ස්නායු රෝගීන් සදහා භාවිත කරන “ඉමියුනෝග්ලෝබින්" නමැති ප්‍රමිතියෙන් තොර ප්‍රතිදේහ එන්නත් රජයේ රෝහල්වලට බෙදා හැරීමෙන් රුපියල් කෝටි ගණනක් වංචා කිරීම සහ රෝගී ජීවීත අනාරක්‍ෂිත තත්වයකට පත් කිරිම සම්බන්ධයෙන් විමරිශන කරද්දී, පිළිකා රෝගීන් සදහා භාවිත කරන “රිටොක්සිනන්” නමැති ප්‍රමිතියෙන් තොර ප්‍රතිදේහ එන්නත් ආනයනය කර රුපියල් කෝටි 11 කට ආසන්න මුදලක් වංචා කිරීමේ සිද්ධියක් ද අනාවරණය වී ඇතැයි පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවි මාලිගාකන්ද මහේස්ත්‍රාත් ලෝචනි අබේවික්‍රම වීරසිංහ මහත්මියට ඊයේ (29) දැනුම් දුන්නාය.
ස්නායු රෝගීන්සඳහා භාවිත කරන ‘ඉමියුනෝග්ලෝබින්" නමැති ප්‍රමිතියෙන් තොර ප්‍රතිදේහ එන්නත් රජයේ රෝහල්වලට බෙදා හළ ‘අයුසුලේට් බයෝටෙක් ෆාර්මා' සමාගම විසින්ම මෙලෙස පිළිකා රෝගීන් සඳහා භාවිත කරන 'රිටොක්සිනන් " නමැති ප්‍රමිතියෙන් තොර ප්‍රතිදේහ එන්නත් ආනයනය කර රුපියල් කෝටි 11 කට ආසන්න මුදලක් වංචා කර ඇති බව හෙළිවී ඇතැයි දැනුම් දුන් ලක්මිණී ගිරිහාගම මෙනවිය අදාළ රුපියල් කෝටි 11 කට ආසන්න මුදල සමාගමට මුදා හරින ලෙස සෞඛ්‍ය අමාත්‍යංශයේ හිටපු ලේකම්වරයා ඔහුගේ අත්අකුරින් ටෙන්ඩර් පත්‍රිකාවේ පෞද්ගලිකවම සටහනක් යොදා ඇතැයි ද දැනුම් දුන්නාය.
මෙම සිද්ධිය සම්බන්ධයෙන් කරන විමර්ශනවලට අදාළව අධිකරණයේ පෙනී සිටින ලෙසට කළ නියමය අනුව අධිකරණට නොපැමිණී ජාතික ඖෂධ නියාමන අධිකාරියේ ප්‍රධාන විධායක නිලධාරීවරයාට එරෙහිව වරෙන්තු නිකුත් කරන්නැයි පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය කළ ඉල්ලීමක් පිළිගත් මහේස්ත්‍රාත්වරිය වහාම ඔහු අත්අඩංගුවට ගෙන අධිකරණයට ඉදිරිපත් කිරීමට රහස් පොලිසියට නියම කරමින් ඒ සඳහා වරෙන්තුවක් ද නිකුත් කළාය.
පැමිණිල්ල කැඳවනු ලැබූ අවස්ථාවේ දී සිද්ධියට අදාළව රිමාන්ඩ් බාරයට පත් කර සිටින බාල ඖෂධ ගෙන්වූ බව කියන ‘අයුසුලේට් බයෝටෙක් ෆාර්මා' සමාගමේ හිමිකරුවන සුගත් ජනක ප්‍රනාන්දු, වෛද්‍ය සැපයුම් අංශයේ අධ්‍යක්‍ෂ වෛද්‍ය කපිල වික්‍රමනායක, එහි සහකාර අධ්‍යක්‍ෂ ශාන්තිනී සොලමන්, ගණකධිකාරී (සැපයුම්) නෙරාන් ධනංජය සහ තොග පාලක සුජිත් කුමාර නමැත්තෝ - බන්ධනාගාර නිලධාරීන් විසින් අධිකරණයට ඉදිරිපත් කරනු ලැබූහ.
