තිබෙන බවත් අදාළ පුද්ගලයන්ගෙන් ප්‍රකාශ සටහන් කර ගැනීම් සිදුකරමින් තිබෙන බවද සඳහන් කළේය.
මෙතෙක් සිදුකළ විමර්ශනවලට අනුව මෙය මිනිස් ජාවාරම් ක්‍රියාවක්ද යන්න මෙතෙක් අනාවරණය වී නොමැති බවත් එහෙත් අදාළ විමර්ශන අඛණ්ඩව සිදුකරමින් තිබෙන බවද පවසා සිටියේය.
ඉන්දික හේවාවිතාරණ
0 Comments