ඕමාන් රාජ්‍යයේ ගෘහ සේවිකාවක ලෙස සේවයට ගිය ආණමඩුව කුමාරගම 39 හැරිදි අවිවාහක කාන්තාවක පස් මහල් ගොඩනැගිල්ලකින් පැන දිවි නසාගත් බව පවසමින් ඇයගේ සිරුර මෙරටට එවා ඇතැයි ඥාතීහු පවසති.
ආණමඩුව කුමාරගම පදිංචි 39 හැවිරිදි ජේ.ඒ. ශිරෝමි ප්‍රදිප් ජයකොඩි නමැති අවිවාහක කාන්තාවකගේ සිරුර මෙලෙස ඥාතීන්ට බාර දී තිබේ.
මෙසේ අබිරහස් ලෙස මරණයට පත්ව ඇති කාන්තාව දරුවන් හය. දෙනකුගෙන් සමන්විත පවුලේ දෙවැනියා බවත් ඇය තම මව හා පියා ජීවත් කරමින් විදේශ රැකියාවල නිරත වී ඇති බවත් කියයි.
මෙම කාන්තාවගේ මව, පියා ඇතුළු සහෝදර සහෝදරියන් පවසන්නේ ගොඩනැගිල්ලකින් පැන දිවි නසා ගැනීමට තරම් ප්‍රශ්න ඇයට නොතිබූ බවයි.
කෙසේ වෙතත් මෙම කාන්තාව ව්‍යාජ රැකියා ඒජන්සියක් පවත්වාගෙන යනු ලබන නිකවැරටිය කොටහෙර ප්‍රදේශයේ පුද්ගලයකු හලාවත පදිංචිකරුවකු හරහා සංචාරක වීසා ලබා දෙමින් වංචනික අයුරින් රවටමින් මෙසේ රැගෙන ගොස් ඇති බවට ඥාතීහු චෝදනා කරති.
මෙම කාන්තාව වසර 18ක කාලයක් කුවේට්, සවුදි ඇතුළු රටවල් රැසක ගෘහ සේවිකාවක ලෙස සේවය කරමින් එම රටවල දී කිසිදු හිරිහැරයකට ලක් නොවී ඉතාමත් හොදින් සේවය කර ලංකාවට පැමිණ ඇති බව ඥාතීහු කියයි.
ඇය පසුගිය කොරෝනා සමයේ ලංකාවට පැමිණ ඉන් පසුව මෙම වසරේ ජූලි මාසයේ 20 වැනිදා ඕමාන් රැකියාවට මෙසේ යාමෙන් පසු ඉරණමට මුහුණ පා ඇති බව කියයි.
ඇයගේ පවුලේ පිරිස් චෝදනා කරන්නේ ව්‍යාජ ලිපිලේඛන සකසමින් ඇය ඕමානයේ ගෟහ සේවිකාවක ලෙස රැගෙන ගොස් ඇත්තේ සංචාරක වීසා මගින් බවයි.
එසේ රැගෙන ගොස් ඕමානයේ නිවෙසකට ගෘහ සේවයට අලෙවි කර ඇති බවත් එහිදී අදාළ නිවෙසේ සිට දුරකතන ඇමතුම් ලබා ගනිමින් තමන් හොඳින් ඉන්නා බව පවසා තිබුණ ද එම ඇමැතුමෙන් පසු කිසිදු තොරතුරක් නොමැති වූ බව ද කියයි.
ඉන් පසු මේ ගැන විදේශ සේවා නියුක්ති කාර්යාංශයට පවුලේ පිරිස් පැමිණිලි කර තිබුණ ද ඇය සංචාරක වීසා මත නීති විරෝධී ජාවාරම්කරුවන් රැගෙන ගොස් ඇති බවත් එහි තොරතුරු ලබා ගැනීමට කටයුතු කරන බවට දන්වා තිබූ බව ඔවුහු කියති.
(ආණමඩුව - හිරාන් ප්‍රියංකර ජයසිංහ )
0 Comments