පොදු ව්‍යාපාර පිළිබඳ පාර්ලිමේන්තු දූෂණ වංචා සහ අක්‍රමිකතා පිළිබඳ කාරක සභාවේ (කෝප් කමිටුව) සභාපති මහාචාර්ය රංජිත් බණ්ඩාර මහතා ශ්‍රී ලංකා ක්‍රිකට් ආයතනයේ දුෂණ වංචා සහ අක්‍රමිකතා පිළිබඳ විමර්ශන කටයුතුවලින් ඉවත් කරනු ලැබ ඇත.ශ්‍රී ලංකා ක්‍රිකට් ආයතනය පිළිබඳ විමර්ශන කටයුතු කෝප් කමිටුවේ වෙනත් සාමාජිකයකුගේ මූලිකත්වයෙන් පැවැත්වීමටද පාර්ලිමේන්තුවේ පක්ෂ නායකයන් තීරණය කර ඇත.
මෙම තීරණය ගෙන ඇත්තේ පසුගියදා පැවැති විශේෂ පක්ෂ නායක රැස්වීමේදීය.කෙසේ වෙතත් මේ අතර කෝප් කමිටු සභාපතිවරයා ශ්‍රී ලංකා ක්‍රිකට් ආයතනය සම්බන්ධ විමර්ශන කටයුතුවලින් ඉවත් කිරීම රංජිත් බණ්ඩාර මහතා ඇතුළු කමිටු සාමාජිකයන් සමග සාකච්ඡා කිරීමෙන් අනතුරුව කරන ලෙසටද කතානායකවරයා එහිදී ප්‍රකාශ කර ඇතැයි දැනගන්නට ඇත.
මේ අතර කෝප් කමිටුවේ සභාපති මහාචාර්ය රංජිත් බණ්ඩාර මහතාට එරෙහිව සමගි ජන බලවේගය පක්ෂය විශ්වාසභංග යෝජනාවක් ගෙන ඒමට නියමිතව තිබුණද එය කල් යන ලකුණු පහළව ඇතැයි පාර්ලිමේන්තු ආරංචිමාර්ගවලින් පැවසේ.කෝප් කමිටුවේ සභාපතිවරයාට එරෙහිව එවැනි විශ්වාසභංග යෝජනාවක් ගෙන එන්නේ නම් එම යෝජනාවට ආණ්ඩු පක්ෂයේ මන්ත්‍රීවරුන් දෙදෙනකුද අත්සන් කළ යුතු බව පාර්ලිමේන්තුවේ ස්ථාවර නියෝගවල සඳහන් වේ.විශ්වාසභංග යෝජනාවක් සම්මත කළද කෝප් කමිටු සභාපතිවරයා ඉවත් කළ හැක්කේ එම යෝජනාව සම්මත වීමෙන් වසරකට පසුව බවද පාර්ලිමේන්තු ස්ථාවර නියෝගවල පැහැදිලිව දැක්වෙන්නේ යැයි පාර්ලිමේන්තු නිලධාරියෙක් පැවැසීය.
ඒ හේතුවෙන් මේ අවස්ථාවේදී විශ්වාසභංග ගෙන ඒමෙන් ප්‍රතිඵලදායී නොවන බව නීති විශාරදයන් සමගි ජන බලවේගය පක්ෂයට පෙන්වාදී ඇතැයි ද දැනගන්නට ඇත.කෝප් කමිටුවේ සභාපතිවරයා සහ ශ්‍රී ලංකා ක්‍රිකට් ආයතනය අතර බැඳියාවන් පිළිබඳ ගැටුමක් පවතින හෙයින් ඔහු එම ආයතනය සම්බන්ධ විමර්ශන කටයුතු වලින් වහාම ඉවත් කළ යුතු බව විපක්ෂයේ මන්ත්‍රීවරු කතානායකවරයාට පසුගිය දිනවල දිගින් දිගටම පෙන්වා දුන්හ.ක්‍රිකට් අර්බුදයෙන් පසු එල්ල කෙරුණු විවිධ චෝදනා හේතුවෙන් තාවකාලිකව නතර කෙරුණු කෝප් කමිටුවේ විමර්ශන කටයුතු යළි ආරම්භ කිරීමටද එහිදී එකඟත්වයට පැමිණ ඇත.
සුජිත් හේවාජුලිගේ
0 Comments