පාර්ලිමේන්තු ගෘහපාලන දෙපාර්තමේන්තුවේ රූමත් තරුණ සේවිකාවන්ට එහි ඇතැම් නිලධාරින් විසින් ලිංගික අතවර කරන ලදැයි කියන සිද්ධිය සුදුසු නීතිමය ක්‍රියාමාර්ග ගැනීම සඳහා පාර්ලිමේන්තු ප්‍රධානීන් විසින් නීතිපතිවරයාට යොමු කරනු ලැබ ඇත.
එම සිද්ධිය සම්බන්ධයෙන් පාර්ලිමේන්තු ගෘහ පාලන දෙපාර්තමේන්තුවේ සහකාර ගෘහ පාලක ඇතුළු නිලධාරීන් දෙදෙනකුගේ වැඩ තහනම් කර ඇත.
සිද්ධිය සම්බන්ධයෙන් චෝදනා පත්‍ර බාරදී නිදහසට කරුණු දක්වන ලෙස පාර්ලිමේන්තු ප්‍රධානීහු එම නිලධාරීන් දෙදෙනාට පසුගියදා දැනුම් දුන්හ.
ඒ අනුව ඔවුන් සිද්ධිය සම්බන්ධයෙන් නිදහසට කරුණු ඉදිරිපත් කර ඇතැයි පාර්ලිමේන්තු ආරංචි මාර්ගවලින් පැවසේ.
සිද්ධියට අදාළව කෙරුණු පරීක්ෂණ කටයුතුවලදී පාර්ලිමේන්තු ගෘහ පාලනඑ දෙපාර්තමේන්තුවේ සේවිකාවන් දුන් සාක්ෂි සහ චෝදනා ලැබූ නිලධාරීන් දෙදෙනා දුන් නිදහසට කරුණු දැක්වීම් ඇතුළු සියලු ලියකියවිලි මේ අනුව නීතිපතිවරයාට යොමු කර ඇතැයිද එම ආරංචිමාර්ග සඳහන් කළේය.
එම සේවකයන් බැලූ බැල්මට අපරාධමය වරදක් කර ඇතැයි පෙනී යන බව පාර්ලිමේන්තු ලේකම්වරිය නීතිපතිවරයාට දැනුම් දී ඇත.
එම සිද්ධිය සම්බන්ධයෙන් පාර්ලිමේන්තුවේ පරීක්ෂණ කණ්ඩායම් දෙකක් පරීක්ෂණ සිදුකළේය.
මේ අතර, පාර්ලිමේන්තු සේවකයන්ගේ විනය රැකීම සඳහා පාර්ලිමේන්තු මහලේකම් නීතිඥ කුෂානි රෝහණදීර මහත්මිය සහ නියෝජ්‍ය මහලේකම් සහ කාර්ය මණ්ඩල ප්‍රධානී නීතිඥ චමින්ද කුලරත්න මහතාගේ නියෝග මත විශේෂ වැඩපිළිවෙළක් ආරම්භ කර ඇත.
මේ අතර විවිධ විෂමාචාර චෝදනා එල්ලවූ ඇතැම් නිලධාරීන්ට දිරිදීමනා ඇතුළු විවිධ දීමනා ලබාදීම පාර්ලිමේන්තු ප්‍රධානීන් ප්‍රතික්ෂේප කර ඇතැයිද දැනගන්නට ඇත.
සුජිත් හේවාජුලිගේ
0 Comments