ඉන්දියානු ණය යෝජනා ක්‍රමය යටතේ දුන් ණය මුදල්වලින් ව්‍යාජ ලේඛන සකස් කර ස්නායු රෝගීන් සඳහා භාවිත කරන 'ඉමියුනෝග්ලෝබින්" නමැති ප්‍රමිතියෙන් තොර ප්‍රතිදේහ එන්නත් ආනයනය කර දිවයිනේ රජයේ රෝහල් වලට බෙදා හැරීම මඟින් රුපියල් කෝටි ගණනක වංචාවක් කිරීම සහ රෝගී ජීවීත අනාරක්‍ෂිත තත්වයකට පත් කිරීම සම්බන්ධයෙන් විමර්ශනයක් කරන්නැයි ඉල්ලමින් ‘අල්ලස දූෂණය හා නාස්තියට එරෙහි පුරවැසි බලය සංවිධානය සහ සිවිල් සංවිධාන එකමුතුව' කළ පැමිණිල්ලක් සම්බන්ධයෙන් කළ විමර්ශනවල ප්‍රගතිය දැක්වෙන වාර්තාවක් රහස් පොලිසියේ ප්‍රධාන පොලිස් පරීක්‍ෂක ජයන්ත මහතා විසින් අධිකරණයට ඉදිරිපත් කරන ලදී.
සිද්ධියට අදාළව කළ විමර්ශනවල දී අනාවරණය වූ කරුණු මත අත්අඩංගුවට ගනු ලැබු සැකකරුවන් පස් දෙනා අධිකරණයට ඉදිරිපත් කරමින් ඔවුන් සම්බන්ධයෙන් කළ විමර්ශනවල ප්‍රගතිය දැක්වෙන පිටු 07කින් යුත් වාර්තාවක් රහස් පොලිසියේ ප්‍රධාන පොලිස් පරීක්‍ෂක ජයන්ත මහතා සමඟ පෙනී සිටි උප පොලිස් පරීක්‍ෂක යාළේවත්ත මහතා අධිකරණයට ඉදිරිපත් කළේය.රහස් පොලිසිය සමඟ පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය කරුණු දක්වමින් ‘අයුසුලේට් බයෝටෙක් ෆාර්මා' සමාගමේ හිමිකරුවන සැකකාර සුගත් ජනක ප්‍රනාන්දු යන අයට අයත් සීදුවේ පිහිටි පරීක්‍ෂණාගාරයක දී මෙම ඖෂධ නිෂ්පාදනය කර ඇති බව හෙළිවී ඇති හෙයින් එම ස්ථානය පරික්‍ෂා කර වාර්තාවක් ඉදිරිපත් කරන ලෙස මෙන්ම ජාතික ඖෂධ නියාමන අධිකාරියේ ප්‍රධාන විධායක නිලධාරීවරයාට පෞද්ගලිකවම අධිකරණයේ පෙනී සිටින ලෙස පසුගිය අවස්ථාවේ නියම කළත් ඔහු අධිකරණයට පැමිණ නැතැයි දැනුම් දුන්නාය.
ඒ අවස්ථාවේ දී අධිකරණය ඇමතූ මහේස්ත්‍රාත් ලෝචනී අබේවික්‍රම වීරසිංහ මහත්මිය ජාතික ඖෂධ නියාමන අධිකාරියේ ප්‍රධාන විධායක නිලධාරීවරයා හෝ ඔහුගේ නියෝජිතයකු අධිකරණයේ සිටින්නේදැයි කිහිපවරක් විමසු නමුත් කිසිවෙක් අධිකරණයට ඉදිරිපත් නොවූහ. නියෝජ්‍ය සොලිසිටර් ජනරාල් ලක්මිණී ගිරිහාගම මෙනවිය කරුණු දක්වමින් පළමු සැකකරුගේ සීදුවේ පිහිටි පරික්‍ෂණාගාරය පරීක්‍ෂා කිරීම මෙම සිද්ධියට අතිශයින්ම වැදගත් වන අතරම, අධිකරණයේ නියෝගයට අවනතව අධිකරණයට පැමිණ නොමැති ඔහු අත්අඩංගුවට ගැනීම සඳහා වරෙන්තු නිකුත් කරන්නැයි ඉල්ලා සිටියාය.
