අපරාධ පරීක්ෂණ දෙපාර්තමේන්තුවේ නිලධාරීන් ලෙස පෙනී සිටිමින් පුද්ගලයකු බිය ගන්වා මුදල් ලබා ගැනීම සම්බන්ධයෙන් පොලිස් බුද්ධි අංශයේ සැරයන්වරයකු සහ කොස්තාපල්වරයකු අම්පාර කොට්ඨාස අපරාධ විමර්ශන කාර්යාංශය විසින් අත්අඩංගුවට ගෙන ඇත.
මෙම නිලධාරීන් දෙදෙනා අත්අඩංගුවට ගැනීමට විමර්ශනයක් ආරම්භ කිරීමත් සමඟ ඔවුන් පසුගිය 17 වෙනිදා පැමිණ භාර වීමෙන් පසු අත්අඩංගුවට ගෙන තිබේ.
මෙම සැකකාර පොලිස් නිලධාරීන් දෙදෙනා සමන්තුරේ මහේස්ත්‍රාත්
අධිකරණයට ඉදිරිපත් කිරීමෙන් අනතුරුව ලබන 23 වෙනිදා දක්වා රක්ෂිත
බන්ධනාගාර ගත කර ඇත. එදිනට හඳුනා ගැනීමේ පෙරට්ටුවකට නිලධාරීන්
යොමු කිරීමට නියමිතව ඇත.
මෙම නිලධාරීන් දෙදෙනා අපරාධ පරීක්ෂණ දෙපාර්තමේන්තුවේ නිලධාරීන් ලෙස පෙනී සිටිමින් පුද්ගලයකු බිය ගන්වා මුදල් ලබාගෙන ඇත්තේ පසුගිය ජුලි 07 වෙනිදාය. රුපියල් 30,000ක මුදලක් ඉල්ලා රුපියල් 20,000ක මුදලක් එම පුද්ගලයාගෙන් ලබාගෙන ඇති බව සඳහන්ය.
මේ සම්බන්ධයෙන් එම පුද්ගලයා විසින් කළ පැමිණිල්ලකට අනුව
අම්පාර කොට්ඨාසය භාර ජ්‍යෙෂ්ඨ පොලිස් අධිකාරීවරයාගේ උපදෙස් මත
කොට්ඨාස අපරාධ විමර්ශන කාර්යාංශය විසින් විමර්ශන ආරම්භ කර ඇත.
බුද්ධි නිලධාරීන් දෙදෙනා බුද්ධි අංශයෙන් මේ වන විට ඉවත් කර ඇති අතර සැරයන්වරයා මාතලේ කොට්ඨාසටත් කොස්තාපල්වරයා බදුල්ල කොට්ඨාසයටත් සාමාන්‍ය රාජකාරි සඳහා යොදවා තිබී ඇතැයි ද පොලිස් තොරතුරු අනාවරණය කළේය.
ගයාන් කුමාර වීරසිංහ
0 Comments