නරක අතට හැරෙමින් යන වායු දූෂණ මට්ටම් නිසා ඉන්දියාවේ අගනුවර වන දිල්ලිහි, බලධාරීන් සියලුම ප්‍රාථමික පාසල් දින දෙකකට වසා දමන්නට තීරණය කර ඇත.
පසුගිය බ්‍රහස්පතින්දා මෙම වසරේ පළමු වතාවට නගරයේ වාතයේ ගුණාත්මක භාවය ඉතා දරුණු මට්ටමට පහත වැටුණි.එය ඉදිරි සති දෙක තුළ තවත් නරක අතට හැරෙනු ඇතැයි අපේක්ෂා කරන බව විද්‍යාඥයෝ පවසති.තත්ත්වය සමාලෝචනය කිරීම සඳහා දිල්ලි පරිසර අමාත්‍යවරයා හදිසි රැස්වීමක් කැඳවා තිබේ. මෙය ලෝකයේ වඩාත්ම දූෂිත නගරවලින් එකක් ලෙසද සැලකේ.
විශේෂයෙන්ම ගොවීන් විසින් බෝග අතිරික්ත පුළුස්සා දැමීම, අඩු සුළං වේගය සහ උත්සව සමයේදී රතිඤ්ඤා පිපිරවීම ඇතුළු විවිධ සාධක හේතුවෙන් දිල්ලියේ වාතය ශීත ඍතුවේ දී විශේෂයෙන් විෂ සහිත වේ.
අසල්වැසි ප්‍රාන්ත වන පන්ජාබ් සහ හර්යානා හි පිදුරු ගිනි තැබීම් සිදුවීම් සංඛ්‍යාව වැඩි වන විට නගරයේ වායු දූෂණය නොවැම්බර් 1 සිට 15 දක්වා ඉහළ යන බව දිල්ලි පරිසර දූෂණ පාලන කමිටුවේ අධ්‍යයනයන් පෙන්වා දෙයි.
රජයේ දත්ත අනුව බ්‍රහස්පතින්දා සවස, PM2.5 සාන්ද්‍රණය පෙනහළු අවහිර කර රෝග රාශියක් ඇති කළ හැකි සියුම් අංශු ලෙසින් නගරයේ සහ එහි තදාසන්න ප්‍රදේශවල ප්‍රදේශ කිහිපයක ඝන මීටරයකට මයික්‍රොග්‍රෑම් 60ක සීමාව හත් අට ගුණයකින් ඉක්මවා යෑමක් පෙන්නුම් කෙරුණි.
දිල්ලි මහ ඇමති අරවින්ද් කෙජ්රිවාල් නිවේදනය කළේ නගරයේ සියලුම රජයේ සහ පෞද්ගලික ප්‍රාථමික පාසල් සිකුරාදා සහ සෙනසුරාදා වසා තබන බවයි.
දූෂණය වැඩිවීමේ බලපෑම්වලට එරෙහිව සටන් කිරීම සඳහා, එහි මධ්‍යම පරිසර දූෂණ පාලන මණ්ඩලයක් නගරයේ අත්‍යවශ්‍ය නොවන ඉදිකිරීම් කටයුතු වහාම තහනම් කිරීමට නියෝග කළේය.
එසේම පසුගිය සතියේ ක්‍රියාත්මක වූ දෙවන අදියරේදී දිල්ලි මෙට්‍රෝ සහ විදුලි බස් සේවා ඇතුළු සියලුම පොදු ප්‍රවාහන සේවාවලට වාහන විමෝචනය මැඩපැවැත්වීම සඳහා සංඛ්‍යාතය වැඩි කරන ලෙස උපදෙස් ලබා දී තිබුණි.
පසුගිය මාසයේදී දිල්ලි රජය නගරය තුළ රතිඤ්ඤා නිෂ්පාදනය, විකිණීම සහ භාවිතය සඳහාද පුළුල් තහනමක් පැනවීය.
දූෂිත වාතය සෑම වසරකම දිල්ලි වැසියන්ට දැඩි සෞඛ්‍ය ගැටලු ඇති කරයි.
නරක අතට හැරෙන වාතයේ ගුණාත්මක භාවය හේතුවෙන් ළමුන් සහ වැඩිහිටියන් අතර ඇදුම සහ පෙනහළු ගැටළු වැඩි වන බව සෞඛ්‍ය වෘත්තිකයන් වාර්තා කරයි.
බ්‍රොන්කයිටිස් ආසාදන සංඛ්‍යාවේ වැඩිවීමක් වාර්තා වන බව නගරයේ සෆ්ඩර්ජුන් රෝහලේ වෛද්‍ය අංශයේ ප්‍රධානී ජුගල් කිෂෝර් මහතා පවසා ඇත.
එසේම ශ්වසන ආබාධවලින් පෙළෙන පුද්ගලයින් අත්‍යවශ්‍ය නම් මිස එළිමහනේ නොයන ලෙස ඔහු නිර්දේශ කළේය.
0 Comments