ඉන්දියානු ණය යෝජනා ක්‍රමය යටතේ දුන් ණය මුදල්වලින් ව්‍යාජ ලේඛන සකස් කර ස්නායු රෝගීන් සඳහා භාවිත කරන ‘ඉමියුනෝග්ලෝබින්” නමැති ප්‍රමිතියෙන් තොර ප්‍රතිදේහ එන්නත් ආනයනය කර දිවයිනේ රජයේ රෝහල්වලට බෙදා හැරීම මඟින් රුපියල් කෝටි ගණනක වංචාවක් කිරීම සහ රෝගී ජීවිත අනාරක්‍ෂිත තත්වයකට පත් කිරීම සම්බන්ධයෙන් විමර්ශනය කරද්දී ස්නායු රෝගීන් සඳහා භාවිත කරන 'ඉමියුනෝග්ලෝබින්" නමැති ප්‍රමිතියෙන් තොර ප්‍රතිදේහ එන්නත් රජයේ රෝහල්වලට බෙදා හළ ‘අයුසුලේට් බයෝටෙක් ෆාර්මා' සමාගම විසින්ම මෙලෙස පිළිකා රෝගීන් සඳහා භාවිත කරන ‘රිටොක්සිනන්” නමැති ප්‍රමිතියෙන් තොර ප්‍රතිදේහ එන්නත් ආනයනය කර රුපියල් දසකෝටි හැත්තෑ ලක්‍ෂයක මුදලක් වංචා කර ඇති බව හෙළිව ඇතැයි දැනුම් දුන් ලක්මිණී ගිරිහාගම මෙනවිය අදාළ රුපියල් කෝටි 11 කට ආසන්න මුදල සමාගමට මුදාහරින ලෙස සෞඛ්‍ය අමාත්‍යංශයේ හිටපු ලේකම්වරයා ඔහුගේ අත්අකුරින් ටෙන්ඩර් පත්‍රිකාවේ පෞද්ගලිකවම සටහනක් යොදා ඇතැයිද දැනුම් දුන්නාය.
අදාළ ඖෂධය ගෙන්වා නොතිබිය සෞඛ්‍ය අමාත්‍යාංශයේ හිටපු ලේකම්වරයා පෞද්ගලිකවම යෙදු සටහන නිසා අවස්ථා තුනක දී අදාළ මුදල ගෙවා ඇතැයි ද ඒ සම්බන්ධයෙන් ප්‍රකාශයක් ගැනීම සඳහා අද (30) දිනයේ දී රහස් පොලිසියේ පෙනී සිටින ලෙස සෞඛ්‍ය අමාත්‍යාංශයේ හිටපු ලේකම්වරයාට නියම කරන්නැයි ඉල්ලා සිටි ලක්මිණී ගිරිහාගම මෙනෙවිය අවස්ථා තුනක දී රුපියල් දසකෝටි හැත්තෑ ලක්‍ෂයක් ගිණුම් ගත වූ සැකකාර සුගත් ජනක ප්‍රනාන්දු නමැත්තාගේ බැංකු ගිණුමේ මේ වන විට ඇත්තේ රුපියල් 17,334/- ක මුදලක් පමණකැයි ද ඒ අනුව සැකකරුගේ වත්කම් සම්බන්ධයෙන් විමර්ශනයක් ආරම්භ කර ඇතැයි ද දැනුම් දුන්නාය.
