ගැබිනි සෙබළියකට කැත්තෙන් කෙටුවැයි සැරයන් අත්අඩංගුවට

ගැබිනියක වන යුද හමුදා සෙබළියකගේ උදරයට කැත්තකින් පහරදී තුවාල කළේ යැයි කියන පොලිස් සැරයන්වරයෙක් හොරොව්පතාන පොලිසියේ නිලධාරීන් කණ්ඩායමක් විසින් පෙරේදා (18) රාත්‍රියේ අත්අඩංගුවට ගනු ලැබීය.තුවාල ලැබූ යුද හමුදා සෙබළිය (30) හොරොව්පතාන රෝහලේ ප්‍රතිකාර ලබමින් පසු වන්නීය.සැකකාර සැරයන්වරයාගේ බිරිය සහ පුතාද,

ඇයට බැණ වැදී පහරදීම් කර ඇති බවට ලැබී ඇති පැමිණිල්ලේ සඳහන් වන බැවින් ඔවුන් දෙදෙනා ද අත්අඩංගුවට ගැනීමට පොලිසිය පරීක්‍ෂණ පවත්වයි.

අත්අඩංගුවට ගත් පොලිස් සැරයන්වරයා කපුගොල්ලෑව පොලිසියේ රාජකාරි කරන අයෙකි. යුද හමුදා සෙබළියට පහරදීමට යොදා ගත්තේ යැයි කියන කැත්තද පොලිස් බාරයට ගෙන ඇත. හොරොව්පතාන මොරවැව ප්‍රදේශයේ පදිංචි කාන්තාවක පෙරේදා (18) එම ප්‍රදේශයට ඇදහැළුණු ධාරානිපාත වර්ෂාව නිසා තම නිවස වැසි ජලයෙන් යටවීම වළක්වා ගැනීමට පස් බැම්මක් සකස් කර ඇති අතර ඒ හේතුවෙන් සැරයන්වරයාගේ නිවස වැසි ජලයෙන් යටවීම නිසා දෙපාර්ශවය අතර බහින්බස්වීමක් ඇතිව තිබෙන බව පොලිසිය කියයි.

පොලිස් සැරයන්වරයා එම කාන්තාවට කැත්තෙන් කෙටීමට උත්සාහ කළ බව කියන අවස්ථාවේ, සිය සහෝදරිය බේරා ගැනීමට යාමේදී ගැබිනි යුද හමුදා සෙබළියගේ උදර ප්‍රදේශයට කැති පහර වැදීමෙන් ඇය තුවාල ලබා ඇති බව ප්‍රදේශයේ උසස් නිලධාරියෙක්  පැවැසීය.කුඹුරක් සම්බන්ධයෙන් දෙපාර්ශවය අතර නිතර ආරවුල් පවතින බව පැවසේ. හොරොව්පතාන පොලිසිය මේ සම්බන්ධයෙන් පරීක්‍ෂණ පවත්වයි.
 ශ්‍රීනාත් ප්‍රසන්න ජයසූරිය