හිටපු ක්‍රීඩා අමාත්‍ය රොෂාන් රණසිංහ මහතා පාර්ලිමේන්තුවේදී කළ ප්‍රකාශයක් හේතුවෙන් අධිකරණයට අපහාස වී ඇතැයි සඳහන් කරමින් ඔහුට ඒ සම්බන්ධයෙන් දඬුවම් නියම කරන ලෙස ඉල්ලා නීතිඥවරියක අභියාචනාධිකරණයට පෙත්සමක් ගොනු කර ඇත.
නීතිඥ දිමිත්‍රී ඩිරාස් පෙට්රාංජලී මහත්මිය විසින් ගොනු කරනු ලැබ ඇති පෙත්සමේ වගඋත්තරකරුවන් ලෙස හිටපු ක්‍රීඩා අමාත්‍ය රොෂාන් රණසිංහ මහතා නම් කරනු ලැබ සිටී.
එම පෙත්සමේ මෙසේද සඳහන් වේ.
2023 නොවැම්බර් 8 වැනිදා හිටපු ක්‍රීඩා අමාත්‍ය රොෂාන් රණසිංහ මහතා අභියාචනාධිරණ සභාපති විනිසුරු නිශ්ශංක බන්දුල කරුණාරත්න මහතා විවේචනය කරමින් කතාවක් පවත්වා ඇත. මෙම කතාවේ අඩංගු කරුණුවලින් අධිකරණයට අපහාසයක් සිදුවී ඇත. එපමණක් නොව හිටපු අමාත්‍යවරයා විසින් කරන ලද චෝදනාවලින් අභියාචනාධිකරණ සභාපති විනිසුරු නිශ්ශංක බන්දුල කරුණාරත්න මහතාගේ චරිතයට සහ ඔහුගේ තනතුරුවලට බරපතළ හානියක් අගතියක් සිදුවී ඇති බවද පෙත්සමෙහි සඳහන් වේ.
එබැවින් වගඋත්තරකාර අමාත්‍යවරයා අධිකරණයට කළ අපහාසයට දඬුවම් නොකිරීමට හේතු දක්වන ලෙසට සඳහන් කරමින් නොතිසි නිකුත් කරන ලෙස ද අධිකරණ අපහාසය සම්බන්ධයෙන් දඬුවම් නියම කරන ලෙසද නීතිඥවරිය සිය පෙත්සමෙන් ඉල්ලා ඇත.
මෙම පෙත්සම අභියාචනාධිකරණය හමුවේ සලකා බැලීමට නියමිතය.
රන්ජන් කටුගම්පොළ
0 Comments