හදිසි මිලදී ගැනීම් සඳහා අවසර දී ඇත්තේ රුපියල් කෝටි 10 දක්වා වූ වටිනාකමැති ඖෂධ වුවත් අනුමත මිලෙන් පරිබාහිරව කටයුතු කරමින් රුපියල් දස කෝටි හැත්තෑ ලක්‍ෂයක වටිනාකමැති ඖෂධ මිලදී ගෙන ඇතැයි ද සෞඛ්‍ය ලේකම්වරයා ටෙන්ඩර් පත්‍රිකාවේ ඔහුගේ අත්අකුරින් පෞද්ගලිකව දැමු සටහනක් හේතුවෙන් මෙම මුදල ගෙවා ඇතැයි ද ඒ සම්බන්ධයෙන් ඔහුගෙන් ප්‍රකාශයක් ගැනීමටට අවශ්‍ය යැයි ද දැනුම් දුන් ලක්මිණී ගිරිහාගම මෙනවිය පිළිකා රෝගීන් සඳහා භාවිත කරන ‘රිටොක්සිනන්” නමැති ප්‍රතිදේහ එන්නත් සම්බන්ධයෙන් විශේෂඥ වාර්තාවක් කැඳවීට නියම කරන්නැයි ද ඉල්ලා සිටියාය.
ස්නායු රෝගීන් සඳහා භාවිත කරන ඉමියුනෝග්ලෝබින්’ නමැති ප්‍රතිදේහ එන්නත් මෙන්ම පිළිකා රෝගීන් සඳහා භාවිත කරන 'රිටොක්සිනන්" නමැති ප්‍රතිදේහ එන්නත් ඉන්දියාවෙන් ආනයනය කර නැතැත් වෛද්‍ය සැපයුම් ඒකකයේ ගිණුමෙන් රුපියල් තුන්කෝටි හැටලක්‍ෂයක් සහ දසකෝටි හැත්තෑ ලක්‍ෂයක් සැකකාර සුගත් ජනක ප්‍රනාන්දු නමැත්තාගේ බැංකු ගිණුමට බැර කර ඇතැයි ද ලක්මිණී ගිරිහාගම මෙනවිය කීවාය.
මේ අවස්ථාවේ දී අධිකරණය ඇමතූ මහේස්ත්‍රාත් ලෝචනී අබේවික්‍රම මහත්මිය ටෙන්ඩරය දී ඇත්තේ ඉන්දියානු ණය යෝජනා ක්‍රමය යටතේ මිලදී ගැනීම් සඳහා නේද?'' යනුවෙන් විමසුවාය.
නියෝජ්‍ය සොලිසිටර් ජනරාල් ලක්මිණී ගිරිහාගම මෙනවිය: ඔව්" නමුත් එසේ කර නැහැ. අත්‍යවශ්‍ය හේතූන් නිසා හදිසි ඖෂධ සැපයුමක් බව කියමින් 2023 ජනවාරි 04 වැනිදා ලිපියක් නිකුත් කර ඇතත් අදාළ ඖෂධ ලැබී ඇත්තේ 2023 මැයි 26 වැනිදායි.
සැකකරුවන් මෙම අපරාධයට සම්බන්ධිත හෙයින් ඔවුන් රිමාන්ඩ් බාරයට පත් කරන ලෙස නියෝජ්‍ය සොලිසිටර් ජනරාල් ගිරිහාගම මෙනවිය වැඩිදුරටත් ඉල්ලා සිටියාය. පළමු සැකකරු වෙනුවෙන් පෙනී සිටි ජනාධිපති නීතීඥ කාලිංග ඉන්දතිස්ස මහතා කරුණු දක්වමින් තම සේවාදායකයා වසර 20ක කාලයක් ශ්‍රී ලංකාවට ඖෂධ සපයා ඇතැයි ද තම සේවාදායකයා සැපයු ප්‍රශ්නගත ඖෂධ සම්බන්ධයෙන් මුදල් ගෙවා ඇත්තේ ඉන්දියානු ණය යෝජනා ක්‍රමය යටතේ ලැබුණු මුදලින් යැයිද කීය.
මහේස්ත්‍රාත් ලෝචනා අබේවික්‍රම වීරසිංහ මහත්මිය: ඉන්දියානු ණය යෝජනා ක්‍රමය යටතේ මුදල් ගෙවා ඇති බව කීවත් මුදල් ගෙවා ඇත්තේ රාජ්‍ය මුදල්වලින් බව විමර්ශනවලදී හෙළි වෙලා තියෙනවා නේද?
ජනාධිපති නීතිඥ කාලිංග ඉන්දතිස්ස මහතා: ඒක සම්පූර්ණයෙන්ම වැරදියි. ඉන්දියානු ණය යෝජනා ක්‍රමය යටතේ ශ්‍රී ලංකාවට දුන් මුදල්වලින් තමයි මෙම ඖෂධ මිලදී ගෙන තියෙන්නේ. ඉන්දියානු ණය යෝජනා ක්‍රමය යටතේ ලැබුණු මුදල්වලින් මෙම ඖෂධ මිලදී ගෙන ඇති හෙයින් මෙම සිද්ධිය පොදු දේපළ පනත යටතට වැටෙන්නේ නැහැ.
මහේස්ත්‍රාත් ලෝචනා අබේවික්‍රම වීරසිංහ මහත්මිය: මුදල් ගලා යෑම කොහෙන් වුවත් අවසානයේ වගකිවයුත්තේ රජය නම් එය පොදු දේපළ පනත යටතට වැටෙනවා.
ජනාධිපති නීතිඥ කාලිංග ඉන්දතිස්ස මහතා: 2022 සැප්තැම්බර් 26 වැනිදා ලැබුණු කැබිනට් අනුමැතියකට අනුව තම සේවාදායකයා ටෙන්ඩර් එකක් දැම්මා. ඒකට අනුමැතිය ලැබුණා. ඔවුන් තෝරා ගත්තා. ඒ ටෙන්ඩර් මණ්ඩලයේ මම හිටියේ නැහැ. ඒ නිසා මම ඒකට වගකියන්න ඕනේ නැහැ.වැඩිදුරටත් කරුණු දැක්වූ ජනාධිපති නීතිඥ කාලිංග ඉන්දතිස්ස මහතා මුල් බී වාර්තාවේ කූඨ ලේඛන ඉදිරිපත් කර මෙම අපරාධය කර ඇති බව සඳහන් කර ඇතත් පසුව ඉදිරිපත් කළ බී වාර්තාවේ කූඨ ලේඛන ඉදිරිපත් කළ බවක් සඳහන් කර නැතැයි ද එහි සඳහන් කර ඇත්තේ කල් ඉකුත් වූ ලේඛන සකස් කර බව යැයි ද පැවැසීය.
දෙවැනි සැකකාර වෛද්‍ය කපිල වික්‍රමනායක මහතා වෙනුවෙන් නීතිඥ රිස්වාන් උවයිස් සහ අංජන රත්නසිරි සමඟ පෙනී සිටි ජනාධිපති නීතිඥ එම්.එම්. සුහයිර් මහතා සැකකරු වෙනුවෙන් ලිඛිතව කරුණු දක්වමින් තම සේවාදායකයා මෙම අපරාධයට කිසිදු සම්බන්ධයක් නැතැයි කීය.මෙම විමර්ශනය ගමන් කරන්නේ වැරැදි දිහාවට බවත් පළමු සැකකරු කූඨ ලේඛන සකස් කර ඉදිරිපත් කළා නම් අනෙකුත් සැකකරුවන් ඒ බව දන්නේ නැත්නම් ඔවුන් ඊට වගකිවයුතු දැයි ප්‍රශ්න කළ ජනාධිපති නීතිඥ එම්.එම්. සුහයිර් මහතා “ඇත්ත හොරු අල්ලනවා නම් අල්ලන්න. මේ පහළ ඉන්න රාජ්‍ය නිලධාරීන්ට බොරු චෝදනා එල්ල කරන්න එපා” යැයි පැවැසීය.
මහේස්ත්‍රාත් ලෝදනා අබේවික්‍රම වීරසිංහ මහත්මිය- මෙම ඖෂධ ජාලයට සම්බන්ධ මෙම සැකකරුවන්ට ඉහළින් සිටින මෙම අපරාධයට සම්බන්ධය පුද්ගලයන් සම්බන්ධයෙන් විමර්ශනය කරන්න.සිවුවැනි සැකකරු වෙනුවෙන් පෙනී සිටි ජනාධිපති නීතිඥ රෝලන්ඩ් පෙරේරා මහතා කරුණු දක්වමින්, මෙම අපරාධය සම්බන්ධයෙන් නොසැලකිලිමත්භාවය හැර වෙනත් කිසිදු වරදක් තම සේවාදායකයාගේ නැතැයි කීය.
තම සේවාදායකයාට එරෙහිව මෙම අපරාධය සම්බන්ධයෙන් කිසිදු සාක්කියක් නැතැයි ද ද තම සේවාදායකයා කූඨ ලේඛන සකස් කර නැතැයි ද කී ජනාධිපති නීතිඥ රෝලන්ඩ් පෙරේරා මහතා, තම සේවාදායකයාට ඇප නියම කරන්නැයි ඉල්ලා සිටියේය. පස්වැනි සැකකරු වෙනුවෙන් පෙනී සිටි නීතිඥ අශෝක සේරසිංහ මහතා කරුණු දක්වමින්, ගබඩා භාරකරුවකු වන තම සේවාදායකයා ධුරාවලියේ අන්තිමයා බවත් දින පසු වී ඇති හෙයින් ස්නායු රෝගීන් සඳහා ලබාදෙන එන්නත් බාර ගැනීම තම සේවාදායකයා ප්‍රතික්ෂේප කළ විට අධ්‍යක්‍ෂවරයා සහ නියෝජ්‍ය අධ්‍යක්‍ෂවරයා ඒවා බාර ගන්නා ලෙස කළ නියෝගය නිසා අදාළ එන්නත් බාර ගැනීමට සිදු වූ බවත් පැවැසීය.
ලේඛන සැලකිල්ලෙන් බැලීමේ වගකීම තම සේවාදායකයාට නැතැයි ද අපරාධකරුවන් නිදැල්ලේ සිටියදී අත්අඩංගුවට ගෙන ඇත්තේ පහළ මට්ටමේ නිලධාරීන් යැයි ද කී නීතිඥ අශෝක සේරසිංහ මහතා, මෙම අපරාධය සම්බන්ධයෙන් සංවේදීව පසුවන මාධ්‍ය මෙන්ම ජනතාව මෙම අපරාධයට වගකිවයුත්තා කවුද යන්න දන්නා මුත් රහස් පොලිසිය ඒ බව දන්නේ නැතැයි ද කීය.ඉදිරිපත් වූ කරුණු සලකා බැලීමෙන් අනතුරුව මෙම ඖෂධ මිලදී ගැනීම සඳහා භාවිත කර ඇත්තේ රජයට අයත් මුදල් ද යන්න සම්බන්ධයෙන් භාණ්ඩාගාරය හරහා අධිකරණයට වාර්තාවක් ඉදිරිපත් කිරීමට නියම කළ මහේස්ත්‍රාත්වරිය, සැකකරුවන් මේ ආකාරයෙන් කටයුතු කර ඇත්තේ ඔවුන්ට ඉහළින් සිටින කුමන නිලධාරීන්ගේ නීති විරෝධී නියෝග මත දැයි වහාම විමර්ශනය කර ඉදිරි දිනයේදී අධිකරණයට වාර්තා කරන ලෙස ද රහස් පොලිසියට නියම කළාය.
සැකකරුවන් ලබන 13 වැනිදා තෙක් රිමාන්ඩ් බාරයට පත් කළ මහේස්ත්‍රාත්වරිය සිද්ධියට අදාළව කරන විමර්ශනවල ප්‍රගතිය එදින අධිකරණයට වාර්තා කරන ලෙස රහස් පොලිසියට නියම කළාය.පැමිණිල්ල වෙනුවෙන් රහස් පොලිසියේ උප පොලිස් පරීක්‍ෂක ලක්සිරි, සැරයන්වරුන් වන (35124) ප්‍රනාන්දු, (61823) මනෝජ් සමග ප්‍රධාන පොලිස් පරීක්‍ෂක ජයන්ත මහතා පෙනී සිටියේය.නීතිපතිවරයානියෝජනය කරමින් පැමිණිල්ල වෙනුවෙන් ජ්‍යෙෂ්ඨ රජයේ නීතිඥ හේෂාණී විජේසිංහ මහත්මිය සමඟ නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය පෙනී සිටියාය.
මනෝප්‍රිය ගුණසේකර
0 Comments